پلێنۆمی کۆمیتەی ناوەندیی حیزبی کۆمۆنیستی ئێران هەڵبژێردراوی کۆنگرەی ١٤ کە لە ڕۆژانی شەممە و یەکشەممە ٣ و ٤ی مانگی سەرماوەزی ١٤٠٣ بەرابەر بە ٢٣ و ٢٤ی نوامبری ٢٠٢٤ بەڕێوەچوو، لە باسی پەیوەندیدار بە هەڵومەرجی سیاسی، هەڵوێستگیریی حیزبی لەم قۆناغەدا دایە بەر باس و دوای بیستن و هەڵسەنگاندنی ڕاپۆرتە تەشکیلاتییەکان، دوایین بەشی کاری خۆی بە تەقسیمی کار و تازەکردنەوەی ئارایشی کۆمیتەی ناوەندی و هەڵبژاردنی کۆمیتەی ئیجرایی حیزب تەرخان کرد.
پلێنۆم لە باسی پەیوەندیدار بە هەڵوێستگیریی حیزب لەم قۆناغەدا تەئکیدی کرد کە ستراتێژی شەڕی دەوڵەتی ئیسرائیل بۆ پێکهێنانی “نەزمی نوێی ناوچەیی” و سەرکەوتنی ترامپ لە هەڵبژاردنەکانی سەرۆک کۆماری ئەمریکا و ئاسۆی سەپاندنی “زۆرترین فشار”، یەکێک لە ئاکامەکانی هیوادار بوونی بەشێک لە ئۆپۆزیسیۆنی ڕاست و بورژوازیی ئێران بە هەڕەشەکانی نەتانیاهۆ بەرانبەر کۆماری ئیسلامی و پەرەسەندنی شەڕ بەرەو ئێران و ئومێد بەستن بە فشارەکانی ترامپ بۆ پڕۆژەی “ڕژیم چەینج” و دەست بە دەست کردنی دەسەڵات لەسەر سەری خەڵکەوەیە. تەنانەت هێندێک لە هێزە ئۆپۆزیسیۆنەکانی بەناو چەپ، بە هێرشی مووشەکیی دەوڵەتی فاشیستی ئیسرائیل بۆسەر پایەگا نیزامییەکانی کۆماری ئیسلامی لەژێرناوی خێراتر کردنەوەی پڕۆسەی ڕووخاندنی ڕژیم دڵیان خۆش کردووە.
لە دوای هەڵبژاردنەکانی ئەمریکا ڕەزا پەهلەوی کە هەوای ڕێبەری لە دەورانی گوزار لەسەری دایە، لە پەیامێکدا بۆ ترامپ داوای لێ کرد کە مێژوو بخوڵقێنێ و لەڕێگەی یارمەتیدان بۆ کۆتاییهێنان بە هەڕەشەی کۆماری ئیسلامی، میراتێک لە ئاشتیی پایەدار بەجێبهێڵێت. عەبدوڵڵا موهتەدیش لە پەیامێکدا هیوای خواست کە ترامپ لە شەڕ دژی نیزامی ئیسلامی لە ئێران لە خواستەکانی خەڵکی ئێران بۆ ئازادی، ئاشتی و سەقامگیری پشتیوانی بکات. ئەمانە لە کاتێکدا ترامپ ئەم هێما دژەژن و دژەپەنابەرە بە قارەمانی ئاشتیی پایەدار و پشتیوانی ئازادی، ئاشتی و سەقامگیری لە ئێران و کوردستان پێناسە دەکەن کە ئەزموونی لەشکرکێشیی ئەمریکا بۆسەر ئەفغانستان و عێراق و ڕووخاندنی ڕژیمەکانی تاڵەبان و سەدام، لەسەر کار لابردنی قەزافی لە لیبی بەزەبری فڕۆکە بۆمب هاوێژەکانی ناتۆ، بێجگە لە وێرانی، ئاوارەیی، ناسەقامگیری و هەژاری و پەرەسەندنی ئیسلامی سیاسیی توندڕەو، ئاکامێکی تری نەبووە. لەقاودان و ئاشکرا کردنی سرووشتی ڕاستەقینەی هەڵوێست و سیاسەتی بەشە جۆراوجۆرەکانی ئۆپۆزیسیۆنی ڕاست و بورژوازی ئەرکێکی هەمیشەیی حیزبی کۆمۆنیستی ئێرانە.
