لە باروودۆخێکدا کە قەیرانی قووڵی ئابووری لە ئێران ژیان و گوزەرانی کرێکاران و زۆربەی جەماوەری خەڵکی بەرەو فەلاکەت بردووە، کۆماری ئیسلامی بە تەرخانکردنی سەدان ملیۆن دۆلار لە سفرەیان، بەنیازە بە بیانووی ئەربەعین لە عێراق هێز و دەسەڵاتی خۆی نومایش بدات. ئەم شانۆی دەسەڵاتە بەتایبەت ئەمساڵ کە ڕێژیمی کۆماری ئیسلامی زیاتر لە ڕابردوو کەوتووەتە بەر نەفرەت و تووڕەیی جەماوەر و گرووپە میلیشیاکانی سەربەم ڕێژیمە لە عێراق کەوتوونەتە پێگەیەکی لاوازەوە، ڕیسک و قومارێکی مەترسیدارە. دە ڕۆژ لەمەوبەر بوو کە جەماوەری ناڕازیی بەغدا و شارەکانی دیکەی باکوور و ناوەندی عێراق لەڕێگەی خۆپیشاندانێکی دەیان هەزار کەسی لە ناوچەی سەوزی بەغدا و بە تێکهەڵچوونیان لەگەڵ گرووپە چەکدارە ئیسلامییەکانی ڕێژیمی ئیسلامی، نەفرەت و بێزاری خۆیان لەئاست دەخاڵەتەکانی کۆماری ئیسلامی لە عێراق دەربڕی. بەهۆی ئەم ناڕەزایەتییانە و لەئاکامی تێکهەڵچوونی چەکدارانە لەنێوان هێزەکانی سەربە ڕەوتی سەدر و میلیشیای سەربە ڕێژیمی کۆماری ئیسلامی ٣٣ کەس کوژران و زیاتر لە ٦٠٠ کەس برینداربوون. خەڵکی ناڕازی و وەگیانهاتوو لە دەخاڵەتەکانی کۆماری ئیسلامی، کە بووەتەهۆی گەندەڵی و دزی و پەرەسەندنی هەژاری و برسییەتیی خەڵکی عێراق، هێرشیان کردە سەر ناوەند و نووسینگەکانی ئەم ڕێژیمە و ئاڵا و وێنەی خامنەیی و ڕەئیسیی جەلاد و قاسم سولەیمانییان ئاگرتێبەردا و تێکڕا هاواریان کرد: “ئێران دەبێ بڕواتە دەر و سپای پاسداران بکوژی خەڵکی عێراقە”.
لە وەها باروودۆخێکدا ڕێژیم بە هێنانەمەیدانی سەدان هەزار کەس لە دەست و پێوەندەکانی کۆماری ئیسلامی، بەسیجییەکان، بنەماڵەی کوژراوەکان و کەمئەندامان، هێزە ئەمنییەتی و سیخوڕەکان، ئاخوندە مفتەخۆرەکان، لەناوەوەی ئێران و لە عێراق دەستی داوتە کردەوەیەکی مەترسیدار و هاندەرانە. لەڕوانگەی زۆرێک لە چاوەدێرانی سیاسی و کارناسانی پرسەکانی عێراق، دامرکانی شەڕ و تێکهەڵچوون لەنێوان خەڵکی عێراق و میلیشیای چەکداری هێزەکانی سەربە کۆماری ئیسلامی، کاتی و هاوشێوەی ئاگری ژێر خۆڵەمێشە و هەموو سات ئەگەری هەڵگیرسانی لەئارادایە و لەوانەیە ڕووداوی هاوشێوەی ساڵی ١٣٦٦ی مەکەی لێ بکەوێتەوە. لە ڕووداوە خوێناوییەکەی ئەو ساڵەدا کە خومەینی ناوی “بەرائەت لە موشرێکین”ی لەسەردانا، ٣٢٥ کەس لە زائیرانی ئێرانی کوژران. بەڵام بەوەشەوە خومەینی بە سەرکەوتنێکی درەوشاوەی دەزانی. خومەینی هەر ئەوکات لە نامەیەکدا بۆ مێهدیی کەرووبی سەرپرستی ئەم شانۆیە، کە دەستبەجێ لە عەرەبستان چووە دەرەوە، نووسیی: “ئەگەر هەزاران موبەلیغ و ڕووحانیمان ڕەوانەی ئەوپەڕی جیهان کردبا نەماندەتوانی بەم شێوەیە و بەم جوانییە، سنووری نێوان دەسەڵاتی داد و دەسەڵاتی سەرسپێردراوان دیاری بکەین”.
