سزای سێدارەی بەندکراوێکی خەڵکی کۆیەشت لە بەندیخانەی ئیلام جێبەجێکرا
پێنجشەممە ۲۲-۰۴-۱۴۰۲ | 13-07-2023
بەرەبەیانی ڕۆژی چوارشەممە ٢١ی پووشپەڕ سزای سێدارەی بەندکراوێک بەناوی حوسێنعەلی زەروەنی، خەڵکی گوندی “پشت باغ زەروەنی” شاری کۆیەشت، سەر بە پارێزگای لوڕستان، کە پێشتر بە تۆمەتی کوشتنی بەئەنقەست، سزای سێدارەی بەسەردا سەپێندرابوو، لە بەندیخانەی ناوەندیی ئیلام جێبەجێکرا. حوسێنعەلی زەروەنی، کارماندی بانک، نزیکەی دوو ساڵ لەمەوپێش بە تۆمەتی کوشتنی بە ئەنقەست دەستبەسەرکرا و لەلایەن دەزگای دادوەریی کۆماری ئیسلامیەوە دەستبەسەرکرا. هەتاکاتی داڕشتنی ئەم هەواڵە، هەواڵی لە سێدارەدانی ئەم بەندکراوە لە میدیا حکوومەتییەکان و ڕاگەیاندنەکانی سەر بە دەزگای دادوەری ڕژیمدا بڵاو نەکراوەتەوە.