کاتژمێر ١١ و ٣٠ دەقیقەی شەوی دووشەممە لەسەر سێشەممە بەرابەر لەگەڵ ١٥ی ژانویە، سپای پاسدارانی ڕژیمی ئیسلامی چەند شوێنی لە شاری هەولێر لەوانە فڕۆکەخانەی هەولێر، چەند ماڵ و بینای دەوروبەری کۆنسوولخانەی ئەمریکا لەمشارەی بە ١٠ مووشەکی بالستیک و ژمارەیەکی زۆر درۆن کردە ئامانج. ئەم مووشەکانە لە قەرارگای سپای پاسداران لە کرماشانەوە هاویشترابوون.
سپای پاسداران بەرپرسایەتیی ئەنجامدانی ئەم هێرشانەی گرتە ئەستۆ و لە سێ ڕاگەیاندنی کورت و ناتەبادا ڕایگەیاند کە ئامانجی ئەم هێرشانە تۆڵەسەندنەوە لە جەنایەتی تەقینەوەکەی کرمان بووە. لە ڕاگەیاندنێکی دیکەدا نووسیی کە ناوەندە سیخوڕییەکانی ئیسرائیل و کۆبوونەوەی تیرۆریستەکانی لە هەولێر کردووەتە ئامانج. هەروەها لە ڕاگەیاندنێکی دیکەدا باسی لەوە کرد کە ناوەندەکانی چالاکی ڕژیمی سەهیۆنیستی لە ناوچەکە و مەقەڕاتی گرووپە ئۆپۆزیسیۆنە کوردە ئێرانییەکانی لە هەولێر کردووەتە ئامانج.
بەهۆی ئەم هێرشانەوە چوار کەس گیانیان لەدەستدا کە یەکیان منداڵێکی ساوای شیرخۆر بووە و شەش کەسی دیکەش برینداربوون. هەروەها زەرەر و زیانێکی زۆریش وەبەر ماڵ و بیناکانی دەوروبەر کەوتووە و خەڵکی هەولێر و شارەکانی دەوروبەری تووشی شۆک و نیگەرانی کردووە.
بێگومان ڕژیمی کۆماری ئیسلامی کە لەگەڵ قەیرانی چارەهەڵنەگری ئابووری، سیاسی و کۆمەڵایەتی و لەگەڵ شەپۆلی ناڕەزایەتیی کرێکاری و جەماوەری لە ئێران بەرەوڕووە و شکستێکی سەرشۆڕانە لە گاڵتەجاڕی هەڵبژاردنەکانی داهاتوو چاوەڕوانی دەکات، دەیهەوێ بە توندکردنەوەی کەشوهەوای ئەمنیەتی لە ناوەوە و بە پێکێهنانی دۆخی جەنگی و ماجەراجویی نیزامیی لە دەرەوەی سنوورەکان بیروڕای گشتیی خەڵکی ئێران بەلاڕێدا بەرێت. ئەم دەخاڵەتگەری و ماجەراجوییە نیزامییانە لە ئیدامەی قەیرانی هەستەییدا بەشێک لە نزاع و کێشمەکێشی کۆنەپەرستانەی ڕژیمی کۆماری ئیسلامی لەگەڵ ئەمریکایە کە لە ناوەوەی ئێراندا ئاکامێکی بێجگەلە پەرەسەندنی هەژاری و نەهامەتیی ئابووریی نەبووە. لە دەرەوەی سنوورەکانی ئێرانیش بێجگەلە پێکهێنانی نائەمنی و کوشتار و وێرانی دواهات و دەرئەنجامێکی دیکەی بۆ خەڵکی ناوچەکە نەبووە. بێگومان دووکەڵی ئەم شەڕنانەوە و کێشمەکێشە کۆنەپەرستانەیە دەچێتە ناو چاوی خەڵکی ستەملێکراوی ئێران و ناوچەکەوە.
کۆمەڵە – ڕێکخراوی کوردستانی حیزبی کۆمۆنیستی ئێران، هێرشی مووشەکی و درۆنیی ڕژیمی ئیسلامی بۆسەر کوردستانی عێراق بە هەوڵێکی شەڕخوازانە لەلایەن کۆماری ئیسلامی لەپێناو پەرەپێدانی شەڕی کۆنەپەرستانە و ناسەقامگیریی ناوچەکە دەزانێت و بەتوندی مەحکوومی دەکات. خەڵکی کوردستانی عێراق تەنها بە بەشدارییان لە گۆڕەپانی سیاسی و بە ناڕەزایەتیی جەماوەری بەدژی ئەم هێرش و دەستدرێژییە ئاشکرایە دەتوانن کۆماری ئیسلامی لە درێژەدانی ئەم سیاسەتە پاشگەز بکەن.
کۆمیتەی ناوەندیی کۆمەڵە – ڕێکخراوی کوردستانی حیزبی کۆمۆنیستی ئێران
٢٦ی بەفرانباری ١٤٠٢ی هەتاوی
١٦ی ژانویەی ٢٠٢٤ی زایینی