ئەنجامدانی مانۆڕی دەسەڵات لەلایەن کۆماری ئیسلامی لەناوخۆی عێراق و لە وەها باروودۆخێکدا ئەگەری ڕوودانی کوشتارێکی دیکە دەباتە سەرێ. چوارشەممەی حەفتەی ڕابردوو ساڵح محەممەد ئەلعێراقی، ڕاوێژکاری موقتەدا سەدر لە پەیامێکی تونددا هۆشداری بە کۆماری ئیسلامی دا کە: “وشترەکانتان لە عێراق مەهار بکەن ئەگینا پەشیمان دەبنەوە”. موقتەدا سەدر ئاخوندی جەنایەتکاریش ڕۆژی ١٣ی خەرمانان لە تویتێکدا هۆشداری بە زائیرانی ئێرانی دا کە “پەیڕەوی یاساکانی عێراق بن و خۆیان نەکەنە خانەخوێ”. ناوبراو داوای لە بەرپرسانی ناوخۆیی کەربەلاش کرد کە ئەمنییەتی مەراسیمی ئەربەعین بە هێزەکانی حەشدی شەعبی و سرایا سەلام نەسپێرن. بێگومان ئەمانە خۆی نیشانەی ئەم باروودۆخە مەترسیدارە و ئەگەری سەرهەڵدانی شەڕە. ئەمساڵ ساڵوەگەڕی ئەربەعین واتە “چل ڕۆژ پاش کوژرانی حسێن لە ١٤٠٠ ساڵ لەمەوبەر) بەرابەرە لەگەڵ ٢٦ی خەرمانان. بەڵام کۆماری ئیسلامی بۆ گەڕاندنەوەی پێگەی لەدەستچووی لە عێراق، لە زۆر پێشرەوە بۆ دەخاڵەتکردن و ناردنی ژمارەیەکی هەرچی زیاتر لە زائیران بۆ عێراق خۆی ئامادە دەکات تا بەڵکوو بتوانێ بە پێکهێنانی ترس و وەحشەت دەسەڵاتی خۆی نومایش بدات و لە چەند ڕۆژ لەمەوبەرەوە خەڵک بەرەو سنوورەکانی عێراق وەڕێکەوتوون.
