لە کاتێکدا لە دووهەمین ساڵیادی قەتڵی حکوومەتیی مەهسا ئەمینی (ژینا) نزیک دەبینەوە کە تووڕەیی و ناڕەزایەتیی جەماوەری کرێکار و زەحمەتکێش لەگەڵ خەباتی درەوشاوەی ژنان، زیندانییانی سیاسی، خوێندکاران، لاوان، ڕووناکبیران و هونەرمەندانی پێشکەوتنخواز و ئازادیخواز، بەرەو ئەو ئاراستەیە دەڕوات تا بیساتی ڕژیمی سەرمایەداری کۆبکاتەوە و بۆ هەمیشە بیخاتە زبڵدانی مێژووەوە.
لە ئاخێزی شۆڕشگێڕانەی ساڵی ١٤٠١ی هەتاویدا، جەماوەری وەگیانهاتوو لە سەرکوت، هەژاری، چەوسانەوە، بێکاری، توندوتیژی، هەڵاواردنی ڕەگەزی و بێمافیی تاکەکەسی و کۆمەڵایەتی، لە درێژەی ئاخێزەکانی بەفرانباری ٩٦ و خەزەڵوەری ٩٨ بۆ ماوەی چەندین مانگ ماشێنی سەرکوت و بێدادی ڕژیمیان خستە ژێر پرسیارەوە. ئەم ئاخێزە شۆڕشگێڕانەیە، بە دروشمی “ژن، ژیان، ئازادی” نەوەیەکی تێکۆشەر و فیداکاری لە ژنان و پیاوانی پڕ گڕوتین و خوازیاری ئازادی هێنایە مەیدانی خەباتی خەڵکی ئێران بۆ ڕووخاندنی شۆڕشگێڕانەی کۆماری ئیسلامی. ئەم بزووتنەوەیە لەماوەی چەند مانگدا هەموو هێماکانی دڕندەیی و بەربەرییەت و سیستەمی ئایدیۆلۆژیی دەسەڵاتی هەژاند و بە شێوەیەکی قەرەبوونەکراو زیانی بە ئیعتبار و دەسەڵاتی ئەم ڕژیمە گەیاند. ڕاپەڕینی شۆڕشگێڕانەی “ژینا” هێزە بورژواییەکانی داکۆکیکاری حکوومەتە مەورووسییەکان، چ لە جۆری “دیموکراتیک ئیسلامی” و چ سەڵتەنەتخوازی بە دروشمی وەک “مەرگ بۆ ستەمگەر، چ شا بێت و چ ڕێبەر” خستە ژێر پرسیاەوە و دروشمی فریوکارانە و بێناوەرۆکی ئەوانی ئاشکرا کرد.
لەماوەی دوو ساڵی ڕابردوودا، ڕژیمی کۆماری ئیسلامی سەرەڕای بەکارهێنانی ماشێنی سەرکوت و کوشتار، دەست بردن بۆ دژەئینسانیترین جەنایات، نەتەنیا نەیتوانیوە ئەم بزووتنەوەیە بەچۆک دابێنێ، بەڵکوو درێژە و گەشەی خەباتی ئازادیخوازانە و بەرابەری تەڵەبانەی خەڵک لە کارخانەکان، لە ناوەندەکانی پەروەردە و تەندروستی، لە ناوەندە سەنعەتییەکان و مەعدەنەکان، تێکۆشانی لێبڕاوانەی خانەنشینان و بێکاران، موقاومەت و خەباتی بوێرانەی زیندانییانی سیاسی و ژنان و هونەرمەندان و ڕووناکبیرانی بەڵێندار بە خەڵک، هەر هەموویان نیشانەی ئەوەیە کە زۆرینەی ڕەهای خەڵکی ئێران دژبەم ڕژیمە ئینسانکوژە بڕیاری خۆیان داوە و بە کەمتر لە ڕووخاندنی ڕازی نابن. لەم ڕووەوە، سیاسەتی سەرکوت و جەنایەتی ڕژیم بۆ نموونە ئێعدامی زیندانییانی سیاسی بەئامانجی پێکهێنانی کەشوهەوای ترس و تۆقاندن لە کۆمەڵگا بەتەواوی شکستی هێناوە و سەرەڕای هەموو ئەو خەسارە بەرینانەی لەم بزووتنەوەیەی داوە، نەیتوانیوە و لەمەش بەدوا ناتوانێ بەربە درێژە و گەشەی خەباتی شۆڕشگێڕانەی خەڵکی ئێران بگرێت.
