بەدوای بانگهێشتی “شوڕای ڕێکخستنی ناڕەزایەتیی کرێکارانی پەیمانی سەنعەت نەوت” لە ڕۆژی ٣٠ی جۆزەردان، ڕۆژ سێشەممە یەکی پووشپەڕ مانگرتنی سەرتاسەری کرێکارانی پەیمانی و پڕۆژەیی سەنعەت نەوت دەستی پێکرد. شوڕای ڕێکخستنی ناڕەزایەتیی کرێکارانی پەیمانی نەوت، لەڕێگەی ئەم بانگەوازەوە ڕایگەیاندووە: “ئێمە کرێکارانی پەیمانی نەوت لە پاڵاوگاکان، پێترۆشیمییەکان و وزەخانەکان لە ئێعتڕاز بە ئاستی لەخوارەوەی حەقدەستەکان و دابەزینی ڕۆژ لەگەڵ ڕۆژی توانای کڕینی پێداویستییەکانی ژیان و هەروەها بەکردەوە دەرنەهاتنی بەڵێنەکان، درێژە بە مانگرتنی بەربڵاو و سەرتاسەری خۆمان دەدەین و بە کۆبوونەوە لە بەرامبەر شوێنی کارەکەمان، پەیگیری مۆتاڵباتەکانمان دەبین.” شوڕای ڕێکخستنی ناڕەزایەتیی کرێکارانی پەیمانی نەوت هەروەها ڕایگەیاندووە: “مانگرتنی ئێمە تەنیا بە مەبەستی هوشدار دانە و بۆ ماوەی یەک حەفتە بەردەوام دەبێ و لە ڕۆژی ٩ی پووشپەڕ، پەیوەست دەبین بە ڕیزی هاوکارەکانمان کە لە ئێستادا لە ناڕەزایەتیی بە جێبەجێ نەکرانی خواستەکانیان دەستیان لەکار کێشاوەتەوە.”
هاوکات کرێکارانی پەیمانی و پڕۆژەیی سەنعەت نەوت و پێترۆشیمی لەسەر بڕیاری گشتی، داخوازییەکانی خۆیان بەمجۆرە ڕاگەیاندووە.
١.حەقدەستی هیچ کرێکارێکی شاغڵ لە سەنعەت نەوت نابێ کەمتر لە ١٢ ملیۆن تمەن بێ و دەبێ دەستبەجێ ئاستی حەقدەستەکان بچێتەسەرێ و بە پێی قیمەتی کالاکان کە ڕۆژ لەگەڵ ڕۆژ دەچێتەسەرێ، حەقدەستی کرێکارانیش زیاد بکرێ. هەروەها ئاستی مەزایای کرێکاران دەبێ بە پێی ڕێککەوتن لەگەڵ نوێنەرانی هەڵبژێردراوی کرێکاران دیاری بکرێت.
٢.دواخستنی حەقدەستەکان تاوانە و بە دزی دێتە ئەژمار و حقووقەکان دەبێ هەموو مانگێک لەکاتی خۆیدا پەرداخت بکرێ.
٣.ئێمە لەئاست ئەنجام دانی کاری کاتی و پەیمانی ناڕازیین و خوازیاری کورت کردنەوەی دەستی پەیمانکاران، دابین کردنی ئەمنییەتی کاری و هەمیشەیی بوونی گرێبەستەکانمانین. هەروەها دەرکردنی کرێکاران بەهەر بیانوویەک قەدەغەیە و دەبێ ڕابگیرێت.
٤.یاسا دژە کرێکارییەکانی ناوچەی تایبەتی ئابووری کە پەرژینێکە لە نێوان ئێمە و بەشەکانی دیکەی کرێکاری لەئاستی کۆمەڵگا و بە پێی ئەم یاسایانە، کارفەرماکان دەستیان ئاواڵاترە بۆ دەست درێژی کردنە سەر ژیان و گوزەرانی ئێمە، دەبێ دەستبەجێ هەڵوەشێندرێنەوە.
٥.ئێمە کرێکارانی سەنعەت نەوت لەئاست بە ئەمنییەتی بوونی شوێنی کارەکەمان ناڕازیین و دەبێ ئەم بارودۆخە کۆتایی پێ بێت.
٦.پێکهێنانی ڕێکخراوی سەربەخۆی کرێکاری، بەڕێوەبردنی کۆبوونەوە، ناڕەزایەتیی و مانگرتن مافی سەلمێنراوی ئێمەیە.
٧.ئێمە خوازیاری دابین کردنی دەرمان و خوێندنی خۆڕایی بۆ هەموو خەڵکی ئێرانین.
