دوای تێپەڕبوونی ماوەی ٥٥ ڕۆژ لە دەستبەسەرکردنی دوو هاووڵاتیی خەڵکی شاری بۆکان بە ناوەکانی لوقمان پێشیار، تەمەن ٥٨ ساڵ و حەسەن مەردانی، تەمەن ٦٥ ساڵ، هێشتا چارەنووسیان ناڕوونە و هیچ زانیارییەک لەسەر ئەو دوو هاووڵاتییە لەبەردەستدا نییە. لوقمان پێشیار و حەسەن مەردانی، هێشتا لە مافی چاوپێکەوتن لەگەڵ بنەماڵە و کەسوکاریان بێبەری کراون، هەروەها تا کاتی داڕشتنی ئەم هەواڵە هیچ زانیارییەکی ورد و دروست لەسەر ئەو دوو هاووڵاتییە لە بەردەستدا نییە. بە وتەی سەرچاوەیەکی ئاگادار، بارودۆخ و هەروەها شوێنی ڕاگرتنی ئەو دوو دەستبەسەرکراوە لەم ماوەیەدا ناڕوون و نادیار بووە و ئەمەش بووەتە هۆکاری زیاتربوونی نیگەرانییەکان لەسەر تەندروستییان. لوقمان پێشیار و حەسەن مەردانی، دوو هاووڵاتیی خەڵکی شاری بۆکان ڕۆژی پێنجشەممە، ١٩ی پووشپەڕ لەلایەن هێزە ئەمنییەکانی ڕژیم لەو شارە دەستبەسەر کراون و بۆ شوێنێکی نادیار گواسترانەتەوە.