بەیانی ڕۆژی یەکشەممە ٢٣ی ڕەزبەر، ئاژانسی هەواڵی سووری سانا بڵاویکردەوە، درەنگانێکی شەوی رابردوو فڕۆکە جەنگییەکانی سپای ئیسرائیل بۆردوومانی بەرزاییەکانی جۆلان و فڕۆکەخانەی حەلەب و چەند ناوچەیەکی سوورییەیان کردووە.
سەرچاوەیەکی سەربازی کە زانیارییەکانی بە ئاژانسی هەواڵی سووری داوە، ئاماژەی بەوە کردووە، بۆردوومانەکەی ئیسرائیل کاتژمێر ١١ و ٣٠ خولەکی شەوی رابردوو بۆسەر فڕۆکەخانەی حەلەب دەستیپێکردووە و زیانێکی ماددی زۆری بە فڕۆکەخانەکە گەیاندووە، هەروەها بووەتە هۆی وەستانی گەشتە ئاسمانییەکانی فڕۆکەخانەکە. لە لایەکی دیکەوە، سپای ئیسرائیل لە راگەیەنەدراوێکدا لەبارەی هێرشە ئاسمانییەکانی بۆ سەر چەند ناوچەیەکی سوورییە ئاماژەی بەوە دا، دوای ئەوەی لە بەرزاییەکانی جۆلانی سنووری سوورییەوە چەند مووشەکێکیان ئاراستەکراوە، وەڵامی مووشەکەکانیان داوەتەوە و خاڵی هەڵدانی مووشەکەکانیان لە سوورییە بۆردوومان کردووە.