کرێکارانی پەیمانیی و پڕۆژەیی سەنعەت نەوت و پێترۆشیمی لە کۆتاییدا، لێبڕاوانە پشتیوانیان لە کرێکارانی ڕەسمی شیرکەت نەوت کردووە. مانگرتنی سەرتاسەری کرێکارانی پەیمانی و پڕۆژەیی سەنعەت نەوت و پێترۆشیمی لە بارودۆخێکدا دەستی پێکردووە کە شەپۆلی دووهەمی مانگرتن و کۆبوونەوەی ناڕەزایەتیی کرێکارانی ڕەسمی سەنعەت نەوت لە ڕێکەوتی ٥ی جۆزەردانی ئەمساڵ کە پاڵاوگاکانی، تاران، ئەهواز، ئابادان و چەندین ناوەندی دیکەی گرتبووەوە دەستی پێکردووە. کرێکارانی ڕەسمی نەوت لە ناڕەزایەتیی بە شێوازی بردنەسەرێی ئاستی حەقدەستەکان لە ساڵی ١٤٠٠ و پەیگیری مەزایاکانیان بە درووشمی “بترسێن، بترسێن، ئێمە هەموو پێکەوەین”، کۆبوونەوە و ئێعتڕازاتی خۆیان دەست پێکردووە.
مانگرتنی سەرتاسەری کرێکارانی پەیمانی و پڕۆژەیی سەنعەت نەوت و پێترۆشیمی و ڕاگەیاندنی لێبڕاوانەی پشتیووانی لە داخوازی کرێکارانی ڕەسمی شیرکەت نەوت، بە گۆڕانکارییەکی گرینگ لە بزووتنەوەی کرێکاری ئێران دێتە ئەژمار. ئەوەیکە ئاشکرایە، لە لایەکەوە لایەنەکانی هەژاری و چارەڕەشی ئابووری، حەقدەستی خوارتر لە هێڵی هەژاری و بارودۆخی دژواری کار و ژیان و لە لایەکی دیکەوە، کەشی چەقبەستووی سیاسی ئێران، بواری ڕاستەقینە و زەینیی بۆ یەکگرتوویی و هاوپشتی کرێکارانی ڕەسمی و کرێکارانی پەیمانی و هەروەها پڕۆژەیی سەنعەت نەوت و پێترۆشیمییەکان، سەرەڕای جیاوازی لە نێوان گرێبەست و حقووق و مەزایاکانیان، پێکهێناوە. کرێکارانی سەنعەت نەوت زیاتر لە سێ دەیەیە لە لایەن کۆماری ئیسلامییە بە مەبەستی بە هەرزان کردنی هێزی کاریان، هێرش دەکرێتە سەریان و لەهێڵی پێشەوەی ئەم هێرشە دان. لە ماوەی چەند ساڵی ڕابردوودا، پرۆسەی جیایی کارانەی بە کارمەند کردنی کرێکارانی سەنعەت نەوت، سەندنەوەی ئیجباری، سیاسەتی بێکارسازیی لەم سەنعەتە، سپاردنی بەشێکی زۆر لە چالاکیی و کارەکانی سەنعەت نەوت بە شیرکەتە پەیمانکارییەکان و چاودێری توندی سپای پاسداران بەسەر کرێکاران لەم ناوەندە سەنعەتییە، بارودۆخێکی زۆر دژواری بەسەر ئەم کرێکارانەدا سەپاندووە.
لەم ڕوانگەیەوەیە کە مانگرتنی یەکدەست، هاوئاهەنگ و سەرتاسەری کرێکارانی پەیمانی و پڕۆژەیی سەنعەت نەوت و پێترۆشیمی و ڕاگەیاندنی هاوپشتی ئەوان لەگەڵ کرێکارانی ڕەسمی سەنعەت نەوت، بە گۆڕانکارییەکی هیوابەخش لە بزووتنەوەی کرێکاری ئێران دێتە ئەژمار. کرێکارانی سەنعەت نەوت بە بەڕێوەبردنی مانگرتنی یەکدەست و یەکگرتووانەی خۆیان، ڕێگای ڕێکخستن و بەڕێوەبردنی مانگرتنی سەرتاسەری نیشان دەدەن. پێویستە بوترێ کە بزووتنەوەی کرێکاری ئێران تەنیا لەڕێگەی مانگرتنی سەرتاسەرییە کە دەتوانێ پاشەکشە بە هێرشی هەمەلایەنەی کارفەرماکان و دەسەڵاتی سەرمایەداریی پشتیوانیان بۆ سەر کار، ژیان و گوزەرانیان بکات. هەتا ئێستا سەندیکای کرێکارانی نەیشەکەری هەفت تەپە و کۆمەڵێک لە کرێکارانی هەفت تەپە لە ڕێگەی چەندین ڕاگەیاندنەوە، پشتیوانی خۆیان لە مانگرتن و داخوازای کرێکارانی سەنعەت نەوت ڕاگەیاندووە.
حیزبی کۆمۆنیستی ئێران وێڕای پشتیوانی لە مانگرتنی سەرتاسەری کرێکارانی پەیمانی و پڕۆژەیی سەنعەت نەوت و پێترۆشیمی و هەروەها داخوازی ڕەوای ئەوان، بانگهێشت لە بەشەکانی دیکەی بزووتنەوەی کرێکاری ئێران دەکات کە بەهەر جۆرێک کە بۆیان دەڕەخسێت، پشتیوانی لە مانگرتن و خەباتی کرێکارانی سەنعەت نەوت و پێترۆشیمی بکەن.
بڕووخێت ڕژیمی کۆماری ئیسلامی
بژی ئازادی، بەرابەری، حکوومەتی کرێکاری
کومیتەی ناوەندی حیزبی کۆمۆنیستی ئێران
٢ی پووشپەڕی ١٤٠٠
٢٣ی ژۆئەنی ٢٠٢١