زیاتر لە دوو حەفتە بەسەر حوکمی ئێعدامی شەریفە محەممەدی چالاکی کرێکاری لەلایەن بێدادگای دژەئینقلابی ئیسلامی لە ڕەشت بە تۆمەتی بێبنەما تێپەڕیوە. لەماوەی ئەم دوو هەفتەیەدا شەپۆلێکی گەورە لە ڕاگەیاندنی هاوپشتی لەگەڵ شەریفە محەممەدی، لەگەڵ بنەماڵەکەی و بۆ مەحکووم کردنی ئەم حوکمە دژەئینسانییە کەوتووەتە ڕێ و هەروا بەردەوامە. لەم قۆناغەدا لە هاوئاهەنگییەکی کردەوەیی و شکۆمەندی سیاسیدا هەموو ناوەند و ڕێکخراوەکانی کرێکاران، موعەلیمان، خانەنشینان، ناوەندەکانی مافی مرۆڤ، زیندانیانی سیاسی، چالاکان و پێشڕەوانی بزووتنەوەی کرێکاری لە زیندان و دەرەوەی زیندان، دەیان یەکیەتی و ناوەندی کرێکاری لە وڵاتە جۆراوجۆرەکانی جیهان، ڕێکخراو و ناوەندەکانی داکۆکیکاری مافی منداڵان و ژنان و … لە دەرەوەی وڵات، حیزب و ڕێکخراوە چەپ و کۆمۆنیستەکان بە دەرکردنی بەیاننامە یان بە بەرپاکردنی ئاکسیۆن دژبەم حوکمە جەنایەتکارانەیە دەستیان دایە ناڕەزایەتی و خوازیاری ئازادیی بێ شەرت و مەرجی ئەم چالاکە کرێکارییە بوون. بەڵام ڕژیمی کۆماری ئیسلامی بە بێ بایەخدان بەم شەپۆلە مەزنە ناڕەزایەتییە لە ناوەوە و دەرەوەی وڵات و بە بێ بایەخدان بەو کەمپەینە سیاسییانەی کە لە تۆڕە کۆمەڵایەتییەکان دژبە حوکمی ئێعدامی شەریفە محەممەدی لەئارادایە، هێستا ئەم حوکمە دژەئینسانییەی هەڵنەوەشاندووەتەوە.
ئەم هەڵمەتە سیاسییە بۆ هەڵوەشاندنەوەی حوکمی ئێعدامی شەریفە محەممەدی و خواستی ئازادیی بێ شەرت و مەرجی ئەم چالاکە کرێکارییە ڕژیمی کۆماری ئیسلامیی خستووەتە ژێر فشارەوە. سەرانی ڕژیم لەلایەکەوە نیگەرانی ئەوەن کە لەم بارودۆخە هەستیارەی کۆمەڵگادا، هەرجۆرە هەڵەیەک بۆ نموونە ئێعدامکردنی شەریفە لەوانەیە ببێتە هۆی هەڵچوونی تووڕەیی و ناڕەزایەتیی پەنگخواردووی کرێکارن و خەڵک لە سەرتاسەری ئێران و لەلایەکی دیکەشەوە لەوە دەترسێن کە مەبادا پاشەکشەکردنیان لە بەڕێوەبردنی وەها حوکمێکی دژەئینسانی لەلایەن خەڵکەوە وەک سەکۆیەک بۆ هێرش کردنە سەر گشت دەسەڵاتی سیاسی کەڵکی لێوەربگیرێت. ئەم ڕژیمە لەکاتێکدا حوکمی ئێعدامی بۆ شەریفەی محەممەدی دەرکردووە کە داسی مەرگ بەسەر سەری دەیان ناڕازیی بزووتنەوەی شۆڕشگێڕانەی ژینادا دەسوورێنێت. سەدان کەس لە چالاکانی بزووتنەوەی کرێکاری و باقی بزووتنەوە کۆمەڵایەتییەکانی خستووەتە زیندانەوە و لە دەرەوەی زیندانیش بەدواداچوون و بانگکردن و هەڕەشەکردن لە چالاکانی بزووتنەوە کۆمەڵایەتییەکان درێژە پێدەدات. ئەم ڕژیمە بە پێشینەیەک کە هەیەتی لێی بەدوور نییە کە هەڵوەشاندنەوەی حوکمی ئێعدامی شەریفە محەممەدی لەگەڵ بەڕێوەبردنی حوکمی ئێعدامی ژمارەیەک لە دەستگیرکراوانی بزووتنەوەی ژینا هاوکات بکات تا بەخەیاڵی خۆی نیشانی بدات کە ئەوزاعی لە کۆنتڕۆڵدایە. کەوابوو پێویستە هەڵمەتی سیاسی بۆ هەڵوەشاندنەوەی ئێعدامی شەریفە محەممەد لەپێناو ئازادیی بێ شەرت و مەرجی ناوبراو بەرەو خەبات بۆ ئازادیی بێ شەرت و مەرجی گشت کرێکارانی بەندکراو و زیندانیانی سیاسی و هەڵوەشاندنەوەی سزای ئێعدام پەرە بستێنێت.