دڵخۆش کردنی ئۆپۆزیسۆنی ڕاست بە ترامپ لە ڕووی شیکاریشەوە لەو هەڵسەنگاندنە نادروستەوە سەرچاوە دەگرێ کە گۆیا ترامپ دەیهەوێ ڕژیمی ئیسلامی بڕووخێنێت. ئەوەش لە کاتێکدایە کە ترامپ و ڕاوێژکارەکانی گەلێک جار ڕایانگەیاندووە کە بەنیازی ڕووخاندنی ڕژیمی ئیسلامی نین. واقعییەت ئەوەیە کە لەگەڵ شکستی ستراتێژی شەڕی پێشگرانەی حکوومەتی ئیسلامی لە ڕۆژهەڵاتی ناوەڕاست، سەرانی ڕژیم لە نۆشینی جامی ژەهرێکی دیکە نزیک بوونەوە. هەرکات سەرانی ڕژیم ئەم شکستە بەڕەسمی بناسن و ئامادەی نۆشینی جامی ژەهر بن، ئەوکات دەوڵەتی ترامپ زۆر نەرم و نیانتر لە دەوڵەتی دیموکراتەکان بە بێ ئەوەیکە پرسەکانی پەیوەندیدار بە “مافی مرۆڤ” بکاتە بیانوو، ئامادەی وتووێژ و سازش دەبێت. ئەم پێگە لاوازەی کۆماری ئیسلامی بەر لەوەیکە بەرهەمی فشارەکانی دەوڵەتی ئەمریکا یان زەربەی دەوڵەتی ئیسرائیل لە حیزبوڵڵا و نەسروڵڵا و سپای پاسداران بێت، بەرهەمی بزووتنەوەی شۆڕشگێڕانەی خەبات بۆ ڕووخاندنی ڕژیمی کۆماری ئیسلامییە کە پشتی جەبهەی نائەمن و زەویی ژێر پێی حکوومەتی ئیسلامیی داغ کردووە.
لەم کێشمەکێشەدا، خاڵی بەرامبەری هێزە ئۆپۆزیسیۆنە ڕاستەکان کە بۆ ڕووخاندنی کۆماری ئیسلامی چاوی هیوایان لە دەسەڵاتە دەرەکییەکان بڕێوە، ڕەوتی پڕ هەراوهوریای چەپی میحوەری موقاومەتییە. واتە ئەو ڕەوتەی کە ئۆپۆزیسۆنی ڕاست لە هەڵوێستەکانیان دژبە بزووتنەوەی چەپی شۆڕشگێڕ و ڕادیکاڵ کەڵک وەردەگرێت. هەڵوێستی کۆنەپەرستانە و ناسیۆنالیستی “چەپی میحوەری موقاومەتی”، جۆرێکی تر لەو هەڵوێستە شوڤنیستییە تەحقیرکراوەیە کە سپای پاسدران بە دروستکردنی بۆمب و مووشەک و درۆن، بە کێبەرکێی نیزامی، بە ڕێکخستنی گرووپە نیابەتییەکان و بە نیزامی کردنی ئابووری بە دروشمەکانی وەک گەڕاندنەوەی عەزەمەتی ئێران دەیهەوێ بەڕێوەی بەرێت. بەداخەوە لەو هەڵڵاوهەنگامەیەدا هێندێک لە کەسایەتییە ناسراوەکانی چەپ بە پاساوی خەبات دژبە جینۆسایدی دەوڵەتی ئیسرائیل و بەرەنگاربوونەوە لەگەڵ نەزمی نوێی خوازراوی نەتانیاهۆ هاوئاراستە لەگەڵ چەپی میحوەری موقاومەتی، کەوتنە بەرەی کەسانێکی بەدناو و داکۆکیکاری کۆماری ئیسلامی بۆ نموونە کەسانێکی وەک مەرعەشییەکان، محەممەد قووچانییەکان، فەرۆخ نگەهدارەکان.
