جموجۆڵی نیزامیی دوو هەفتەی ڕابردووی کۆماری ئیسلامی لە سووریە، لەگەڵ کاردانەوەی بەشار ئەسەد لەلایەک و ئەمریکا لەلایەکی دیکەوە بەرەوڕوو بووەتەوە. هێندێک لە سەرچاوە سیاسییەکان لە سووریە لەم دوایانەدا ئاشکرایان کردووە کە بەرپرسانی سووریە لەوانە “فەیسەل مێقداد” وەزیری دەرەوەی سووریە دەمێکە داوای لە کۆماری ئیسلامی و گرووپەکانی سەربەم ڕێژیمەی لە سووریە کردووە کە ” بەلەبەرچاوگرتنی باروودۆخی قەیراناویی سووریە و بۆ ڕێگری لە بەرپابوونی شەڕێکی سەرانسەریی تر، نابێ لە خاکی سووریە دژبە ئیسرائیل دەست بدەنە چالاکیی نیزامی”. بەپێی ئامارە بڵاوکراوەکان هەتا ئێستا ئیسرائیل زیاتر لە ٤٠٠ جار ناوەند و پایەگا و بنکەی هێزەکانی کۆماری ئیسلامی و گرووپەکانی سەربەم ڕێژیمەی لە سووریە کردووەتە ئامانجی هێرشی نیزامی و بەهۆیەوە ژمارەیەکی زۆر لە فەرماندە و ئەندامانی سپای پاسداران و هێزە نیابەتییەکانی ڕێژیم کوژراون، بەڵام کۆماری ئیسلامی نەیتوانیوە بەرامبەر بەم هێرشانە کاردانەوەیەک لەخۆی نیشان بدات.
ڕۆژنامەی نیۆیۆرک تایمز ڕۆژی چواری خەرمانان لەسەر زاری شرۆڤەکارانی سیاسیی سووریە نووسیی: “هاوپەیمانیی هێزە نەیارەکانی ئیسرائیل کە سەربە کۆماری ئیسلامین و لە بەرپرسانی نیزامی سپای قودسی پاسداران، حیزبوڵڵای لوبنان، گرووپە ئیسلامییەکانی چەکداری یەمەنی و عێراقی پێکهاتوون لە کۆبوونەوەی مەجازیی خۆیاندا سەبارەت بە چۆنیەتیی وڵامدانەوە بە هێرشەکانی ئیسرائیل لە سووریە، چەند بڕیارێکیان داوە”. لەم دوایانەدا سەرچاوەیەکی نزیک بە ڕێژیمی کۆماری ئیسلامی لە دێمێشق ئاشکرای کرد: “ئێستا کە دەوڵەتی سووریە داوای ئەوەی کردووە کە چالاکی دژبە ئیسرائیل لە خاکی سووریەوە ئەنجام نەدرێت، ئەم هاوپەیمانییە بڕیاری داوە کە چەند هێرشێک بکاتە سەر پایەگاکانی ئەمریکا لە سووریە تا بەڵکوو لەم ڕێگەوە ئەمریکا، ئیسرائیل لە ئەنجامدانی هێرشی نیزامی بۆسەر هێزەکانی کۆماری ئیسلامی لە سووریە پاشگەز بکات”.
