هاوکات لەگەڵ سیناریۆی ڕووخاندنی ڕژیمی دیکتاتۆری بەشار ئەسەد کە بەپێی پلانی ئەمریکا و ڕژیمی فاشیستی تورکیە و بە هەماهەنگی لەگەڵ حکوومەتی ئیسرائیل ئەنجامدرا قۆناغێکی نوێی تاوانی شەڕ و داگیرکاریی دەوڵەتی تورکیە لە کوردستانی سووریە دەستیپێکردووە. لەگەڵ پێشڕەوی هێزە کۆنەپەرستەکانی هەیئەتی تەحریری شام و پرۆسەی ڕووخانی ڕژیمی دەسەڵاتدار لە سووریە بەکرێگیراوانی حکوومەتی تورکیە لەژێرناوی ئەرتەشی ئازادی سووریە بەپشتیوانی ئەرتەشی ئەم وڵاتە لە زنجیرەیەک ئۆپەراسیۆندا دەستیان کرد بە هێرش بۆ سەر شارەکانی منبج و تەل ڕەفعەت. بە کوشتن و بریندارکردنی سەدان کەس ئەم دوو شارەیان داگیر کرد و هەزاران کەس لە دانیشتووانی ئەم دوو شارەیان دووبارە ئاوارە کردەوە. لە درێژەدا فڕۆکە جەنگییەکانی دەوڵەتی فاشیستی تورکیە بە بۆمبارانی گوندی “عەین عیسا” لە ڕۆژی دووشەممە ١٩ی مانگی سەرماوەز، ١١ ئەندامی بنەماڵەیەک لەوانە ٦ منداڵیان کوشت. ئەردۆغانی فاشیست لە داگیرکردنی ئەم دوو شارە بەدەستی هێزە بەکرێگیراوەکانی “ئەرتەشی ئازادی تورکیە” پشتیوانیی کرد و بە ئیدیعای ئەوەیکە “هێزە کوردەکانی سووریە بە پشتیوانیی ئەمریکا ڕێگەیان پێدراوە لە شاری منبج بڕۆنە دەر” بە ئاشکرا نیشانی دا کە لە هاوکاری و هاوئاهەنگی لەگەڵ هێزەکانی ئەمریکا ئەم تاوان و داگیرکارییە لە کوردستانی سووریە درێژە دەدات.
ئەوەش لە کاتێکدایە کە بەوتەی ساڵح موسلیح ئەندامی شۆرای ڕێبەریی دەسەڵاتی خۆسەری ڕۆژئاوا، هەتا ئێستا سەرەڕای لێدوانە جیاوازەکانی “هەیئەتی تەحریری شام” بەهۆی نفووزی دەوڵەتی تورکیە، کوردەکانی سووریە وەک بەشێکی بەرچاو و کاریگەر لە لایەنە سیاسییەکانی ئەم وڵاتە لە بەشداری لە پڕۆسەی پێکهێنانی حکوومەتی نوێدا بێبەش کراون. درێژەی تاوان و داگیرکاریی دەوڵەتی ئەردۆغان لە کوردستانی سووریە، لەناو ترس و هیوای خەڵک لە سەرتاسەری ئەم وڵاتە، مەترسیی پەرەسەدنی شەڕی نازخۆیی خستووەتە ئاسۆوە.
لەڕاستیدا هەر لە نوامبری ساڵی ٢٠١٣ەوە کە بزووتنەوەی مافخوازی خەڵکی کوردستانی سووریە پێکهاتنی شۆرای خۆبەڕێوەبەری ئینتقالیی بۆ ئیدارەی ناوچەکانی ژێر کۆنتڕۆڵی خۆی ڕاگەیاند، دەوڵەتی تورکیە دوژمنایەتیی ئاشکرای خۆی لەگەڵ ئەم ئەزموونە ڕاگەیاند. دەوڵەتی تورکیە لە کاتێکدا کە لەڕێگەی میلیشیاکانی سەر بە خۆی کە لەژێرناوی “ئەرتەشی ئازادی سووریە”دا ڕێکیخستوون دەیهەوێ ببێتە بەشێک لە پێکهاتەی حکوومەتی داهاتووی سووریە، بەکردەوە بە شەڕ و میلیتاریزم و داگیرکاری هەوڵ دەدات ئەزموونی دەسەڵاتی خۆبەڕێوەبەری کوردستانیش لەناوبەرێت. دەوڵەتی تورکیە یەکجار لەوە دەترسێ کە سەقامگیریی دەسەڵاتی خۆسەر لە کوردستانی سووریە هاوسەنگیی هێز بە قازانجی خەباتی خەڵکی کوردستان بگۆڕێت. بۆیە بە شێوازی حکوومەتی ڕەگەزپەرستی ئیسرائیل بە داگیرکردنی بەشێک لە خاک و شار و شارۆچکەکانی کوردستان و بە دروستکردنی ناوچەی ئارام لەسەر سنووری هاوبەشی کوردستانی سووریە، بارودۆخێکی یەکجار سەخت و دژواری بەسەر خەڵکی ئەو ناوچانەدا سەپاندووە. حکوومەتی تورکیە هاوکات لەگەڵ بەهێزکردنی گرووپە تیرۆریستییە ئیسلامییەکانی سەر بە خۆی بەردەوام هێرشی کردووەتە سەر شار و گوندەکان و هێزەکانی سووریەی دیموکرات.
