یەکی ئەیار بەڕێوەیە، کرێکارانی ئێران ئەمساڵ لە بارودۆخێکدا بەرەو پێشوازی یەکی ئەیار ڕۆژی هاوپشتی جیهانیی خۆیان دەچن کە کار و ژیانیان بەهۆی کاریگەرییەکانی قەیرانی ئابووری و پەرەسەندەی کۆرۆنا، لە بارودۆخێکی زۆر دژوار دایە. چوونەسەرەوەی نرخی ئاوسان و قیمەتی پێداویستییەکانی ژیانی خەڵک و بە یاسایی کردنی حەقدەستی چوار قات ژێر هێڵی هەژاری، دابین کردنی هەزینەی بەڕێوەچوونی گوزەرانی بنەماڵە کرێکارییەکانی زۆر دژوار کردووە. لە همان حاڵدا درێژەی ڕەوتی داخرانی شیرکەت و ناوەندەکانی بەرهەمهێنان، بووەتە کارەساتێکی کۆمەڵایەتی و بێکاربوونی بە هەزاران کرێکار. ئەرزشی دراوی ئێران لە بەرامبەر دۆلاری ئەمریکا لە ماوەی یەک ساڵی ڕابردوودا، نزیکەی ٦٠ لەسەد دابەزیوە و ئەمەش بووەتە هۆی ئەوەیکە توانای کڕینی کرێکاران بێتە خوارەوە. لەژێر کاریگەری ئەم پێوەرە ئابوورییانە، دیاردەی بەدخوراکی، برسییەتی و ژیان کردن لەژێر هێڵی هەژاری، بووەتە ڕەوتێکی ئاسایی. لە لایەکی دیکەوە بڵاوبوونەوەی ویرووسی کۆرۆنا و بێ توانایی ڕژیم لە کۆنتڕۆڵ کردنی، کۆمەڵگای ئێرانی لەگەڵ یەکێک لە بێ وێنەترین قەیرانەکانی بێهداشتی و کۆمەڵایەتی بەرەوڕوو کردووەتەوە کە لە ئاکامی دا، بە سەدان هەزار کەس گیانیان لە دەست داوە. سەرهەڵدانی ئەم بەڵا سرووشتییە و پێشبینی کراوە جارێکی دیکە نیشانی دا، نیزامی سەرمایەداریی بە لەناو بردنی ژینگە و لاواز کردنی ژێرخانی بێهداشتی و دەرمانی و هەروەها خستنە مەترسی گیان و تەندرووستی مرۆڤەکان، بواری بۆ ئەم نەخۆشییە مەرگهێنەر ڕەخساندووە. ئەوە نیزامی سەرمایەداریی و دەوڵەتەکانی پشتیوانییەتی کە لە نێوان پاراستنی بەرژەوەندی و ڕزگار کردنی گیانی مرۆڤەکان، بەرژەوەندی و کەڵەکە کردنی قازانجی خستووەتە ئەولەوییەتی خۆیانەوە. لەم بەینەدا ڕژیمی گەندەڵ و دژە کرێکاری کۆماری ئیسلامی لە سەپاندنی ئەم بارودۆخە نائینسانییە، لە هەموو دەوڵەتەکانی دیکەی سەرمایەداریی پێشی گرتووە.
بەڵام چینی کرێکاری ئێران نە تەنیا گوێڕایەڵی ئەم بارودۆخە نائینسانییە نەبووە، بەڵکوو بەهۆی کەڵەکە بوونی مۆتاڵباتەکانیان و بەردەوام بوونی ناڕەزایەتییەکانیان، لە سەرەوەی خەبات بۆ گۆڕینی دۆخی ئارایی قەراری گرتووە. مانگرتن و ناڕەزایەتیی شکۆداری کرێکارانی نەیشەکەری هەفت تەپە، سەنایعی نەوت و پێترۆشیمی، ڕێگای ئاسن و ناڕەزایەتیی بەردەوام و سەرتاسەری خانەنشین کراوان، مۆعەلیمان و پەرەستاران، تەنیا چەندین نموونەی بەرچاوی ئەم بزووتنەوە ئێعتڕازی و مۆتاڵباتییەیە. ئەم کۆبوونەوانە وێنای شکۆداری خەباتی چینی کرێکارە کە هەموو ڕۆژێک ژمارەیەکی زیاتر پێوەی پەیوەست دەبن. مانگرتنەکان، هێزی یەکگرتووییان بە کرێکاران نیشان داوە و فێریانی کردووە کە چۆن لە بەرامبەر هێرش بۆ سەر ژیان و گوزەرانیان، بە دەربڕینی ناڕەزایەتیی وەڵام بدەنەوە، کرێکارێکی سازمان دراو دەتوانێ تا چ ڕادەیەک بۆ سەرمایە مەترسی دار بێت. بارودۆخی ئابووری و کۆمەڵایەتی و ڕەوتی ڕووداوەکان لە ئێران بە جۆرێکە کە بەدەست هێنانی وشیاری بەربڵاو لەناو جەماوەری کرێکاری حەتمی کردووە. لەم بارودۆخەدا دەبێ بۆ ڕێکخستنی ڕیزی کرێکاران و ئامادە کردنیان بۆ خەباتی یەکلاکەرەوە، ئەوپەڕی تێکۆشانی خۆمان بەکار بێنین.
