خەبات بۆ بردنەسەرەوەی حەقدەستەکان بابەتێکی گرینگ و ڕانەوەستاوە!
“شۆرای باڵای کار” پێکهاتوو لە نوێنەرانی دەوڵەت، خاوەنکاران و دەستوپێوەندەکانی سەربە ناوەندە حکوومەتییەکان لە ڕێکخراوە فەرمایشی و دژەکرێکارییە دەستسازەکانی ڕژیم، لە دوو مانگی کۆتایی هەموو ساڵێکدا بە بێ بایەخدان بە داخوازیی واقعیی کرێکاران کە لە ماوەی ساڵدا هاواری بۆ دەکەن، ڕەقەمێک بەپێی قازانجی حکوومەت و مافیای دەسەڵات و سەرمایەداران کە پێشتر ئاستەکەی دیاریکراوە، وەک لانیکەمی حەقدەستی ساڵ ڕادەگەیەنێت.
لەسەر بڕیاری ئەم ئۆرگانە دژە کرێکارییە، دیاریکردنی لانیکەمی حەقدەست بەپێی ڕێژەی تەوەرۆم و سەبەدی هەزینەی بژێوی بنەماڵەیەکی کرێکارییە. بە لێکدانەوەی ئەم دوو فاکتۆرە، ئاستی لانیکەم حەقدەستی مانگانەی کرێکاران نزیکەی ٤ و نیو ملیۆن تمەن لەبەرچاو گیراوە کە ئەگەر خەرجییەکانی وەک مەسکەن، کەلوپەل و پایەی سەنەواتیشی پێ ئیزافە بکرێت نیهایەتەن دەبێتە نزیکەی ٥ ملیۆن تمەن لە مانگدا. ئەوەش لە حاڵێکدایە کە هێڵی هەژاریی واقعیی زیاتر لە ١٢ ملیۆن تمەنە. بەڵام شۆرای باڵای کار بێشەرمانە نرخێک کە چەند بەرابەر لەژێر هێڵی هەژاری دایە وەک هێڵی هەژاری ڕایگەیاندووە.
ڕێژەی تەوەرۆم لەمساڵدا بەوتەی بانکی ناوەندی لەنێوان ٤٠ تا ٤٥ لەسەدا بووە و بۆ ساڵی داهاتوو ئەگەری تەوەرۆمی ٥٠ لەسەدی لەئارا دایە کە بە چوونەسەرەوەی ٦٠ لەسەدیی قیمەتی خۆراکییەکان لەپەنا هەزینەی سەرسووڕهێنەری مەسکەن، ئەم لانیکەم حەقدەستە کەمتر لە یەک دووهەمی هێڵی هەژاریی ١٢ ملیۆن تمەنییە کە ناتوانێت تەنانەت نیوەی خەرجییەکانی ژیانی بنەماڵەیەکی سێ کەسی دابین بکات.
بەپێی ڕاگەیەندراوی وەزارەتی تەعاون، کار و ڕەفاهی ئیجتماعی تا ساڵی ڕابردوو ٢٦ ملیۆن کەس لە جەمعییەتی ٨٤ ملیۆنی ئێران لە ژێر هێڵی هەژاریدا بوون، بەسەرەنجدان بە چوونەدەرەوەی دوو ملیۆن کەس لە بازاڕی کار بەهۆی بڵاوبوونەوەی پەتای کۆرۆنا، بەراورد دەکرێت کە جەمعییەتی ژێر هەژاری بێسنوور بگاتە ٣٠ تا ٣٥ ملیۆن کەس. هەروەها باس لەوە کراوە کە نزیکەی ٧ ملیۆن کرێکار بیمەی کۆمەڵایەتی و دەرمانییان نییە. لەم دوایانەدا موحسین حاجی بابایی سەرۆکی کۆمیسیۆنی بەرنامە و بوودجەی مەجلیسی شۆرای ئیسلامیی ڕژیم وتوویەتی کە نزیکەی ٤٠ ملیۆن کەس لە جەمعییەتی ئێران پێویستییان بە یارمەتیی خێرا هەیە.
بەم حاڵەوە بردنەسەرەوەی حەقدەستی چەندین بەرابەر ژێر هێڵی هەژاری، کە هەموو ساڵێ لەلایەن “شۆرای باڵای کار” دیاری دەکرێت و ڕادەگەیەندرێت، لە باشترین حاڵەتدا تەنیا بەشێکی سنووردار لە گشت دامەزراوانی بەشی گشتی و خسووسی دەگرێتەوە. زۆربەی هەرەزۆری کرێکاران لەو کارگەیانەدا کار دەکەن کە ژمارەیان نزیک بە یەک ملیۆنە و سەدان هەزار کرێکاری نیوە وەخت و ژنان و منداڵانێک کە خەریکی بەرهەمهێنانی کەرەستەی ماڵی و لاوەکین و هەزاران حاشینەنشینی شارەکان کە بە حەقدەستێکی یەکجار کەمەوە خەریکی کارن، هەر ئەم “یاسای کار”ە دژە کرێکارییە و ئەم لانیکەمە حەقدەستە کەمەش، نایانگرێتەوە.