بەم ئامانجە، بەرپرسانی کۆماری ئیسلامی لە خامنەییەوە تا باقیی مۆرەکانی ڕێژیم فەرمانیان بە زۆرێک لە وەزارەتخانە و ناوەندەکانی دەسەڵات داوە کە بە هەموو توانا و ئیمکاناتەوە هەوڵ بدەن تا ژمارەیەکی هەرچی زیاتر بنێرن. ڕایانگەیاندووە کە لەم ماوەیەدا غەیبەتی کارمەندانی دەوڵەت، خوێندکاران و سەربازان لە شوێنی کارەکەیان مووەجەهە و کەس حەقی نییە لێپرسینەوەیان لێ بکات. بۆ تەماع وەبەرنانی بەشداربووانیش بەڵێنیان پێ داون کە تا پێنج ملیۆن تمەن وەک وامی درێژماوە بەبێ سەردانی بانک دەخرێتە ژمارە حیسابەکەیانەوە. هەزینەی هاتووچۆ، خۆرد و خۆراک و تەدارۆکاتی ناو ڕێگا، مانەوە، دەرمان، تەبلیغات و هەزینەی شەیپوورچی و مەداحەکانی ڕژێم، چاپ و بڵاوکردنەوەی ملیۆنان نوسخە پۆستێر و پلاکاردی تەبلیغی و هیتر، بەگشتی وەئەستۆی حکوومەت دەبێت. بە فەرمانی ڕەئیسیی قاتڵ هەموو ناوەندە ئیجراییەکان لەوانە وەزارەتی ئابووری، سازمانی بەرنامە و بوودجە، سازمانی حەج و زیارەت، ستادی مەرکەزیی ئەربەعین، پۆلیسی گوزەرنامە، بانکەکان، شارەدارییەکان، وەزارەتی تەندرووستی، وەزارەتی ناوخۆ، وەزارەتی ڕێگاوبان، بۆنیادی موستەزعەفان، کۆمیتەی ئیمداد، ئاستانی قۆدس و شیرکەتەکانی فڕۆکەوانی و ئوتوبووسڕانی و باقیی ناوەندەکانی تر موەزەفن بەشداری بکەن و ئیمکاناتی خۆیان بخەنە خزمەت ئەم پڕۆژەیەوە.
واقعییەت ئەوەیە کە ئەم کردەوانە نیشانەی لاوازی و زەبوونیی ڕێژیمە کە دەیهەوێ بە هێنانەمەیدانی تەعەسوباتی کوێری مەزهەبی، بەشداریکردن لە مەراسیمێکی خورافەی مەزهەبی بکاتە مانۆڕێکی سیاسی بۆ نیشاندانی دەسەڵاتی خۆی. بێگومان ئەم هەزینە سەدان ملیارد دۆلارییە، لە سفرەی بێ ڕەونەقی بنەماڵە کرێکار و زەحمەتکێشەکانی ئێرانەوە دەدرێت. بەڵام ئەم مانۆڕی دەسەڵاتە بۆ گەڕاندنەوەی نفووز و توانای ڕێژیم لەلای خەڵک هیچ بایەخێکی نییە. لەڕوانگەی کرێکاران و جەماوەری خەڵکی زەحمەتکێشەوە ئەم کردەوەیەی ڕێژیم نە نیشانەی دەسەڵات بەڵکوو دەرخەری لاوازبوون و زەبوونیی حکوومەتێکە کە ساڵەهایە سەدها ملیاردی لە بەرهەمی ڕەنج و کاریان کردووەتە هەزینەی دەخاڵەت لە کاروباری وڵاتانی تر، کردوویەتە هەزینەی دەیان گرووپی تیرۆریستی چەکداری ئیسلامی لە وڵاتانی تر تا دەسەڵاتە نامەشرووعەکەی لەسەرپێ ڕابگرێت. بەڵام بەدڵنیاییەوە ڕێژیم سەرکەوتوو نابێت. دەسەڵاتێک کە بێکاری و هەژاری و برسییەتی و جەهل و خورافەی لەگەڵ خۆی هێناوە و سەرچاوەی زۆرێک لە ئازارە کۆمەڵایەتییەکانە، دەسەڵاتێک کە دەیهەوێ بەم کردەوانەی سەرەنجی جەماوەری ئێران لەو هەمووە کێشە و ئازارە بێئەژمارەی کە کۆماری ئیسلامی بۆی خوڵقاندوون بەلاڕێدابەرێت، تا بەوتەی وەزیری ئێرشادی ڕێژیم “حکوومەت” بیمە بکات، ناتوانێ لەسەر پێ بمێنێت و درەنگ یان زوو بە زەبری لافاوی خرۆشاوی شۆڕشی کرێکاران و جەماوەری خەڵکی زەحمەتکێش دەخرێتە زبڵدانی مێژووەوە.