دوای ئەوەیکە “عەلی محەممەدی” مودیر عاملی کارخانەی گرووپی میللیی سەنعەتی فوولادی ئەهواز ٢١ کرێکاری خەباتکاری لە چوون بۆناو شیرکەت قەدەغە کرد و گەڵاڵەی ڕیزبەبەندیی پیشەی بەڕێوەنەبرد، بەیانیی ڕۆژی شەممە ٢ی مانگی بەفرانباری ١٤٠٢ کرێکارانی گرووپی میللیی فوولاد بۆ جارێکی تر دەستیان دایە مانگرتن. بەدوای پەرەستاندنی مانگرتن بۆ هەموو بەشەکانی هێڵی بەرهەمهێنان، کرێکارانی مانگرتوو کە پێشتریش بە مودیری عاملی شیرکەت لەئاست لابردنی قەدەغەی هاوڕێیانی هاوکاریان و ئیجرای کامڵی گەڵاڵەی ڕیزبەندیی پیشە هۆشداریان دابوو، بەهۆکاری جێبەجێ نەکرانی خواستەکانیان، سەرەتا لە بەرامبەر دەفتەری بەڕێوەبەرایەتی و پاشان لە بەرامبەر دەفتەری جێگری فەنی شیرکەت کۆبوونەوەی ناڕەزایەتییان بەڕێوەبرد. وە بە دوای ئەمەدا لە حەرەکەتێکی یەکگرتووانەدا عەلی محەممەدی، مودیری عاملی شیرکەتیان لە شوێنی کارەکەیان ڕاونا. کرێکارانی فوولاد دوای ڕاونانی بەڕێوەبەری شیرکەت، بەمەبەستی ڕاکێشانی پشتیوانیی خەڵک لە کارخانەوە تا مەیدانی بەقایی، سەرەتای جادەی ئەهواز – خورەمشار ڕێپێوانیان کرد و بە دروشمی بەهێزی وەک “ئێمە کرێکارانی فوولاد بەرەنگاری زوڵم و بێداد دەبینەوە”، “سفرەمان خاڵیە، زوڵم و ستەم کافیە” دووبارە بەرەو کارخانە گەڕانەوە.
کرێکارانی ناڕازیی فوولاد بە ڕێپێوان و ڕاگرتنی بەرهەمهێنان لێبڕاوانە لەسەر لابردنی قەدەغەی هاوکارانیان و ئیجرای دەستبەجێ و کامڵی گەڵاڵەی ڕیزبەندیی پیشە پێداگرییان کرد و ڕایانگەیاند کە بە یەکگرتوویی و هاوپشتی هەتا وەدیهێنانی خواستەکایان لە خەباتیان بەردەوام دەبن. بەڵام لە کاردانەوە بە مانگرتنی کرێکاران، بەڕێوەبەرایەتیی شیرکەت بە هاوکاریی هێزەکانی حەراسەت کارتی چوونەژووری ١٧ کرێکاری دیکەشیان مەسدوود کرد و بەمجۆرە هەتا ئێستا ٣٨ کرێکار بە هۆی پێداگری لەسەر خواستەکانی خۆیان و هاوکارانیان لە کار تەعلیق کراون. ئەم کردەوە سەرکەوتگەرانەیەی خاوەنکار بوو بەهۆی ئەوەیکە کرێکارانی مانگرتوو ڕۆژانی یەکشەممە سێهەم و دووشەممە چوارەمی مانگی بەفرانبار لەسەر درێژەی مانگرتن و ناڕەزایەتییان هەتا گەیشتن بە خواستەکانیان پێداگری بکەن. کرێکارانی گرووپی میللیی سەنعەتی فوولادی ئەهواز بە مانگرتن و ڕێپێوانی شکۆداری خۆیان کە دیمەنێک لە خەباتی ڕوو لە گەشەی کرێکارانە، وەرزێکی تازەیان لە ئیتحاد و هاوپشتی و خەبات بۆ پەیگیریی خواستەکانیان دەستپێکردووە. مانگرتنی کرێکارانی فوولادی ئەهواز و مانگرتنی باقیی ناوەندەکانی بەرهەمهێنان نیشانی دەدات کە لە جەرگەی بارودۆخی قەیراناویی کۆمەڵگا، گەشەی مانگرتن و ناڕەزایەتیی کرێکاران حەتمی و چارەهەڵنەگرە. چونکە نە ڕژیمی ئیسلامی وڵامێکی بۆ داخوازیی کەڵەکەکراوی کرێکاران هەیە و نە کرێکاران هیچ ڕێگایەکیان بۆ پاشەکشەکردن هەیە. پەرەسەندنی ناڕەزایەتی و مانگرتن و ڕاگرتنی بەرهەمهێنان لەئاستی گشتیدا، تەنها ڕێگای ڕزگاریی کرێکاران لەم بارودۆخە فەلاکەتبارەی ئێستایە.
شۆرای هاوکاریی هێزە چەپ و کۆمۆنیستەکان وێڕای پشتیوانی لە مانگرتن و خواستی ڕەوای کرێکارانی کارخانەی گرووپی میللیی فوولادی ئەهواز، جەماوەری کرێکار و زەحمەتکێش و هێزە پێشکەوتنخوازەکان بانگەشەی حمایەت لە مانگرتن و داخوازیی کرێکارانی فوولادی ئەهواز دەکات. شۆرا، قەدەغەکردنی چوونەژووری کرێکاران، هەموو جۆرەکانی هەڕەشە و دەرکردن و بەربەست نانەوە بەدژی کرێکارانی مانگرتووی فوولادی ئەهواز بەتوندی مەحکووم دەکات و خوازیاری گەڕانەوە سەر کاری دەستبەجێی هەموو کرێکارانی مەمنوعولورودە.
بڕووخێ ڕژیمی سەرمایەداریی کۆماری ئیسلامی
بژی ئازادی، بژی سۆسیالیزم!
٤ی بەفرانباری ١٤٠٢ – ٢٥ی دێسامبری ٢٠٢٣
واژۆکان: سازمانی ئیتحادی فیدائیانی کۆمۆنیست، ئیتحادی سۆسیالیستی کارگەری، حیزبی کۆمۆنیستی ئێران، حیزبی کۆمۆنیستی کارگەری – حێکمەتیست، سازمانی ڕاهی کاریگەر، سازمانی فەدائیان (ئەقەلیەت) و هەستەی ئەقەلیەت