بزووتنەوەی شۆڕشگێڕانەی ١٤٠١، ئەگەرچی گەلێک دەستکەوتی گرینگی بووە و بەردەوام بەشێوەی جۆراوجۆر درێژەی هەیە، بەڵام بەداخەوە بەهۆی خاڵە لاوازەکانی نەیتوانیوە ماشێنی سەرکوت و بەگشتی ڕژیمی کۆماری ئیسلامی زەمینگیر بکات. ئەم بزووتنەوەیە سەرەڕای فیداکاری و بێوێریی بێوێنەی ژنان و لاوان و باقیی جەماوەری وەگیانهاتوو، سەرەڕای بوونی ڕادەیەک پەیوەندی و ڕێکخستنی ناوخۆیی، بەهۆکاری ئەوەیکە نەیتوانی بەشێکی بەرینتر لە جەماوەری زەحمەتکێش بێنێتە مەیدانی خەباتەوە، و بەتایبەت بەهۆکاری بەشدارنەبوونی ڕێکخراوی بزووتنەوەی کرێکاری و هێزەکانی بزووتنەوەی کۆمۆنیستیی ئێران، نەیتوانی ئامانجی ئازادیخوازانە و عەداڵەتخوازانەی خۆی دەستەبەر بکات. تێگەیشتن و ئاگاداربوون لەم خاڵە لاوازە و خەبات بۆ چارەسەرکردنی، یەکێک لەو ئەزموونە بەنرخانەیە کە بە فیداکاری سەدان کەس لە گیانبەختکردووانی ئەم بزووتنەوەیە و بە زیندان و ئەشکەنجە و دوورخرانەوەی هەزاران کەسی تر بەدەست هاتووە.
شۆرای هاوکاریی هێزە چەپ و کۆمۆنیستەکان لە ساڵوەگەڕی بزووتنەوەی شۆڕشگێڕانەی ژینادا، وێڕای ڕێزلێنان لە یادی هەموو گیانبەختکردووانی ئەم بزووتنەوە مەزنە جەماوەرییە، پێویستیی پەیوەنددان و ڕێکخستنی هەرچی زیاتری خەباتی کرێکاران و باقیی بزووتنەوە کۆمەڵایەتییە ئازادیخواز و بەرابەری تەڵەبەکان، وە هەروەها هەوڵ بۆ پێکهێنانی ئاڵتێرناتیڤێکی سۆسیالیستی بۆ ڕووخاندنی شۆڕشگێڕانەی ڕژیمی سەرمایەداریی کۆماری ئیسلامی بە گرینگترین ئامانجەکانی خۆی دەزانێ.
لە دووهەمین ساڵیادی ئەم بزووتنەوە مەزنە شۆڕشگێڕانەیەدا داوا لە هەموو هێزێکی ئازادیخواز و تێکۆشەر و چەپ و سۆسیالیست دەکەین کە لەو بەرنامە ئیعتڕازییانەی کە بەم بۆنەوە ڕێکدەخرێن چالاکانە بەشداری بکەن.
بڕووخێ ڕژیمی سەرمایەداریی کۆماری ئیسلامی!
بژی ئازادی – بژی سۆسیالیزم!
شۆرای هاوکاریی هێزە چەپ و کۆمۆنیستەکان
واژۆکان: ئیتحادی سۆسیالیستی کارگەری، حیزبی کۆمۆنیستی ئێران، حیزبی کۆمۆنیستی کارگەری – حێکمەتیست، سازمانی ڕاهی کاریگەر، سازمانی فەدائیان (ئەقەلیەت) و هەستەی ئەقەلیەت
٢ی خەرمانانی ١٤٠٣ی هەتاوی
٢٣ی ئاگۆستی ٢٠٢٤ی زایینی