بۆ بەرەوپێش بردنی ئەم کارە گرینگە دەبێ پشت بە بزووتنەوەی مۆتاڵباتی ئێستا ببەستین. چونکە چینی کرێکار وەک هێزێکی کۆمەڵایەتی لە ڕەوتی ئەم بزووتنەوە و حەرەکەتە دایە کە دەتوانێ بۆ زاڵبوون بەسەر خاڵە لاوازەکانی، هەل پێکبێنێت. کرێکاران لە ڕەوتی ئەم خەباتی ڕۆژانە و ڕووبەڕوو بوونەوەیان لەگەڵ کارفەرما و دەوڵەت دایە کە بە وشیاری جەمعی سەبارەت بە پێگەی کۆمەڵایەتی خۆیان لە خەباتی سیاسی دەگەن و خۆیان وەک چینێک ئامادە دەکەن و بۆ بەرگری کردن لە بەرژەوەندییەکانیان ڕادەپەڕن. ئەگەر یەکێک لە خاڵە لاوازەکانی بزووتنەوەی کرێکاری نەبوونی ڕێکخراوی چینایەتی و جەماوەری و هەروەها نەبوونی ڕێبەرییەکی سەرتاسەرییە، بزووتنەوەی ئێعتڕازی کرێکاران بەستێنێکی گونجاو و کاریگەرە بۆ زاڵ بوون بەسەر ئەم خاڵە لاوازانەدا. لەماوەی چەند ساڵی ڕابردوودا و لەناو دڵی ئەم بزووتنەوە ئێعتڕازییەی کرێکاران، نەوەیەک لە هەڵسووڕاوان و ڕێبەرانی کرێکاران پەروەردە کراون و هاتوونەتە مەیدانی موبارزەوە. ئەم هەڵسووڕاوانە ڕۆڵێکی گرینگیان لە بەڕێوەبردن و ڕێکخستنی مانگرتن و ناڕەزایەتیی کرێکاران هەبووە. بەڕێوەبردنی ناڕەزایەتیی درێژ ماوە و یەک لەدوای یەکەکان، نیشان دەدات کە چینی کرێکار لەبواری ڕێکخستنی ئەم ناڕەزایەتییانە پێشڕەفتێکی زۆری کردووە. کرێکاران لە ئەنجامی ئەم مانگرتن و ناڕەزایەتییانە و هەروەها ڕووبەڕوو بوونەوە لەگەڵ کارفەماکان و دەوڵەت بەم ڕاستییە دەگەن کە بۆ گەیشتن بە ژیانێکی ئینسانی، پێویستە نە تەنیا کۆماری ئیسلامی، بەڵکوو لە پێوەندییەکانی سیاسی و چینایەتی نیزامی سەرماریەدایی تێپەڕبن.
لە ماوەی چەندی ساڵی ڕابردوودا، چینی کرێکار بە شێوەی بەرچاو و زیاتر لە جاران، لە مانگرتن و ناڕەزایەتییەکان بۆ گوشار خستنە سەر کۆماری ئیسلامی وەک ئامرازێکی سیاسی کەڵکی وەرگرتووە و بەردەوام هاوسەنگی هێزی لە بەرژەوەندی بزووتنەوە ناڕەزایەتییەکان و بەدژی کۆماری ئیسلامی گۆڕیوە. چینی کرێکار لەم ڕێگەیەوەیە بزووتنەوەی ڕووخانی کۆماری ئیسلامی بەرەو پێش دەبات و لە بەرژەوەندی بەرەی چەپی کۆمەڵگا بەهێزی دەکات. بە جۆرێک کە بە بێ گەشەی بزووتنەوەی ئێعتڕازی کرێکاران لە ماوەی چەند ساڵی ڕابردوودا و کاریگەرییەکانی لەسەر بیروڕای کۆمەڵگا، بەڕێوەچوونی ڕاپەڕینەکانی بەفرانباری ساڵی ٩٦ و خەزەڵوەری ٩٨ بەهیچ جۆرێک وێنا نەدەکرا.
