منداڵێکی تەمەن ١۶ ساڵ و خەڵکی شاری “دەرگەز”ی خوراسان، بەهۆی نەبوونی ئەمنییەتی کاری و ڕووداوی کار لە شاری زاهیدان، گیانی لەدەستدا.
ڕۆژی یەکشەممە، ٥ی سەرماوەز،حەسەن نادریان، تەمەن ١٦ ساڵ، منداڵێکی کار و خەڵکی گوندی “تیرگان”ی سەر بە شاری دەرگەز لە پارێزگای خوراسان، بەهۆی ڕووداوی کارکردن لە شاری زاهیدان ناوەندی پارێزگای سیستان و بەلووچستان گیانی لەدەستدا.
بە وتەی سەرچاوەیەکی ئاگادار، ئەم منداڵە کە سەرقاڵی کاری بەردکاری بووە، لە نهۆمی پێنجەمی باڵەخانەیەکی نیوەکارە، بەهۆی نەبوونی ئەمنییەتی کاری کەوتووەتە خوارەوە و گیانی لەدەستداوە.
شایانی باسە، سەرەڕای ئەوەیکە کۆماری ئیسلامی کۆنوانسیۆنی نێودەوڵەتیی مافەکانی منداڵان و هەروەها پەیماننامەی ئابووری، کۆمەڵایەتی و فەرهەنگیی ڕێکخراوی نەتەوە یەکگرتووەکان و چەند پەیماننامەیەکی دیکەی پەیوەندیداری نێودەوڵەتی واژۆ کردووە و ئەندامە، تا ئێشتاش هیچ هەنگاوێکی ئەرێنی بۆ دابینکردنی خۆشبژێویی منداڵان و تەنانەت کەمترین مافەکانی منداڵانیش وەک مافی خۆراک، خوێندن و ستانداردەکانی تەندروستی و… نەناوە و هیچ بایەخێکیش پێیان نادات.