Komala

ڕۆژی چوارشەممە، ٢٣ی سەرماوەز، سەرکۆ محەممەدی، لاوی وەرزشکاری خەڵکی سنە، لە کاتی دەربڕینی ناڕەزایەتی سەمبۆلیک لە گۆڕەپانی ئازادی ئەم شارە، دوای برینداربوونی بە تەقەی ڕاستەوخۆی هێزەکانی ڕژیم، بە شێوەی توندوتیژی و لێدان و کوتان لەلایەن هێزەکانی ئیتلاعاتی سپای پاسدارانەوە دەستبەسەر کرا. ئەم هاووڵاتییە بە ڕەنگکردنی پەیکەری گۆڕەپانی ئازادی (ئیقباڵ) بە ڕەنگی سوور، بە شێوەیەکی سەمبۆلیک ناڕەزایەتی خۆی بەرامبەر لە سێدارەدان و کوشتاری هاووڵاتییان لەلایەن ناوەندە حکومەتییەکان لە سەرهەڵدانی ئەم دوایەدا دەربڕی. سەرەڕای بەدواداچوونە بەردەوامەکانی بنەماڵە و نزیکانی سەرکۆ محەممەدی بۆ نەخۆشخانە و ناوەندە حکومەتییەکان، هەتا ئێستا چارەنووسی ئەو لاوە ناڕوونە و هیچ زانیارییەک لەسەر شوێنی ڕاگیرانی لەبەردەست دانییە.