بەڵام ئەگەر شەڕی ئیحتمالی و گشتیگری نێوان دەوڵەتی فاشیست و ڕەگەزپەرستی ئیسرائیل و ڕژیمی فاشیستی کۆماری ئیسلامی، درێژەی جینۆسایدی دەوڵەتی ئیسرائیل لە غەززە، شەڕ و وێرانی لە لۆبنان، درێژەی سیاسەتی ڕژیمی ئیسلامی بۆ زیندووکردنەوەی “نیزامی خەلافەتی ئیسلامی شیعە میحوەر”، “ئازادکردنی قۆدس لەڕێگەی نابوودیی ئیسرائیل” و درێژەی جەحەنەمێکە کە حکوومەتی ئیسلامی لە ئێران بەرپای کردووە، هەڵوێستی چینایەتیی کرێکاران لەئاست ئەم شەڕەش درێژەی سیاسەتی بەشی هوشیاری ئەم چینە بەرانبەر کۆماری ئیسلامی و سیاسەتەکانی ئەم ڕژیمەیە کە کۆمەڵگای خستووەتە مەترسیی شەڕەوە. بەخۆشییەوە سەرەڕای هەڵوێستی کۆنەپەرستانە و ڕاست ڕوانەی بەشێک لە ئۆپۆزیسیۆن لەئاست شەڕی ئیحتمالی، ڕەوتی بابەتیی خەباتی کرێکاران، خانەنشینان و پەرستاران سەلمێنەری ئەم هەڵوێستە چینایەتییە. هەڵوێستی هێندێک لە ڕێکخراو و ناوەندە کرێکارییەکان بۆ نموونە سەندیکای شیرکەتی واحیدی ئوتوبووسڕانیی تاران و دەوروبەر لەژێرناوی “پێویستیی ئاگربەستی دەستبەجێ و پایەدار لە ناوچەکە و نا بۆ شەڕ”، “بەیاننامەی ناوەندی سنفی موعەلیمانی تاران بۆ مەحکوومکردنی پەرەسەندنی شەڕ و کوشتار لە ڕۆژهەڵاتی ناوەڕاست”، هەڵوێستی شۆرای هاوئاهەنگیی ڕێکخراوە سینفییەکانی موعەلیمانی ئێران لەئاست شەڕ و وتنەوەی دروشمی “سفرەمان بەتاڵە، بەسە شەڕنانەوە” لە ناڕەزایەتیی پڕگڕوتینی خانەنشینان، هەڵوێستی چینایەتیی کرێکاران لەئاست ئەم شەڕخوازییانە بە ڕوونی نیشان دەدات.
بێگومان کرێکاران و زەحمەتکێشان و خەڵکی سەمدیدەی ئێران و خەڵکی ئیسرائیل کە لە سیاسەتی فاشیستیی دەوڵەتی نەتانیاهۆ وەگیان هاتوون و خەڵکی ناوچەی ڕۆژهەڵاتی ناوەڕاست کە هەرکامیان بەجۆرێک قوربانیی سەرەکیی ئەم شەڕخوازییانەن، هیچ بەرژوەندییەکیان لەم شەڕە کۆنەپەرستانە و سەرمایەدارانەیەدا نییە. مەترسیی سەرهەڵدانی ئەم شەڕە هەتا ئێستا بێجگەلە بەرزبوونەوەی نرخی نەوت و دابەزینی زیاتری بەهای ڕیاڵ لە بەرامبەر دۆلار، چوونەسەری نرخی پێداویستییە سەرەکییەکانی ڕۆژانەی خەڵک و پەرەسەندنی شەپۆلی ڕەشبگیری و ئێعدام و کەشوهەوای ئەمنیەتی، ئاکامێکی دیکەی نەبووە. لەگەڵ دەستپێکی شەڕێکی گشتگیر و پەرەسەندنی کوشتار و وێرانی و ئاوارەیی، بزووتنەوەی کرێکاری و هەموو بزووتنەوە پێشڕەوە کۆمەڵایەتییەکان و بزووتنەوەی شۆڕشگێڕانەی ژینا بۆ بەدواداچوونی خەبات و ڕێکخستن و شکڵدان بە ڕێبەری دەکەونە هەلومەرجێکی دژوارترەوە. بزووتنەوەی کۆمۆنیستیی ئێرانیش بۆ شکڵدان بە ئاڵتێرناتیڤێکی شۆڕشگێڕانە و سۆسیالیستی دەکەوێتە دۆخێکی دژوارترەوە. لەم ڕووەوە “ڕووخاندنی کۆماری ئیسلامی” بەزەبری فڕۆکە جەنگییەکانی ئەرتەشی ئیسرائیل کە سەرانی هێزە ئۆپۆزیسیۆنە ڕاستەکان مەوعیزەی دەکەن هیچ پەیوەندییەکی بە بەرژوەندی چینی کرێکار و خەڵکی ئازادیخوازی ئێرانەوە نییە.
