خەبات بۆ هەڵوەشاندنەوەی سزای ئێعدام و ئازادیی زیندانییانی سیاسی بکەینە بزووتنەوەیەکی بەهێزی کۆمەڵایەتی
لەدوای شکستی شانۆکانی ئینتخابات و تیرۆری ئیسماعیل هەنییە لەلایەن دەوڵەتی ڕەگەزپەرستی ئیسرائیل لە تاران کە بووە هۆی شەرمەزاری و سەرشۆڕیی بەرینی کۆماری ئیسلامی، سەرانی ڕژیم بەئامانجی بەرەنگاربوونەوە لەگەڵ ئاکامەکانی ئەم شکستانە و پەرەپێدانی کەشوهەوای ترس و تۆقاندن لە کۆمەڵگا، ماشێنی ئێعدامیان خێراتر کردووەتەوە. تیرۆری هەنییە لە تاران بۆ جارێکی تر هاتوهاواری ڕژیمی سەبارەت بە “ئیقتداری کۆماری ئیسلامی” بۆ جەماوەری خەڵک لە ناوەوە و دەرەوی ئێران پووچەڵ کردەوە و پێگەی ناوچەیی ڕژیمیشی زیاتر لە ڕابردوو لاواز کرد. کۆماری ئیسلامی نیگەران لە سەرهەڵدانی ناڕەزایەتیی جەماوەری لەدژی گرانی و هەژاری و نەهامەتیی ئابووری و لەدژی سیاسەتی شەڕخوازانەی ناوچەیی، دەستی کردووە بە پەرەپێدانی سەرکوت و شەپۆلی ئێعدامی زێندانییانی بێدیفاع. هەڵبەت ئەوە یەکەم جار نییە کە ڕژیمی ئیسلامی بە دوای شکستی سیاسەتە سەرەکییەکانی، هێرش دەکاتە سەر گیانی زیندانییان و خوێنیان دەکاتە وەسیقەی درێژەدانی دەسەڵاتە نگریسەکەی.
ڕژیمی کۆماری ئیسلامی بە ئاگاداربوون لە بۆشایی و دوژمنایەتیی قووڵ لە نێوان حکوومەت و جەماوەری خەڵک، باش دەزانێ کە لەسەر چ دەریایەک لە نەفرت و بێزاریی خەڵکی ستەمدیدە حکوومەت دەکات. دەزانێ کە هەموو ساتێک ئەگەری ئەوە هەیە تەقینەوەیەکی مەزنی کۆمەڵایەتی ڕوو بدات و دەسەڵاتی دیکتاتۆری و هەژاری و برسیەتی بە ڕەگ و ڕیشەوە هەڵکەنێ. هەربۆیە بەئامانجی پێکهێنانی ترس و نائەمنی لە کۆمەڵگا، بە کەڵک وەرگرتن لەو فەزا جەنگییەی کە ئێستا پێکهاتووە، سەرکوت و ئێعدامی زیندانییانی پەرەپێداوە. لەماوەی یەک حەفتەی ڕابردوودا بەرەبەیانیی ڕۆژی شەممە ١٣ی مانگی گەلاوێژ حکوومەتی ئیسلامی سێ بەندکراوی لە زیندانی عادڵ ئابادی شیراز ئێعدام کرد. ڕۆژی ١٦ی گەلاوێژ ڕەزا ڕەسایی لە دەستبەسەرکراوانی بزووتنەوەی شۆڕشگێڕانەی ژینای لە زیندانی ناوەندیی کرماشان و چوار زیندانیی دیکەی لە بەندەرعەباس و سەبزەوار ئێعدام کرد. ڕۆژی ١٧ی مانگی گەلاوێژ، لە زیندانی قزڵحەسار و زیندانی ناوەندیی کەرەج، حکوومەتی ئیسلامی گیانی ٢٩ ئینسانی دیکەشی گرت. ڕۆژی هەینی ١٩ی مانگی گەلاوێژیش دیوانی باڵای ڕژیم حوکمی ئێعدامی ٦ زیندانیی دیکەی لە مەشهەد پشتڕاست کردەوە. بەپێی ئامارە بڵاوکراوەکانی ڕژیمی ئیسلامی لەماوەی حەوت مانگی ڕابردوودا زیاتر لە ٣٠٠ کەس ئێعدام کراون کە ژمارەیەکی زۆریان کورد، بەلووچ و پەنابەری ئەفغانستانی بوون. لەم ماوەیەدا ئێعدام و دەستبەسەرکردنی ژنانیش بەشێوەیەکی بێوێنە زیادی کردووە تا جێیەک کە لەم ژمارەیە لە ئێعدامکراون ١٥ کەسیان ژن بوون. ڕژیمی ئیسلامی بە دەرکردنی حوکمی ئێعدام بۆ چالاکانی ئەم بزووتنەوەیە، لەوانە شەریفە محەممەدی، پەخشان عەزیزی، وریشە مۆرادی و نەسیم غوڵامی سیمیاری، بۆ جارێکی دیکە زەبوونی و داماویی خۆی لە بەرامبەر بزووتنەوەی ژناندا نیشاندا. هەروەها لەماوەی حەفتەی ڕابردوودا سێ بەندکراوی دیکەی خەڵکی بۆکان لە دادگایەک لە ورمێ بە تۆمەتی خۆرافیی “بەغی” دادگایی کران.
