ڕێکخراوی نێودەوڵەتی ڕایگەیاندووە، بەهۆی ئاگرگرتنی بەلەمێک ٤٠ کۆچبەری خەڵکی هائیتیی گیانیان لەدەست داوە و ٤٠ کەسی دیکەش لە مردن ڕزگار کراون.
بەگوێرەی ئاژانسی هەواڵنێریی ڕۆیتێرز، ڕێکخراوی نێودەوڵەتی کۆچ لە هائیتیی، لە بەیاننامەیەکدا ڕایگەیاندووە، بەلەمەکە زیاتر لە 80 کەسی هەڵگرتبوو و لە فۆرت سانت میشێل لە باکووری هائیتییەوە بەرەو دوورگەکانی تورکس و کایکۆس دەچوو. ئاماژەی بەوەش دا، 40 کۆچبەر لە ئاگرەکە ڕزگاریان بووە و لەلایەن پاسەوانی لێوارئاوەکانی هایتییەوە ڕزگار کراون و ئێستا لە ژێر چاودێریدان. هەروەها ڕێکخراوی نێودەوڵەتی کۆچ یارمەتییان پێشکەش دەکات و 11 کەسیان گواستراونەتەوە بۆ نزیکترین نەخۆشخانە.
بەپێی داتاکانی ڕێکخراوی نێودەوڵەتی کۆچ، زیاتر لە سێ هەزار و 300 هاووڵاتی هائیتیی لە خاکی تورکس و کایکۆسی بریتانیا، زیاتر لە دوو هەزار کەس لە دورگەی باهاما و نزیکەی هەزار و 900 هاووڵاتی دیکەش لە ئەمریکاوە دیپۆرت کراونەتەوە.