شەپۆلی کۆبوونەوەی ناڕەزایەتی و مانگرتنی پەرستاران و کادری تەندروستی و دەرمان لە زیاتر لە دەیان شار و ناوچەی ئێران بەشێوەیەکی بێوێنە و ڕوو لە گەشە هەروا لەئارادایە. پەرستاران و کادری دەرمان کە لە قەیراناویترین قۆناغەکان بۆ نموونە لە قۆناغی پەتای کۆرۆنادا لەپێناوی پاراستنی سڵامەتی کۆمەڵگا بە گیان و بە دڵ خزمەتیان بە خەڵکی بێبەش و مەحرووم کردووە، لەئێستادا بەناچار بەخاتری شێوازی ژیان و گوزەرانیان، ڕێگایەک بێجگەلە مافخوازی و ناڕەزایەتی لەسەر شەقامەکان نابینن. ئاستی بەرینی چەوسانەوە و هەڵاواردن و ستەم لە شوێنی کار بێداد دەکات و ئاکامە دڵتەزێنەکانی لەوانە سوانەوەی جەستە و دەروون، خوکوژیی، کۆچکردنی لەڕادەبەدەری پەرستارانی شارەزا، چەند کار پێکەوە کردن و شۆفیریی ئیسنەپ، بووەتە بابەتێکی ئاسایی! گوشاری بارودۆخی سەخت و زیانباری کار و شیفتی دوورودرێژ، ئیزافەکاریی ئیجباری لە بری حەقدەستێکی یەکجار کەم و بێ بایەخ (سەعاتی ٢٠ هەزار تمەن)، ئیسلاح نەکردنی تەعرەفەگوزاریی عادڵانە، پێنەدانی کارانە و دواخستنی خزمەتگوزارییەکانی دیکە و ئاستی لەخوارێی حەقدەستی لانیکەم، هاوشێوەی کاردێک چووەتە ئێسقانی نیزامی پەرستاریی کۆمەڵگاوە. بەشێکی گەورەی پەرستاران لە ژنان پێکهاتووە کە هەروەک هەموو بوارەکانی دیکە ستەم و چەوسانەوەی چەند بەرابەریان بەسەردا سەپاوە و لە هەمووان زیاتر لەسەر کار دەردەکرێن و کاری گرێبەستیان پێدەکرێ. هەتا کاتێک بارودۆخی کار و گوزەرانی ئەم بەشە لە زەحمەتکێشان بەم شێوەیە بێت، سیستمی دەرمان و تەندروستی کۆمەڵگا کە خۆی بووەتە کاڵا، خەڵکی دەردمەند زیاتر لە ڕابردوو بەرەو مەرگ و نابوودی دەبات.
داخوازیی کۆمەڵگەی پەرستاران تەنیا پێدانی حقووقی دواخراو نییە!
پەرستاران خوازیاری باشترکردنی ژیانی خۆیانن:
باشترکردنی ژیان و گوزەران لەڕێگەی گونجاندنی تایبەتی ئەم بابەتە لە یاساکاندا، ئیسلاحی تەعرەفەگوزاری خەدەماتی پەرستاری، گەڕانەوە بۆسەر کاری هێزی کاری تەرحی (سەردەمی کۆرۆنا)، لابردنی ئیزافەکاریی ئیجباری و ئیسلاحکردنی حەقدەستی پەیوەندیدار بە ئیزافەکاری، بەڕێوەبردنی بەخشنامەی ڕفاهیات و جێبەجێکردنی یاسای کارە سەخت و زیانبارەکان.
زۆرێک لەم خواستە مەعیشەتی و مۆزدی و ڕفاهییانە، داخوازی و خەباتی هاوبەشی ئێمە کرێکاران، موعەلیمان، خانەنشینان و باقیی جەماوەری کرێکار و زەحمەتکێشە و وەدیهاتنیان لە گرەوی ناڕەزایەتی یەکگرتووانەمان دژبە سیاسەتە زاڵەکان بەسەر کۆمەڵگادایە. سڵاو و دروود دەنێرین بۆ ئێوە هاوچارەنووسانی پێداگر و ماندوویی نەناس کە بە کۆبوونەوەی بەردەوامی ناڕەزایەتی و مانگرتنی خۆتان، شەقام و شوێنی کارتان سەرەڕای هەموو جۆرەکانی هەڕەشە و هێرش و گرتن و سەرکوت، کردووەتە گۆڕەپانی خەبات. هاوپشتیی خۆمان لەگەڵ ئێوە دەردەبڕین و پشتیوانی لە خەبات و هاواری ڕەواتان دەکەین.
کرێکار، موعەلیم، پەرستار، یەکگرن یەکگرن
٣ی خەرمانانی ١٤٠٣ی هەتاوی
سەندیکای کرێکارانی نەیشەکەری حەوت تەپە
کۆمیتەی هاوئاهەنگی بۆ یارمەتیدان بە پێکهێنانی ڕێکخراوە کرێکارییەکان
گرووپی یەکیەتیی خانەنشینەکان
کرێکارانی خانەنشینی خووزستان