ڕفاندنی مامۆستایەکی قوتابخانە و تەقەی هێزەکانی ڕژیم لە کۆبوونەوەی ناڕەزایەتیی مامۆستایان
سێشەممە ۱۶-۱۲-۱۴۰۱ | 07-03-2023
ڕۆژی سێشەممە، ١۶ی ڕەشەمە مامۆستایەکی خانەنشینکراو بە ناوی بەهادین مەلەکی، لەنێو ئاپۆڕای ناڕەزایەتییەکانی مامۆستایانی شاری سنە لە بەردەم بینای بەڕێوەبەریی پەروەردە و بارهێنانی ئەوشارە لەسەر هێرشی کیمیایی بۆ سەر قوتابخانە و قوتابییان، لەلایەن هێزەکانی ڕژیمەوە ڕفێندراوە و ئەو هێزانە بە چەکی ساچمەیی تەقەیان لە مامۆستایانی ناڕازی کردووە.
پێویستە بوترێ کە ئەو کۆبوونەوە ناڕەزایەتییەی مامۆستایان لەسەر بانگەوازی یەکێتی پیشەییی مامۆستایانی کوردستان لەسەر هێرشی کیمیایی بۆ سەر قوتابخانە و قوتابییان ڕێک خرا و بەڕێوە چووە. هاوکاتیش ڕژیم هەوڵی پێشگیری لە بەڕێوەچوونی ناڕەزایەتییە هاوشێوەکان لە شار و ناوچەکانی دیکە دەدات و بەپێی زانیارییەکان هێزە سەرکوتگەرەکانی ڕژیم لە پێش بینای بەڕێوەبەریی پەروەردە و بارهێنانی شارەکانی سەقز و مەریوان جێگیر کراون.