بە داخ و پەژارەیەکی زۆرەوە دایکی ئازیز و بەڕێز فەوزیە حسامی (دایە سەیدزادە) ڕۆژی شەممە ٣ی مانگی ئاگۆست بەرابەر بە ١٣ی مانگی گەلاوێژ لە تەمەنی ٨٦ ساڵیدا بەهۆی نەخۆشییەوە لە شاری کۆڵنی ئاڵمان ماڵئاوایی لە ژیان کرد.
ئەم دایکە ڕەنجدیدەیە هاوشان و هاوڕێ لەگەڵ هاوسەری تێکۆشەری (سەید محەممەد حسێنی)، وەک زۆرێک لە خەڵکی کرێکار و زەحمەتکێشی کوردستان ڕۆڵە ئازیزەکانیان لە دامانی پڕ لە خۆشەویستی و لە فەزایەکی پڕ لە گڕوتین و تێکۆشاندا پەروەردە کرد. سەید محەممەد ناسراو بە (سەید محەممەد کۆمۆنیست) هاوسەری دایە سەیدزادە کە لە سەردەمی ڕژیمی پەهلەویدا بە تاوانی چالاکیی سیاسی دەستگیر و زیندانی کرابوو، لە قۆناغی ڕاپەڕینی ڕێبەندانی ١٣٥٧ی هەتاوی و لەدوای ئەم قۆناغەش چالاکییە سیاسییەکانی خۆی لە پەیوەند لەگەڵ کۆمەڵەدا درێژە پێدا.
فەزای سیاسی و خەباتکارانەی ناو بنەماڵە، ڕۆڵە خۆشەویستەکانیشیانی بە ئاراستەی سیاسیی چەپ و ڕادیکاڵەوە پەروەردە کرد. دەرگای ماڵە بچووک و کرێکارییەکەی ئەوان لە ئاوایی “کۆستە”ی سەربە شاری بۆکان هەمیشە بەڕووی پێشمەرگەکانی کۆمەڵەدا کراوە بوو. میهر و خۆشەویستی و دڵسۆزیی دایە سەیدزادە نیسبەت بە ئەندامان و دۆستانی کۆمەڵە، ئەوی کردبووە دایکێکی جێی متمانە و خۆشەویست و قابیلی ئیحتڕام.
نوێنەرایەتیی کۆمەڵە لە دەرەوەی وڵات بەبۆنەی کۆچی دایە سەیدزادەی خۆشەویست سەرەخۆشی دەکات لە منداڵانی ئازیزی هاوڕێیان تەها، سەهەند، موحسین، مریەم، مێهدی، کوردستان و ئارەش، و هەروەها لە هاوڕێ عەلی شاهکار و لە هەموو ئەندامانی بنەماڵەکەی و خۆی بە شەریک و هاوبەشی غەمیان دەزانێت.
نوێنەرایەتیی کۆمەڵە – ڕێکخراوی کوردستانی حیزبی کۆمۆنیستی ئێران
١٣ی گەلاوێژی ١٤٠٣
٣ی ئاگۆستی ٢٠٢٤