لەم بارودۆخە ئاڵۆزەدا، لە جەرگەی مەترسی و پیلانەکانی دەوڵەتی ڕەگەزپەرستی تورکیە بەرانبەر خەڵکی کوردستانی سووریە، تەنیا بەشداریی چالاکی کرێکاران و زەحمەتکێشان و ژنان و پیاوانی ستەملێکراوی کوردسانی سووریە لە گۆڕەپانی سیاسیی کۆمەڵگا و جێخستنی دەستکەوتە دیموکراتیکەکانی هەتا ئێستا و هەوڵدان بۆ پێکهێنان و قامکردنی پەیوەندی لەگەڵ خەڵکی ئازادیخواز و یەکسانیخواز لە سەرتاسەری سووریە دەتوانێ ئاسۆیەکی ڕوون بۆ تێپەڕین لەم قۆناغە بەڕووی کۆمەڵگادا بکاتەوە. لەم بارودۆخەدا بەرجەستەکردنەوەی ئەو دەستکەوتانەی کە لەسەر بەرابەری ژن و پیاو لە بواری ئابووری، کۆمەڵایەتی، سیاسی وهەروەها لەسەر مافی ژن لە چوارچێوەی بنەماڵەدا تەئکید دەکەن، جەخت کردنەوە لەسەر بەرابەریی کەمینە نەتەوەیی ئایینی و جنسیەتییەکان لە بەرامبەر یاسا، بەشداریی ڕاستەوخۆی خەڵک لە ئیدارە و بەڕێوەبردنی شار و گوندەکان و تەئکید لەسەر ئازادییە سیاسییەکان دەتوانێ یارمەتیدەر بێت لە پەرەپێدانی پشیتوانیی خەڵکی ئازادیخواز و بەرابەری تەڵەبی سەرتاسەری سووریە لە بزووتنەوەی مافخوازانەی خەڵکی کوردستان. جەماوەری ستەملێکراوی سووریە پێویستە خەڵکی ئازادیخواز و بەرابەری تەڵەبی سووریە و ناوچەکە و جیهان بە هاوپەیمانانی ڕاستەقینەی خۆیان بزانن. لە بارودۆخی ئاڵۆزی ئێستادا خەڵکی کوردستانی سووریە زیاتر لە هەموو کاتێک پێویستیان بە پشتیوانیی خەڵکی ئازادیخوازی وڵاتانی ناوچەکە و سەرتاسەری جیهانە.
ئەزموونی هەتا ئێستای جیهان نیشانی داوە کە دەوڵەتی ئەمریکا نەتەنیا هاوپەیمانی نەتەوە ژێر ستەمەکان و بزووتنەوە ئازادیخوازەکان لە هیچ گۆشەیەکی جیهان نەبووە، بەڵکوو لە تێکشکاندن و خەڵتانی خوێن کردنیاندا لە هیچ هەوڵێک دەریغی نەکردووە. ئەمریکا زیاتر لە حەفتا ساڵە لە جینۆساید و داگیرکاریی دەوڵەتی ئیسرائیل دژبە خەڵکی فەلەستین پشیتوانی دەکات. تاوانی شەڕ و داگیرکاریی دەوڵەتی تورکیە لە چەند ساڵی ڕابردوو لە کوردستانی سووریە بە بێ چرای سەوز و ڕەزامەندیی ئەمریکا ئەنجام نەدەدرا. لەم ڕووەوە هەرجۆرە هاوپەیمانییەک لەگەڵ ئەمریکا زەربە لە ئیعتباری بزووتنەوەی خەڵکی ستەمدیدەی کوردستان دەدات لەناو بیروڕای گشتیی پێشکەوتنخواز و خەڵکی ئازادیخواز و بەرابەری تەڵەبەدا.
لەم بارودۆخەدا تەنیا ئەو هێزە دەتوانێ خەڵکی ستەملێکراوی کوردستان لەم دەربازگەیە تێپەڕێنێ و بەرژوەندیان نوێنەرایەتی بکات کە باوەڕی بە دەورونەخشی جەماوەری کرێکار و زەحمەتکێش لە بەڕێوەبردن و دیاریکردنی چارەنووسی کۆمەڵگا بە پراتیک سەلماندبێ و هەموو ڕاستییەکان سەبارەت بە سیاسەتەکانی دەوڵەتی ئەمریکا و بەرژەوەندە ستراتێژیکەکانی لە هاوکاری لەگەڵ دەوڵەتی تورکیە بۆ خەڵک باس بکات.