مانگرتنی پەرستاران لە ١١ی گەلاوێژەوە دەستیپێکرد و بەخێرایی نەخۆشخانەکانی زیاتر لە پازدە شاری ئێرانی گرتنەوە. پەرستاران و بەگشتی کارمەندانی ناوەندە دەرمانییەکان زیاترین فیداکارییان لە سەردەمی پەتای کۆرۆنادا لە خۆ نیشان دا بەڵام ڕژیمی ئیسلامی بە هیچ کام لە خواستەکانیان وڵامی ئەرێنیی نەدایەوە. بۆ نموونە زیادکردنی حەقدەست، هەڵوەشاندنەوەی ئیزافەکاریی ئیجباری، پێدانی حەقدەستی دواخراو، کۆتایی هێنان بە هەڕەشە و دەستگیرکردنی پەرستارانی مانگرتوو لەلایەن ناوەندە ئەمنیەتییەکانەوە.
هاوئاهەنگیی پەرستارانی مانگرتووی نەخۆشخانەکان لە شارێک لەگەڵ شارەکانی دیکە و لە پارێزگا جۆراوجۆرەکان وەبیرهێنەرەوەی ڕێکخراوبوونی ناڕەزایەتی و مانگرتنی موعەلیمان و کرێکارانی پڕۆژەیی و مزگێنیدەری مانگرتنی سازماندراو و سەرتاسەری لە ڕشتەکانی دیکەی بەرهەمهێنان و خزمەتگوزارییە.
هێزەکانی سەرکوتی ڕژیمی ئیسلامی بە بانگکردن و هەڕەشەکردن لە پەرستارانی مانگرتوو و بە ڕەوانەکردنی مۆرەکانیان بۆ شکاندنی مانگرتن هەوڵ دەدەن بەربە تەشەنەکردنی ئەم مانگرتنە بۆ نەخۆشخانەکانی دیکە بگرن. داخوازیی پەرستاران بەتایبەت زیادکردنی حەقدەست داخوازیی هاوبەشی دەیان ملیۆن کرێکارە و زەمینەسازی هاوپشتیی بەرین لەگەڵ پەرستارانە.
مانگرتن لە ناوەندەکانی دەرمان بەهۆکاری دەورونەخشێک کە لە بواری تەندروستی و سڵامەتی خەڵکدا هەیانە ناتوانێ گشتی و درێژخایەن بێت و خاوەنکاران و دەوڵەتەکانیش بە کەڵک وەرگرتن لەم بابەتە بەردەوام هەوڵ دەدەن خەڵک دژبە مانگرتووانی ناوەندە دەرمانییەکان هان بدەن. خەڵکی ئێران مانگرتنی پەرستاران بە بەشێک لە خەباتی خۆیان لەدژی ڕژیمی ئیسلامی دەزانن و ئەمەش هۆکارێکی گرینگی شکشتهێنانی دەست و پەیوەندەکانی ڕژیمە لە هاندانی خەڵک دژبە پەرستارانی مانگرتوو. پشتیوانیی کرێکارانی بەشەکانی دیکەی بەرهەمهێنان و خزمەتگوزاری لە خواست و خەباتی پەرستاران ڕۆڵێکی سەرەکی لە سەرکەوتنی خەباتی پەرستاراندا دەبینێت. چونکە ئەوان هەروەک هاوکارانیان لە هەموو جیهان بەهۆی کەمکردنەوەی ئازار و پاراستنی گیانی خەڵک ناتوانن مانگرتنەکانیان درێژماوە بێت.
شۆرای هاوکاریی هێزە چەپ و کۆمۆنیستەکان خۆی بە هاوڕێ و هاوپەیمانی پەرستارانی مانگرتوو دەزانێت و بەش بە حاڵی خۆی بۆ پشتیوانیی هەرچی بەرینتر لە خواست و خەباتیان تێدەکۆشێت.
بژی هاوپشتیی کرێکاری
نەمێنێ ڕژیمی سەرمایەداریی کۆماری ئیسلامی
بژی ئازادی، بژی سۆسیالیزم
شۆرای هاوکاریی هێزە چەپ و کۆمۆنیستەکان
٢٥ی گەلاوێژی ١٤٠٣ی هەتاوی – ١٥ی ئاگۆستی ٢٠٢٤ی زایینی
واژۆکان: ئیتحادی سۆسیالیستی کارگەری، حیزبی کۆمۆنیستی ئێران، حیزبی کۆمۆنیستی کارگەری – حێکمەتیست، سازمانی ڕاهی کاریگەر، سازمانی فەدائیان (ئەقەلیەت) و هەستەی ئەقەلیەت