لەئێستادا و لەبارودۆخێکدا کە بەشێک لە هێزە ئۆپۆزیسیۆنەکانی بورژوازیی ئێران لە ڕووی داماوییەوە، بە فشاری زۆرینەی دەوڵەتی ترامپ و هەڕەشەکانی سەبارەت بە بۆمباران کردنی دامەزراوە ئەتۆمی و ژێرخانە ئابوورییەکانی ئێران ئومێدیان بەستووە و هێندێکیشیان لەو باوەڕەدان کە دوای ڕووخانی دەسەڵاتی بەشار ئەسەد لە سووریە نۆرەی ڕووخاندنی کۆماری ئیسلامی لە تاران دێت، بابەتی سەرەکی ئەوەیە کە چۆن دەتوانین پێشڕەویی بزووتنەوەی شۆڕشگێڕانە بۆ ڕووخاندنی کۆماری ئیسلامی زەمانەت بکەین. ڕووخاندنی شۆڕشگێڕانەی کۆماری ئیسلامی بابەتێکی عەمەلی و مومکینە. قەیرانەکانی کۆماری ئیسلامی قووڵتر و بەربڵاوتر لەوەن کە ڕژیم بتوانێ بەرەنگاریان بێتەوە.
قووڵبوونەوەی قەیران و ڕکوودی ئابووری و ئاکامەکانی گەمارۆ نێونەتەوەییەکان، پرتووکاویی ژێرخانە ئابوورییەکان و گەندەڵی و دزیی بەرینی کاربەدەستانی حکوومەت، ئابووریی ئێرانی خستووەتە سەر لێواری داڕمان. سیاسەتە ستراتێژیکە ناوچەییەکانی ڕژیم وەک ڕەمزێکی مانەوەی نیزامی ئیسلامی تووشی شکست بوون. ئیدئۆلۆژیی ئیسلامی وەک یەکێک لە پایەکانی دەسەڵات لەژێر فشاری حەقیقەتە کۆمەڵایەتییەکان و بەتایبەت لەژێر فشاری خەباتی بێباکانەی ژناندا سست و لاواز بووە. بێتوانایی ڕژیم لە وڵامدانەوە بە داخوازییە خێراکانی بزووتنەوەی کرێکاری و بزووتنەوە کۆمەڵایەتی و ناڕەزایەتییەکان، ئاراستەیەکی هێرشبەرانەتری بەم بزووتنەوانە بەخشیوە و سەرهەڵدان و گەشەی ئەم خەباتانەی لە داهاتوویەکی نزیکدا خستووەتە ئاسۆوە. لە کاتێکدا کە دەزگای ڕووحانییەت و ئیدئۆلۆژیی ڕژیم توانای مەشرووعییەت بەخشینی بەو هەمووە هەژاری و فەلاکەت و بێمافییە نییە، کۆماری ئیسلامی بۆ بەرەنگاربوونەوە لەگەڵ ئەم ڕەوتە زیاتر لە هەموو کاتێک ڕووی کردووەتە ستراتێژی پەرەپێدانی سەرکوت. ەڵام ستراتێژی سەرکوتیش کاریگەریی ڕابردووی خۆی لەدەستداوە. ئەم ستراتێژییە نەیتوانیوە جەماوەری خەڵک چاوترسێن بکات. لەئێستادا زیندان و ئەشکەنجەخانەکانی ڕژیمی کۆماری ئیسلامیش بوونەتە سەنگەری خەبات لەدژی ئێعدام و بەرگری لە ئازادیی زیندانییانی سیاسی. لەم بارودۆخەدا کۆمەڵگای ئێران گەیشتووەتە ئاستی تەقینەوە. ڕژیمی کۆماری ئیسلامی بۆ کۆنتڕۆڵکردنی قەیران و ڕێگری لە ڕەوتی داڕمانی ئابوورییەکەی، خەریکی