لەکاتێکدا کە ڕژیمی کۆمار ئیسلامی بەئامانجی کۆنتڕۆڵکردنی فەزای کۆمەڵگا لەدژی چالاکانی بزووتنەوەی کرێکاری حوکمی ئێعدام و زیندان دەردەکات و ئێعدامی زیندانیان و پەرەپێدانی کەشوهەوای سەرکوت بووەتە بەشێک لە ستراتێژی مانەوەی ئەم ڕژیمە، لە وەها بارودۆخێکدا خەبات بۆ هەڵوەشاندنەوەی سزای ئێعدام و بۆ ئازادیی بێ شەرت و مەرجی زیندانیانی سیاسی سەد هێندە زەروورەتی پەیدا کردووە. لە بارودۆخی ئێستادا ڕژیمی ئیسلامی تەنانەت ئێعدامی زیندانیانی ئاسایی و پەیوەندیدار بە ماددەی هۆشبەر و تاوانەکانی دیکەش بە ئامانجی سیاسی، بەڵام بە پاساوی فریوکارانەی بەهێزکردنی ئەمنیەتی کۆمەڵایەتی و بەڕێوەبردنی دادپەروەری ئەنجام دەدات. وەها پاساوێکی فریوکارانە لە کاتێکدایە کە بەرینایی ئاستی توندوتیژی و کوشتاری ئینسانەکان لەلایەن ڕژیمی ئیسلامییەوە بەهیچ شێوەیەک لەگەڵ ئاستی توندوتیژی و تاوانی تاکەکەسی بەرئاورد ناکرێت. کۆماری ئیسلامی قوربانیانی ئەو نیزامە کۆمەڵایەتییە زاڵمانەیەی کە خۆی بەسەر ژیانی ئینسانەکانیدا زاڵ کردووە، ئێعدام دەکات تا بەرپرسیارێتیی خۆی لەئاست پێکهێنانی بەستێن و بارودۆخێک کە بەردەوام ئەمجۆرە تاوانانە بەرهەم دێنێتەوە، پەردەپۆش بکات.
ئەو پاساوانەی بۆ جێبەجێکردنی سزای ئێعدام دەیهێننەوە درۆیەکی ئاشکران و هیچی تر. چونکە ئەوەڵەن ئینسانەکان زاتەن تاوانکار، قاتڵ، قاچاغچی و جەنایەتکار بەدنیا نایەن، بەڵکوو ئەوە بارودۆخی مادیی ژیانی کۆمەڵایەتییە کە ئەوان بەرەو تاوانکردن دەبات و دەوڵەتەکان و چینی دەسەڵاتدار بەرپرسی ڕاستەوخۆی داسەپاندنی ئەم بارودۆخە مادیە بەسەر زۆربەی خەڵکدان. کەسانێک دەبێ سزا بدرێن کە بەستێنە کۆمەڵایەتییەکانی ئەنجامدانی تاوان و جەنایەتیان پێکهێناوە. ئەزموونی هەموو کۆمەڵگاکان و ئامار و زانیاریی بەڵگەمەند و باوەڕپێکراو نیشانی دەدەن کە هیچ کۆمەڵگایەک ئەمنیەتی خەڵکی لە ڕێگەی بردنەسەری ڕێژەی ئێعدام نەبردووەتە سەرێ، بەڵکوو بەپێچەوانەوە خودی ئێعدام هەستی تۆڵەکردنەوە و توندوتیژی پەرەپێدەدات.
کرێکاران، ژنان و پیاوانی ئازادیخواز و تێکۆشەر!
لەپێناو هەڵوەشاندنەوەی دەستبەجێی سزای ئێعدام یەکگرتوو و یەکپارچە ڕاپەڕن! سزای ئێعدام قەتڵی عەمدی دەوڵەتییە. پێویستە بەرانبەر بە شەپۆلی ئێعدام لە مافی ژیانی ئینسان لێبڕاوانە دیفاع بکەین. پێویستە بۆ هەڵوەشاندنەوەی دەستبەجێی سزای ئێعدام یەکپارچە و یەکگرتوو بێینە مەیدان.
بۆ ئازادیی بێ شەرت و مەرجی بەندکراوانی سیاسی و عەقیدەتی پێویستە کۆبوونەوەی ناڕەزایەتی بەڕێوەبەرین. هیچ کەس نابێ بەخاتری بیروباوەڕ و بەخاتری چالاکیی سیاسی بخرێتە زیندانەوە. ئازادیی بیروباوەڕ و ئازادیی چالاکیی سیاسی مافی بێ ئەملاوئەولای هەموو تاکێکی کۆمەڵگایە. بەرپاکردنی کۆبوونەوەی ناڕەزایەتی لە شەقام و ڕێپێوان بەشێکی جیانەکراوەیە لە ئازادی ڕادەربڕین و بیروباوەڕ. هەروەک مرۆڤی شیاوی ئازادی و بەرابەری، قورس و قایم و بێ راڕایی پێویستە بۆ دیفاع لە مافە ڕەواکانتان، کۆبوونەوەی ناڕەزایەتی بەڕێوەبەرن! لە بەرامبەر زیندانەکاندا کۆببنەوە و بە دەنگی ڕەساوە خوازیاری ئازادیی بەندکراوانی سیاسی بن. لە گەڕەک و کارخانە و زانکۆ و شەقام درووشمی “بەندکراوی سیاسی دەبێ ئازاد بکرێت” بەرز بکەنەوە. خەبات دژبە سزای ئێعدام و لەپێناو ئازادیی زیندانیانی سیاسی بکەنە بزووتنەوەیەکی سەرانسەری. ئاڵای خەبات لەدژی سزای ئێعدام و خەبات بۆ ئازادیی بەندکراوانی سیاسی و دەستەبەرکردنی ئازادیی بێ شەرت و مەرجی سیاسی پێویستە لە دەستی چنیی کرێکاردا بێت.