ڕژیمی سەرمایەداریی ئیسلامی بە هەموو ئامرازە یاسایی و ئینتزامییەکان و بە هەموو هێزییەوە هەوڵ دەدات تا هەزینەی قورسی تەوەرۆم و ئابووریی داڕماوی لە سفرەی کرێکارانەوە دابین بکات تا قازانجی مافیای دەسەڵاتدار و خاوەنکارانی دز و گەندەڵ هەروا پارێزراو بێت.
لەئێستادا کە زۆرێک لە کرێکاران و زەحمەتکێشان خەریکی مانگرتن، خۆپیشاندان و کۆبوونەوەی ناڕەزایەتین، زیاتر لە هەموو کاتێک هاوپشتی و هاتنە مەیدانی چینایەتی لەم نەبەردەدا پێویستە. ڕژیمی دژەئینسانیی کۆماری ئیسلامی سەلماندوویەتی کە یاری سەرمایەداران و دزانە و بۆ پاراستنی دەسەڵاتدارییەتیی ئەم چەوسێنەرانە لە هیچ جەنایەتێک دەریغ ناکات و زەمانەتی کەمترین داخوازیی ئابووری تەنیا لەڕێگەی ڕووخاندنی شۆڕشگێڕانەی کۆماری ئیسلامی و دامەزراندنی دەوڵەتی شۆراییەوە دێتە دی.
ڕێکخراوی دەست نیشاندە و سەرسپێردراوی ڕژیمیش نە نوێنەری کرێکاران بەڵکوو کاربەڕێکەری سەرمایەداران و ئامرازی کۆنتڕۆڵکردنی بزووتنەوەی شۆڕشگێڕانەی کرێکارانە. تا کاتێک کە چارەنووسی کار و ژیانی کرێکاران بەدەستی خویان و نوێنەرانی هەڵبژێردراویان دیاری نەکرێت، تاوان و جەنایەتی سەرمایەداریی ئیسلامی هەروا درێژەی دەبێت.
شۆرای هاوکاریی هێزە چەپ و کۆمۆنیستەکان هاوڕێ لەگەڵ چینی کرێکار تا گەیشتن بە خۆشبژێوی و دەسەڵاتی کرێکاران بەسەر چارەنووسی خۆیان و ڕووخاندنی دەسەڵاتی سەرمایە دژبە کۆماری ئیسلامی و یاسا دژەکرێکارییەکانی خەبات دەکات.
خەبات بۆ بردنەسەرەوەی حەقدەست یەکێک لە سەرەتاییترین و گرینگترین خەباتەکانی کرێکاران دژبە سەرمایەیە و بە هیچ شێوەیەک ڕانەوەستاوە و ڕاشناوەستێت. ئێمە وێڕای پشتیوانی لە لانیکەمی حەقدەستی مانگانەی پێشنیارکراو لە بەیاننامەی ڕێکخراوە سەربەخۆ کرێکارییەکان و خانەنشینکراوان و مامۆستایان لەسەر ئەو خاڵە تەئکید دەکەین کە حەقدەستەکان پێویستە بەپێی پێداویستییەکانی خۆشبژێویی گونجاوی ژیانی کرێکاران دیاری بکرێت و سەلاحییەتی دەستنیشانکردنی ئەم هاوسەنگییە تەنیا وەئەستۆی ڕێکخراوی خەباتکار و سەربەخۆ و سەرتاسەریی کرێکارانە نەک ڕێکخراوە دەستسازەکانی دەسەڵاتی سەرمایەداری و ڕێکخراوە زەردەکان.
بڕووخێ ڕژیمی سەرمایەداریی کۆماری ئیسلامی!
بژی ئازادی، بژی سۆسیالیسم!
١٤ی فێوریەی ٢٠٢٢ – ٢٥ی ڕێبەندانی ١٤٠٠
ئیمزاکان: ئیتحادی فەداییانی کۆمۆنیست، حیزبی کۆمۆنیستی ئێران، حیزبی کۆمۆنیستی کاریگەری-حێکمەتیست، سازمانی راهی کاریگەر، سازمانی فەداییان(ئەقەلییەت) و هەستەی ئەقەلییەت