ڕۆژی یەکشەممە ١٢ی ڕەشەممە، شارەکانی ئێران شایەتی ئێعتڕاز و ناڕەزایەتیی کرێکاران و توێژەکانی دیکەی کۆمەڵگا لەئاستێکی بەریندا بوو.
بەگوێرەی ڕاپۆرتەکان، ژمارەیەک لە کرێکارانی شاغڵ لە پڕۆژەی پاڵاوتنی ئاو لە چابەهار، کۆمەڵێک لە چالاکانی کۆمەڵایەتی لە گەناوە، ناڕەزایەتیی سەرتاسەری خانەنشین کراوانی تەئمینی ئیجتماعی لە شارەکانی تاران، ئەهواز، شووش، کرماشان و ڕەشت، کۆمەڵێک لە خانەنشین کراوانی سندووقی پۆڵا لە ئیسفەهان و قائێمشار، ژمارەیەک لە خوێندکاران لە ئێراشار، ژمارەیەک لە کرێکارانی پاڵاوگەکانی ئیلام و کۆمەڵێک لە خوازیارانی دامەزراندن لە جەهادی دانشگایی لە تاران، بە ڕێپێوان و کۆبوونەوە لە شوێنی کارەکانیان، لەئاست جێبەجێ نەکرانی خواستەکانیان و هەروەها کەمتەرخەمی بەرپرسانی دەوڵەتی بە کێشەکانیان، کۆبوونەوەی ناڕەزایەتییان بەڕێوەبرد. لە لایەکی دیکەوە کۆمەڵێک لە کرێکارانی شیرکەتی “پێترۆپاڵایشی مەکران” لە شارستانی جاسک، لەئاست پێڕانەگەیشتن بە خواستەکانیان دەستیان لەکار کێشایەوە و لە ئەنجام دانی کاری ڕۆژانەیان خۆیان بوارد.