ئامادەکارییە بۆ ئەنجامدانی سات و سەودا و تەسلیمبوون لە بەرامبەر ئەمریکادا. لە ئاکامی ئەم بنبەستانەدا، شکست و ناکارامەیی، ناکۆکی و قەیرانی ناو باندەکانی حکوومەت پەرەیسەندووە و میدیاکانی حکوومەت و کۆبوونەوەکانی مەجلیسی شۆرای ئیسلامی بوونەتە شوێنی نمایشی ئەم قەیرانە. بۆ هەمووان ڕوون بووەتەوە کە ئەم ڕژیمە نەک بەشێوەی ڕابردوو بەڵکوو بەشێوەی ئێستاش ناتوانێ درێژە بە دەسەڵاتی بدات. ئەمەش یەکێکە لەو فاکتۆرانەی کە دۆسیەی دیاریکردنی چارەنووسی دەسەڵاتی سیاسی لە داهاتوودا بەڕووی کۆمەڵگادا کردووەتەوە. ئێستا پرسیاری سەرەکی ئەوەیە: چۆن دەکرێ کۆماری ئیسلامی بە شێوەیەکی شۆڕشگێڕانە بڕوخێنرێت؟
ئەزموونی ئاخێز و بزووتنەوە ئینقلابییەکانی بەفرانباری ساڵی ٩٦، خەزەڵوەری ساڵی ٩٨ و ساڵی ١٤٠١ی هەتاوی لە ئێران و ئەزموونی شۆڕشەکان ئەوەیان نیشانیان داوە کە کەمینەیەک دەتوانێ شۆڕش وەڕێبخات. بەڵام ئەگەر هێزی سەرەکی شۆڕش نەیەتە مەیدان ئەم کەمینەیە ناتوانێ شۆڕش بەسەرکەوتن بگەیەنێت. لێکدانەوە و هەڵسەنگاندنی دینامیزم و هێزی بزوێنەری شۆڕش لە ئێران ئەوەمان پێ دەڵێ کە بە بێ بەشداریی بزووتنەوەی سۆسیالیستیی چینی کرێکار لە گۆڕەپانی سیاسیی کۆمەڵگا، پێشڕەویی بزووتنەوەی شۆڕشگێڕانە بۆ ڕووخاندنی کۆماری ئیسلامی زەمانەت ناکرێت. ئەزموونی هەموو شۆڕشەکان لە سەدەی بیستەم و ئاخێزە ئینقلابییەکان لە سەدەی بیست و یەک و ئەزموونی شۆڕشە ئینقلابییەکانی ساڵانی ڕابردووی ئێران نیشانیان داوە کە لە بارودۆخی ئەمڕۆی ئێراندا مانگرتنی سەرتاسەریی کرێکاران لە ناوەندە سەرەکییەکانی بەرهەمهێنان و خزمەتگوزاری کە بووبنە بڕبڕەی پشتی مانگرتنی گشتی و سیاسی، موحتەملترین ڕەوتی پێشڕەویی شۆڕشە. هەر شۆڕشگێڕێکی ڕاستەقینە کە خوازیاری ڕووخاندنی شۆڕشگێڕانەی ڕژیمی کۆماری ئیسلامییە پێویستە بۆ هێنانە مەیدانی بزووتنەوەی سۆسیالیستیی چینی کرێکار تێبکۆشێت. چینی کرێکار زۆرینەی جەمعیەتی ئێران پێکدێنێ و بەلەبەرچاوگرتنی پێگەی گرینگ و چارەنووسسازی لە بەرهەمهێنانی کۆمەڵایەتی، بەسەرەنجدان بە پێگەیەک کە لە سەنعەتە سەرەکییەکاندا هەیەتی، دەتوانێ چەرخی ئابووریی حکوومەتی ئیسلامیی سەرمایەداران و سەرچاوەی دابینکردنی هێزی سەرکوت و بوروکراسیی دەوڵەتی ئیفلیج و زەمینگیر بکات.