لە وەها بارودۆخێکدا درێژەی سیاسەتی شەڕخوازیی کۆماری ئیسلامی لەسەر ئاستی ناوچەکە و پەرەسەندنی سەرکوت لە ناوەوەی ئێران پێویستە بە گەشەپێدانی مانگرتنی کرێکاری لە ناوەندە سەرەکییەکانی بەرهەمهێنان، ناڕەزایەتیی سەرتاسەری و بەڕێوەبردنی مانگرتنی سیاسیی جەماوەری و گشتی وڵام بدرێتەوە. پێویستە بزووتنەوەی کرێکاری بێجگە لە ئاڵای داخوازیی خێرای ئابووری، بە بەرزکردنەوەی ئاڵای خەبات دژبە شەڕخوازیی ڕژیمی ئیسلامی، ئازادیی بەندکراوانی سیاسی، هەڵوەشاندنەوەی سزای ئێعدام و هەڵوەشاندنەوەی حیجابی ئیجباری، ڕێبەریی خەبات بۆ ڕووخاندنی کۆماری ئیسلامیش بگرێتە دەست. تەنیا بە گەشە و پەرەپێدانی خەبات بۆ ڕووخاندنی ڕژیمی کۆماری ئیسلامییە کە دەتوانین سێبەری شەڕ لەسەر سەری خەڵکی ئێران دوور بخەینەوە و بە ڕووخاندنی ئەم ڕژیمە مەترسیی داگیرسانی شەڕ لەناوبەرین.
لە کوردستان بەپێچەوانەی خەون و خەیاڵی حیزبە ناسیۆنالیستەکان، خەڵک لە جەریانی بزووتنەوەی شۆڕشگێڕانەی ژینا بۆ جارێکی تر نیشانیان دا کە نزیکترین ڕێگا بۆ ڕووخاندنی ئەم ڕژێمە لە هاوپشتی و هاوپەیمانی لەگەڵ بزووتنەوە کۆمەلایەتییە ئازادیخواز و پێشکەوتووخوازەکان لە سەرتاسەری ئێراندا دەبینن. ئەم دەستکەوتە بەرهەمی هاوبەشی خەبات و چالاکی هۆشیارانەی کۆمۆنیستەکان و تێکۆشان و ئەزموونی خودی کرێکاران و زەحمەتکێشان و ژنانی چەوساوە لە کوردستان بووە. کرێکاران و زەحمەتکێشان و ژنانی ستەملێکراوی کوردستان بە هوشیاری و بە ئەزموونی خۆیان لە ستراتێژی حیزبە ناسیۆنالیستەکان واتە هیواداربوون بە ئیسلاح تەڵەبانی حکوومەتی، هیواداربوون بە وتووێژ لەگەڵ ڕژیم و دڵخوشکردن بە دەستتێوەردانی دەسەڵاتی دەرەکی تێپەڕیون و ڕووخاندنی ڕژیمی ئیسلامی و وەدیهێنانی ئامانج و داخوازییە ڕەواکانی خۆیان لە هاوپشتی لەگەڵ بزووتنەوەی شۆڕشگێڕانەی سەرتاسەریدا دەبینن.