لە بارودۆخێکدا کە ڕژیمی کۆماری ئیسلامی لە لایەکەوە بە سەپاندنی حەقدەستی چەند قات خوارتر لە ژێر هێڵی هەژاری و شەپۆلی بێکارسازییەکان و لە لایەکی دیکەوە بە هۆی کەمتەرخەمی لەئاست دابین نەکردن و ڕادەست نەکردنی ڤاکسێنی خۆڕایی، گیان و ژیانی خەڵکی بەدیل گرتووە. پێویستە خواستی حەقدەستی گونجاو لەگەڵ دابین کردنی هەزینەی ژیانێکی ئینسانی بۆ سەرجەم کرێکارانی شاغڵ و خانەنشین کراو، دابین کردنی بێمەی بێکاری بۆ هەموو کرێکارانی بێکار و هەروەها خواستی دابین کردن و ڕادەست کردنی ڤاکسێنی خۆڕایی و ئازادی بێشەرتومەرجی هەڵسووڕاوانی کرێکاری و سەرجەم بەندکراوانی سیاسی لە بڕیار نامەی یەکی ئەیار لە لیستی سەرەوەی خواستەکانی چینی کرێکاردا بهێندرێت. وەرن بەپێی نەریتی هەموو ساڵێک بە هێنانە گۆڕی داخوازی و جەخت کردنەوە لەسەر خواستی ئازادی خوازانەی کرێکاران، ئێرادەی خۆمان لە خەبات لەدژی هەژاری و هەڵاواردن، نایەکسانی، گەندەڵی، ئاپارتایدی ڕەگەزی، نەبوونی ئازادی سیاسی، سەرکوت، زیندان و ئێعدام نیشان بدەین. وەرن لەڕێگەی بڕیارنامەکان و نیشان دانی ئێرادەی پتەو لە خەبات لەدژی نیزامی سەرمایەداریی، خوازەنامەی بزووتنەوەی کرێکاری لەدژی سەرمایەداران و دەوڵەتانی پشتیوانیان و هەروەها بۆنیادنانی جیهانێک بەدوور لە زوڵم و ستەم و چەوساندنەوەی ئینسان بەدەستی ئینسان، ڕابگەیەنین.
تەنیا چینی کرێکاری ڕێکخراو و وشیار دەتوانێ خوازەنامەی خۆی لەدژی سەرمایەداران وەدی بێنێت. تەنیا چینی کرێکاری ڕێکخرا و وشیارە دەتوانێ ئازادی ڕاستەقینە بۆ خەڵک بەدی بێنێت. تەنیا کرێکارانی ڕێکخراو کە لەژێر ڕێبەرییەکی سیاسی چالاکی دەکەن دەتوانن، پێویستییەکانی ڕووخاندنی شۆڕشگێرانەی کۆماری ئیسلامی و بەرەوپێش چوونی شۆڕش زەمانەت بکەن. ڕێگە بدەن کە داهێنان، خوازەنامە و بانگەوازەکانی ئێمە لەدژی نیزامی سەرمایەداریی لە یەکی ئەیار، بە هەزاران خەباتکاری نوێ بێنێتە ناو ڕێگای سۆسیالیسمی ڕزگاری بەخش و هێزی ئێمە لە شەڕی یەکلاکەرەوە بۆ ڕزگار کردنی زەحمەتکێشان و ئازادی خوازانی ئێران لە چنگ ڕژیمی گەندەڵی کۆماری ئیسلامی و لەژێر دیلێتی بەرفراوان تر بکات.
حیزبی کۆمۆنیستی ئێران یەکی ئەیار هێمای هاوپشتی چینایەتی و ئەنترناسیۆناڵیستی لە هەموو کرێکاران پیرۆزبایی دەکات و ڕێز لە هەوڵی ماندوونەناسانەی ڕێکخەرانی مانگرتن و ناڕەزایەتییەکانی ساڵی ڕابردوو دەگرێت.
بژی یەکی ئەیار ڕۆژی جیهانیی کرێکار
بڕووخێت ڕژیمی کۆماری ئیسلامی
بژی ئازادی، بەرابەری، حکوومەتی کرێکاری
کۆمیتەی ناوەندی حیزبی کۆمۆنیستی ئێران
خاکەلێوەی ١٤٠٠
ئاوریلی ٢٠٢١