پەنابردنی حکوومەتی کۆماری ئیسلامی بۆ سیاسەتی ئێعدامکردنی زیندانییانی خەباتکار و بێدیفاع لەناو زیندانەکان نەک نیشانەی هێز و دەسەڵات بەڵکوو نیشانەی ئەوپەڕی داماوی و بێتوانایی ڕژیمە. حوکمەکانی ئێعدام لە بێدادگاکانی کۆماری ئیسلامی بە فەرمانی کاربەدەستانی دەزگا ئەمنییەکان و بە بێ بوونی هیچ دەلیل و بەڵگەیەک تەنها بە وەرگرتنی ئیعترافی ئیجباری لەژێر ئەشکەنجەی وەحشیانەدا دەردەکرێت. ئەم حوکمە سیاسییانە لە ڕوانگەی ڕژیمی پرتووکاوی ئیسلامییەوە لە خزمەت درێژەی دەسەڵاتەکەیدایە. چونکە خۆی باش دەزانێ کە هەر پاشەکشەیەک لە بەرامبەر بزووتنەوە کۆمەڵایەتییەکان دەبێتە هۆی پەرەستاندنی زیاتری ناڕەزایەتیی جەماوەری لەدژی حکوومەت. بەڵام ئەم ئێعدامانە نەتەنیا نەبوونەتە هۆی ترس و وەحشەت لەناو کۆمەڵگا بەڵکوو عەزم و ئیرادەی کرێکاران و جەماوەری وەگیانهاتوو لە دەسەڵاتی کۆماری ئیسلامی لە خەبات بۆ ڕووخاندنی ڕژیم قایمتر دەکات. لەئێستادا ژنانی تێکۆشەر، زیندانەکانی کۆماری ئیسلامیشیان کردووەتە گۆڕەپانی خەبات لەدژی سزای ئێعدام. هەڵمەتی سێشەممەکانی نا بۆ ئێعدام، کە ئێستا پێی ناوەتە ٢٩هەمین حەفتەوە، لە زیاتر لە ١٨ زیندانی شارەکانی ئێران بەردەوامە.
حکوومەتی ئیسلامی کە لە قەیرانی پێکهاتەیی و ڕیشەیی سیاسی، ئابووری، کۆمەڵایەتی و ئایدیۆلۆژیدا گرفتارە، بەرەوڕووی داخوازیی کرێکاران و باقیی توێژەکانی کۆمەڵگا بووەتەوە و توانای وڵامدانەوەی بە هیچکامیان نییە، زیاتر لە ڕابردوو لاواز و بێ پایە بووە. ئەم ڕژیمە کە هەتا ئێستا جگە لە هەژاری و بێکاری و برسیەتی و شەڕ و کوشتار، ئیستبداد و زەبروزەنگ و نائەمنی، ئێعدام و زیندان و ئەشکەنجە، هیچ دەستکەوتێکی دیکەی بۆ خەڵک نەبووە، تەمەنی کۆتایی هاتووە. دانانی رێفۆرمخوازێکی ملکەچ و خزمەتکاری ویلایەت لەسەر کورسیی سەرۆک کۆمار، نەتەنها ناتوانێ وەهم و خۆشباوەڕی لەناو خەڵک نیسبەت بە ڕژیم دروست بکات، بەڵکوو ناکۆکی و ململانێی نێوان باندەکانی دەسەڵات توندتر دەکاتەوە.
لە وەها بارودۆخێکدا پێویستە ئاڵای خەبات بۆ هەڵوەشاندنەوەی سزای ئێعدام و ئازادیی بێ شەرت و مەرجی زیندانییانی سیاسی بەرز بکەینەوە و یەکگرتوو و یەکپارچە بێینە مەیدان. ئێعدام بە ئامانجی سیاسی و بە هەر پاساوێکەوە ئەنجام بدرێ کوشتنی بەئانقەستی دەوڵەتییە و توندوتیژی لەئاستی کۆمەڵگادا پەرەپێدەدات و پێویستە لەڕێگەی بزووتنەوەیەکی کۆمەڵایەتیی بەهێزەوە بۆ هەمیشە هەڵوەشێتەوە. بزووتنەوەی شۆڕشگێڕانەی کوردستان کە خەڵکی ئێران لە بزووتنەوەی شۆڕشگێڕانەی ژینادا بە “چاو و چرای ئێران” وەسفیان کرد وەک پایەیەکی قایمی هەر ئاڵوگۆڕێکی شۆڕشگێڕانە لە ئێران پێویستە لەم ڕاستایەشدا دەورونەخشی خۆی لە خەبات دژبە سزای ئێعدام و لە هاوپشتی لەگەڵ باقیی بزووتنەوە کۆمەڵایەتییەکان لەئاستی سەرتاسەری بۆ ڕووخاندنی کۆماری ئیسلامی بەجێ بێنێت.
بڕووخێ ڕژیمی سەرمایەداریی کۆماری ئیسلامی
بژی ئازادی، بەرابەری، بژی دەسەڵاتی شۆرایی خەڵک لە کوردستان
کۆمیتەی ناوەندیی کۆمەڵە – ڕێکخراوی کوردستانی حیزبی کۆمۆنیستی ئێران
٢١ی گەلاوێژی ١٤٠٣
١١ی ئاگۆستی ٢٠٢٤