لە ماوەی ڕۆژانی چوارشەممە و پێنجشەممەی حەفتەی ڕابردوو، حوکمی ئێعدامی ٧ بەندکراو کە پێشتر بە تۆمەتی “کوشتنی بە ئەنقەست” و “تاوانەکانی پەیوەندیدار بە مادە هۆشبەرەکان” بە ئێعدام مەحکووم کرابوون، لە زیندانی ناوەندیی ئیسفەهان جێبەجێ کرا.
بەپێی ئەم ڕاپۆرتە، سەرلە بەیانی ڕۆژی پێنجشەممە ٢ی ڕەشەممە، حوکمی ئێعدامی “حسێن گەشووڵ” تەمەن ٣٢ ساڵ و کوڕە مامەکەی “بێهروز گەشوڵ” تەمەن ٣٥ ساڵ و خەڵکی شاری ئیسفەهان، لە زیندانی ناوەندیی ئەمشارە جێبەجێ کرا. ئەم دوو بەندکراوە شەش ساڵ لەمەوبەر لە دۆسییەکی هاوبەشدا لەگەڵ فەرهاد گەشووڵ برای بێهروز بە تۆمەتی کوشتنی بە ئەنقەست دەستبەسەر و لەلایەن دەزگای دادوەری کۆماری ئیسلامییەوە، حوکمی ئێعدامیان بەسەردا سەپێنرا بوو. شایانی باسە، حوکمی ئێعدامی “فەرهاد گەشووڵ” جێبەجێنەکراوە و بۆ بەند گەڕێندراوەتەوە. لە لایەکی دیکەوە، ڕۆژی چوارشەممە ١ی ڕەشەممە، حوکمی ئێعدامی دوو بەندکراو بە ناوەکانی “شاهین گودەرزی” تەمەن ٤٠ ساڵ و خەڵکی بروجێرد و “ئەسغەر دێهقانی” تەمەن ٥١ ساڵ و خەڵکی شاری ئیسفەهان، بە هەمان تۆمەت لەم زیندانە جێبەجێ کراوە. هەروەها هەمان ڕۆژ، حوکمی ئێعدامی سێ بەندکراوی دیکە بە ناوەکانی “ئەحمەد حەنفی” تەمەن ٣٧ ساڵ و خەڵکی تایباد، “وەحید موحەبی” خەڵکی زابۆل و “موجتەبا خوڕەمدڵ” تەمەن ٣٠ ساڵ و خەڵکی بەندەرعەباس کە پێشتر لە دۆسیەی جیاوازدا بە تۆمەتی “پەیوەندیدار بە مادە هۆشبەرەکان” حوکمی ئێعدامیان بەسەردا سەپێنرابوو، لەم زیندانە جێبەجێ کرا.