بۆ بەکردەوە دەرهێنانی ئەم بڕیارە، پاش دوایین هێرشی ئاسمانیی ئیسرائیل لە ١٤ی مانگی ئاگۆست بۆسەر پێگە و هێزەکانی کۆماری ئیسلامی لە دەورووبەری بەندەری “تەرتووس” و دێمێشق کە زەرەر و زیانی بەرچاوی لێ کەوتەوە و زیاتر لە هەزار مووشەک بەهۆیەوە لەناوچوون ، ڕۆژی ١٥ی ئاگۆست کۆماری ئیسلامی لە هێرشێکی درۆنیدا، پایەگا نیزامییەکانی ئەمریکای لە ناوچەی ستراتێژیک و نەوتیی “ئەلتەنەف”، هەڵکەوتوو لە پارێزگای “دیرالزود” لە ڕۆژهەڵاتی سووریەی کردە ئامانج. بەڵام ئەم تاکتیکەی کۆماری ئیسلامی نەتەنیا کاریگەر نەبوو بەڵکوو بەرەوڕووی وڵامی توندی ئەمریکا بووەوە. تا جێگەیەک کە بەدوای ئەم هێرشەدا، فڕۆکەکانی ئەمریکا بۆ سێ ڕۆژی بەردەوام پێگەکانی کۆماری ئیسلامی و گرووپەکانی سەربەم ڕێژیمەیان لە ناوچەی ” دیرالزود” لە نزیکیی سنووری سووریە و عێراق بە توندی بۆمباران کرد و تەڵەفات و خەساراتیان لە هێزەکانی کۆماری ئیسلامی دا. ئەگەرچی کۆماری ئیسلامی هەرجۆرە پەیوەندییەکی خۆی لەگەڵ ئەم هێرشە درۆنییە ڕەت دەکاتەوە بەڵام گوتەبێژی “سێنتکام” فەرماندەیی ناوەندیی ئەمریکا ڕایگەیاند کە “ئەم هێرشانە کاردانەوەیەک بوو بە هێرشی ڕۆژی ١٥ی ئاگۆستی کۆماری ئیسلامی دژبە یەکێک لە پایەگاکانی ئێمە. چونکە مەعلووم بووە درۆنە تێکشکاوەکە دەستکردی کۆماری ئیسلامی بووە”. هەڵبەت ڕێکخراوی چاوەدێری مافی مرۆڤی سووریەش تەئکیدی کرد کە هێرشەکانی ئەمریکا بۆسەر کەمپی “عیاش” بووە کە گرووپی چەکداری فاتمیوونی ئەفغانستانی(سەربە کۆماری ئیسلامیی) تێدا جێگیر کراوە.
هێرشە نیزامییەکانی ئەمریکا و ئیسرائیل لە حاڵێکدایە کە دەوڵەتی ڕووسیە کە کۆنتڕۆڵی هەوایی سووریەی لەدەست دایە، نەتەنیا کاردانەوەیەکی نیشان نەداوە بەڵکوو بەخاتری شەڕی ئۆکراین سیستمی بەرگریی هەوایی ئێس ٣٠٠ی خۆشی لە ناوچەی ستراتێژیکی “مەسیاف” لە ڕۆژئاوای سووریە لابردووە و لەم وڵاتە بردوویەتە دەر. ئەم بابەتەش دەرفەتێکی گونجاوی بۆ ئیسرائیل پێکهێناوە تا هێرشە ئاسمانییەکانی خۆی بۆسەر پێگەکانی کۆماری ئیسلامی توندتر بکاتەوە.