چینی کرێکار و بزووتنەوەی سۆسیالیستیی ئەم چینە بە پشت بەستن هەر بەم مێکانیسمەی بزووتنەوەی مانگرتن و بە پشت بەستن بەو چالاک و ڕێبەرانەی کە لە دامانی خۆیدا پەروەردەی کردووە، دەتوانێ ئاستی خۆڕێکخستن لەم قۆناغە شۆڕشگێڕانەیەدا بەهێزتر بکات. بزووتنەوەی کرێکاریی ئێران لە جەریانی بزووتنەوەی مانگرتن و ناڕەزایەیی زیاتر لە یەک دەیە و نیوی ڕابردوو، بە پەروەردەکردنی جیلێک لە ڕێبەران لەناو ڕیزەکانی خۆیدا، بە ڕێکخستنی هەزاران مانگرتن و ناڕەزایەتی و سەدان کۆمیتەی مانگرتن و کۆمیتەی کارخانە و بەڕێوەبردنی کۆبوونەوەی گشتی لە بواری کادر و ئەزموونەوە، توانای وڵامدانەوەی بەم پێداویستییە بەدەستهێناوە. چینی کرێکاری ئێران بەسەرنجدان بەو دەرفەتەکەی کە لەڕێگەی بزووتنەوەی مانگرتنی خۆیەوە ڕەخساندوویەتی، ئەویش لەم قۆناغە شۆڕشگێڕانەیەدا، دەتوانێ بەسەر ئەم خاڵە لاوازانەدا زاڵ بێت. لە هەنگاوی یەکەمدا پێویستە هەوڵ بدرێت چینی کرێکار داخوازییە ئابوورییەکانی خۆی لەگەڵ خواستی سیاسیی گونجاو لەگەڵ ئەم قۆناغە شۆڕشگێڕانەیە ئاوێتە بکات. لەئێستادا بەرژەوەندی چینایەتی و خەباتی سیاسیی چینی کرێکار دەخوازێت کە ئاڵای خەبات بۆ ئازادیی گشت بەندکراوانی سیاسی، ئاڵای خەبات بۆ هەڵوەشاندنەوەی سزای ئێعدام، ئاڵای خەبات بۆ هەڵوەشاندنەوەی یاسای حیجابی زۆرەملی، ئاڵای خەبات لەدژی هەژاری و نەهامەتی و گرانی و ئاڵای خەبات دژبە شەڕخوازییەکانی کۆماری ئیسلامی لە دەستی چینی کرێکاردا بێت. ئێستا کاتی ئەوەیە کە شەڕی کۆماری ئیسلامی بەرانبەر ژنان لەسەر مەسەلەی حیجاب بکەینە شەڕی هەموو کۆمەڵگا لەدژی کۆماری ئیسلامی. ئێستا کاتی ئاوێتە کردنی داخوازیی ئابووری و داخوازیی سیاسییە. کاتی ئەوەیە کە چینی کرێکار ئاڵای خەبات بۆ ڕووخاندنی کۆماری ئیسلامی بگرێتە دەست. ڕووخاندنی شۆڕشگێڕانەی کۆماری ئیسلامی بە ڕێبەریی چینی کرێکار نەک هەر لە ڕوانگەی بەرژوەندی چینی کرێکار و بزووتنەوەی ئازادیخوازی و بەرابەری تەڵەبی لە ئێران بووەتە زەروورەت و پێویستییەکی سیاسی، بەڵکوو لە ڕوانگەی بەرژوەندی کرێکاران لە ناوچەی ڕۆژهەڵاتی ناوەڕاست و بزووتنەوەی ئازادیخوازی لەم ناوچەیە و جیهانیش ئاڵوگۆڕێکی گرینگ بە حیساب دێت.
وتەی ڕۆژ: تەلەڤیزیۆنی حیزبی کۆمۆنیستی ئێران و کۆمەڵە
www.facebook.com/Peshrawcpiran
www.instagram.com/Peshrawcpirn