*****
کۆبوونەوەی دووهەمی کۆمیتەی ناوەندیی حیزب دوای باس سەبارەت بە ڕاپۆرتی سیاسیی کۆمیتەی ئیجرایی و هەڵوێستەکان کە بەنووسراوە خرابووە ئیختیار پلێنۆم و دوای تێبینییەکان لەڕاستای تەکمیلکردنی ڕاپۆرتەکە، بە کۆی دەنگ کولیاتەکەی پەسند کرد.
لە بەشی ڕاپۆرتە تەشکیلاتییەکاندا ڕاپۆرتی کاری ئۆرگانە جۆراوجۆرەکانی حیزب کە بریتین لە کۆمیتەی تەشکیلاتی شارەکان، کۆمیتەی ڕێبەریی کۆمەڵە (ڕێکخراوی کوردستانی حیزبی کۆمۆنیستی ئێران)، کۆمیتەی ڕێکخراوی دەرەوەی وڵات، شۆرای تەلەڤیزیۆنی حیزبی کۆمۆنیستی ئێران و کۆمەڵە، کۆمیتەی ئیدارەی سایت و تۆڕە کۆمەڵایەتییەکانی حیزب، هەیئەتی نوێنەرایەتیی حیزب لە شۆرای هاوکاریی هێزە چەپ و کۆمۆنیستەکان، گۆڤاری جەهانی ئێمرووز، کۆمیتەی پەیوەندییە نێونەتەوەییەکان، کۆمیسیۆنی ماڵی، کۆمیسیۆنی پەروەردە و کۆمیتەی ئیجرایی حیزب بیسترا و درایە بەر ڕەخنە و لێکۆڵینەوە. پلێنۆمی کۆمیتەی ناوەندی لە درێژەدا ئۆرگانە جۆراوجۆرەکانی چالاکیی حیزبی تەقویەتکرد و دووبارە سازمانی دانەوە.
کۆبوونەوەی بەرینی کۆمیتەی ناوەندی دوای لێکدانەوەی ڕاپۆرتە تەشکیلاتییەکان، دەستووری جەلەسەیەکی سەبارەت بە پێگە و گرینگیی ستراتێژیکی تۆڕە کۆمەڵایەتییەکان لە چالاکیی تەبلیغیی حیزب خستە بەرنامەی کاری خۆیەوە. بەو پێیەی کە تۆڕە کۆمەڵایەتییەکان ئەمڕۆ بەهۆی بەرینایی و دەستڕاگەیشتنی ئاسان پێیان، بوونەتە بەستێنیکی گونجاو بۆ پەرەپێدانی هوشیاری و پەیوەندی لەگەڵ کۆمەڵگا بەتایبەت لەگەڵ لاوان و چالاکانی بزووتنەوە کۆمەڵایەتییەکان، ڕێکاری پێویست بۆ بەهێزکردنی ئەم بوارە درایە بەر باس و لێکۆڵینەوە.
پلێنۆمی دووهەمی کۆمیتەی ناوەندی هەڵبژێردراوی کۆنگرەی ١٤ی حیزبی کۆمۆنیستی ئێران لە بەشی کۆتایی کاری خۆیدا، بە مەبەستی هیدایەتی چالاکیی سیاسی و ڕێکخراوەیی حیزب لەماوەی دوو پلێنۆمدا لەناو هاوڕێیانی کۆمیتەی ناوەندیدا یازدە کەس لە هاوڕێیان: هەڵمەت ئەحمەدیان، ڕەئووف پەرستار، نوسرەت تەیموورزادە، شەمسی خوڕەمی، ناسر زەمانی، حەسەن شەمسی، ئەحمەد عەزیزپوور، سەلاح مازوجی، جەلال محەممەدنەژاد و سەدیقە محەممەدی و ئەردەشیر نەسڕوڵڵا بەیگیی وەک ئەندامی کۆمیتەی ئیجرایی حیزب هەڵبژارد.
کۆمیتەی ئیجرایی حیزبی کۆمۆنیستی ئێران
٢٨ی نوامبری ٢٠٢٤
٨ی سەرماوەزی ١٤٠٣