بەکردەوە دەرهێنانی سزای سێدارەی ژنێکی زیندانی لە بەندیخانەی کرمان
چوارشەممە ۲۴-۰۸-۱۴۰۲ | 15-11-2023
بەرەبەیانی ڕۆژی چوارشەممە ٢٤ی خەزەڵوەر، سزای سێدارەی ژنێکی زیندانی بە ناوی زەرخاتوون مەزارزێهی، تەمەن ٤٦ ساڵ، خەڵکی سەراوان و دانیشتووی خاش سەر بە پارێزگای سیستان و بەلووچستان لە بەندیخانەی ناوەندیی کرمان جێبەجێکرا. زەرخاتوون مەزارزێهی کە سەرپەرەست و دایکی منداڵێکی کچ بووە، شەش ساڵ لەمەوبەر لە ڕێگەی کرمان_شیراز دەستبەسەرکرابوو و دواتر لەلایەن دەزگای دادوەریی کۆماری ئیسلامیەوە بە تۆمەتی پەیوەندیدار بە مادە هۆشبەرەکان سزای سێدارەی بەسەردا سەپێندرابوو. بەپێی ئامارە تۆمارکراوەکان لە سەرەتای ئەمساڵەوە لانیکەم سزای سێدارەی ١٦ ژنی زیندانی لە بەندیخانەکانی ڕژیمدا جێبەجێکراوە.