ڕێژیمی کۆماری ئیسلامی بە سیاسەت و دەخاڵەتگەرییە نیزامییەکانی خۆی لە سووریە نەتەنیا بووەتە دۆڕاوی قەیرانەکە، بەڵکوو لە عێراق و لوبنانیش ڕووبەڕووی شکستی یەک لە دوای یەک بووەتەوە. بەمجۆرە، یەکێک لە پایەکانی ستراتێژی مانەوەی ڕێژیم کە پەرەپێدانی دەسەڵات بووە لەجەرگەی ڕەقابەتەکانی ڕۆژهەڵاتی ناوەڕاستدا لەڕێگەی دەخاڵەت لە کاروباری ناوخۆیی وڵاتانی ناوچەکە، بەرەوڕووی شکست بووەتەوە. دەستتێوەردانی نیزامیی کۆماری ئیسلامی لە ناوچەکە و بەتایبەت لە عێراق و سووریە و لوبنان لەگەڵ دژایەتی و ناڕەزایەتیی جەماوەری خەڵکی کرێکار و زەحمەتکێش بەرەوڕوو بووەتەوە. خەڵکی ئەم وڵاتانە دەخاڵەتەکانی کۆماری ئیسلامی و پێکهێنانی دەستە و گرووپە چەکدارە تیرۆریستەکان لەژێرناوی حیزبی سیاسی، بەهۆکاری نائەمنی و ناسەقامگیری و گەندەڵیی ناو دەزگای حکوومەت دەزانن. دوایین نموونەشی بۆ جارێکی تر لە عێراق و سووریە بیندرا. دەسەڵاتداریەتی و کردەوەی دوو دەیەی ڕابردووی گرووپە شیعەکانی سەربە کۆماری ئیسلامی کە بووەتە هۆی پەرەسەندنی گەندەڵی، دزی، تاوان، کوشتار و نائەمنی لەم وڵاتانە، ماهییەتی دژەئینسانیی ڕێژیمی کۆماری ئیسلامیی بۆ جەماوەری کرێکار و زەحمەتکێشی ئەم وڵاتانە ئاشکرا کردووە. ڕێژیمی ئیسلامیش خۆی لەم بابەتە ئاگادارە کە نەتەنیا لەناوخۆی ئێران بەڵکوو لە وڵاتانێک کە تێیاندا ئیدیعای نفووز و دەسەڵاتیش دەکات، کەوتووەتە بەر نەفرەت و تووڕەیی خەڵکەوە. دوو ساڵ لەمەوبەر یەکێک لە نوێنەران لەناو مەجلیسی ڕێژیمدا لە پێوەند لەگەڵ پێگەی ڕێژیمی ئیسلامی لە سووریە هاواری کرد و وتی: “ئەمڕۆ شایەدی ئەوەین کە بەشار ئەسەد بەوپەڕی بێشەرمییەوە وەزنەی هەمنەوایی خۆی لەگەڵ ولادیمیر پوتین قورستر کردووە و تەنانەت حزووری شەهیدانی مودافعی حەرەمی لە سووریە کەمڕەنگ کردووە و هێندێک جار حاشای لێ دەکات. زۆر بەدوور نییە کە ئەسەد و پوتین، ئێمە لەپێناو بەرژەوەندی خۆیان و نەتەنیاهوو و دۆناڵد ترامپ بکەن بە قوربانی”. نەفرەت و تووڕەیی خەڵکی عێراق نیسبەت بە کۆماری ئیسلامی لە شکستی سەرشۆڕانەی گرووپە میلیشیاکانی سەربە ڕێژیم لە هەڵبژاردنەکانی ساڵی ڕابردووی عێراقدا بەئاشکرا بیندرا. بەڵام گرووپە میلیشیاکانی سەربە ڕێژیمی کۆماری ئیسلامی بە هیدایەت و پشتیوانیی سپای پاسداران خوازیاری درێژەی دەسەڵاتی خۆیان بوون و ئێستا دە مانگە کە لە پێکهاتنی دەوڵەت لە عێراق ڕێگری دەکەن. بێگومان بەرپرسی سەرەکیی ئەو شەڕە ناوخۆییەی کە هەر ئێستا لەنێوان گرووپە شیعە چەکدارەکانی عێراقدا لەئارادایە، کۆماری ئیسلامییە.
سیاسەتی دەخاڵەتگەری و دەستتێوەردانی کۆماری ئیسلامی لەم وڵاتانە هەم بە زیانی جەماوەری کرێکار و زەحمەتکێشی ئەم وڵاتانە بووە و شەڕ و کوشتاری بۆ بەدیاری هێناون و هەم تێچووی بەرینی سەدان ملیارد دۆلاریی بەسەر سفرەی کرێکاران و خەڵکی بێبەشی ئێراندا سەپاندووە.