لەئێستادا و لەبارودۆخێکدا کە بەشێک لە هێزە ئۆپۆزیسیۆنەکانی بورژوازیی ئێران لە ڕووی داماوییەوە، بە فشاری ترامپ و یان هێندێکی تر بە هێرشی مووشەکیی ئەرتەشی ئیسرائیل ئومێدیان بەستووە و هێندێکیشیان لەو باوەڕەدان کە دوای ڕووخانی دەسەڵاتی بەشار ئەسەد لە سووریە نۆرەی ڕووخاندنی کۆماری ئیسلامی لە تاران دێت، بابەتی سەرەکی ئەوەیە کە چۆن دەتوانین پێشڕەویی بزووتنەوەی شۆڕشگێڕانە بۆ ڕووخاندنی کۆماری ئیسلامی زەمانەت بکەین. ڕووخاندنی شۆڕشگێڕانەی کۆماری ئیسلامی بابەتێکی مومکینە. قەیرانەکانی کۆماری ئیسلامی قووڵتر و بەربڵاوتر لەوەن کە ڕژیم بتوانێ بەرەنگاریان بێتەوە. جگە لە قەیرانە قووڵە ئابووری و کۆمەڵایەتییەکان، ئاڵوگۆڕەکانی ئەم دواییەی ڕۆژهەڵاتی ناوەڕاست بۆ جارێکی تر نیشانی دا کە ستراتێژی ناوچەیی “شەڕی پێشگیرانە”ی ڕژیمی کۆماری ئیسلامی بەتەواوی بەرەوڕووی شکست بووەتەوە. شکستی حیزبوڵڵا لە لۆبنان لە ئاکامی ئەو زەربە سەختانەی کە ئیسرائیل لێی دا، بەمانای شکستی نەخشە ستراتێژیکەکانی کۆماری ئیسلامییە. ڕووخانی ڕژیمی بەشار ئەسەد لە سووریە کە نەخشی ستوونی سەرەکیی هێزەکانی میحوەری موقاومەتی ڕژیمی کۆماری ئیسلامیی بوو لە هەمان کاتدا بەمانای ڕووخانی ڕژیمی کۆماری ئیسلامی لەم وڵاتەیە. لەئێستادا و دوای شکستی حیزبوڵڵا لە لۆبنان و ڕووخانی ڕژیمی دیکتاتۆریی بەشار ئەسەد هێزەکانی میحوەری موقاومەتی ڕژیمی کۆماری ئیسلامی لە ناوچەکەدا لێکهەڵوەشاون. پایەکانی دەسەڵاتی کۆماری ئیسلامی لەبەرچاوی خەڵک یەک لە دوای یەک دەڕووخێن. بێگومان ئەم شکستە ستراتێژیکانە لە هەمان کاتدا کە شەڕ و ناکۆکیی نێوان باندەکانی حکوومەت زیاتر پەرەپێدەدات و قەیرانی حکوومەت قووڵتر دەکاتەوە، بزووتنەوە ناڕەزایەتییەکانیش تەعەڕوزیتر دەکات. لە بارودۆخی ئێستادا داماوی و بێتوانایی ڕژیم لە وڵامدانەوە بە داخوازیی بزووتنەوەی مانگرتنی کرێکاران، خانەنشینان، پەرستاران، موعەلیمان و خوێندکاران و باقی بزووتنەوە ناڕەزایەتییەکان گەشەسەندنی سیاسیی ئەم بزووتنەوانە و سەرهەڵدانی ئاخێزی جەماوەریی خستووەتە ئاسۆوە.
حکوومەتی ئیسلامی بە هەموو باڵەکانییەوە پەرەپێدانی سەرکوتی کردووەتە ستراتێژی ڕاگرتنی دەسەڵاتەکەی. بەڵام ئەزموونی هەموو حکوومەتە دیکتاتۆرەکان و ئەزموونی ڕووخانی دیکتاتۆریی بەشار ئەسەد لە سووریە نیشانی دا کە بە پشت بەستن بە ستراتێژی سەرکوت ناتوانن حکوومەت لە مەترسیی ڕووخان ڕزگار بکەن. ئەم ڕژیمە بۆ مانەوەی خۆی بە حیزبی پادگانیی سپای پاسداران کە تۆڕەکانی سیخوڕی و مافیایی و سەرکوتی بە بەرینایی هەموو ئێران پەرەپێداوە، پشت ئەستوورە. بەڵام ئەگەر هێزی یەکگرتوو و یەکپارچەی کرێکاران لە ناوەندەکانی بەرهەمهێنان بە چەکی مانگرتنەوە بکەوێتە حەرەکەت و ببێتە بڕبڕەی پشتی ناڕەزایەتی و مانگرتنی سیاسی دەتوانێ ماشێنی سەرکوتی سپای پاسداران ئیفلیج و زەمینگیر بکەن.
ئەزموونی ئاخێز و بزووتنەوە ئینقلابییەکانی حەوت ساڵی ڕابردوو لە ئێران و ئەزموونی شۆڕشەکان نیشانیان داوە کە کەمینەیەک دەتوانێ شۆڕش وەڕێبخات. بەڵام ئەگەر هێزی سەرەکی شۆڕش نەیەتە مەیدان ئەم کەمینەیە ناتوانێ شۆڕش بەسەکەوتن بگەیەنێت. لێکدانەوە و هەڵسەنگاندنی دینامیزم و هێزی بزوێنەری شۆڕش لە ئێران ئەوەمان پێ دەڵێ کە بە بێ بەشداریی بزووتنەوەی سۆسیالیستیی چینی کرێکار لە گۆڕەپانی سیاسیی کۆمەڵگا، پێشڕەویی بزووتنەوەی شۆڕشگێڕانە بۆ ڕووخاندنی کۆماری ئیسلامی زەمانەت ناکرێت. ئەزموونی هەموو شۆڕشەکان لە سەدەی بیستەم و ئاخێزە ئینقلابییەکان لە سەدەی بیست و یەک و ئەزموونی شۆڕشە ئینقلابییەکانی ساڵانی ڕابردووی ئێران نیشانیان داوە کە لە بارودۆخی ئەمڕۆی ئێراندا مانگرتنی سەرتاسەریی کرێکاران لە ناوەندە سەرەکییەکانی بەرهەمهێنان و خزمەتگوزاری کە بووبنە بڕبڕەی پشتی مانگرتنی گشتی و سیاسی، موحتەملترین ڕەوتی پێشڕەویی شۆڕشە. هەر شۆڕشگێڕێکی ڕاستەقینە کە خوازیاری ڕووخاندنی شۆڕشگێڕانەی ڕژیمی کۆماری ئیسلامییە پێویستە بۆ هێنانە مەیدانی بزووتنەوەی سۆسیالیستیی چینی کرێکار تێبکۆشێت. چینی کرێکار زۆرینەی جەمعیەتی ئێران پێکدێنێ و بەلەبەرچاوگرتنی پێگەی گرینگ و چارەنووسسازی لە بەرهەمهێنانی کۆمەڵایەتی، بەسەرەنجدان بە پێگەیەک کە لە سەنعەتە سەرەکییەکاندا هەیەتی، دەتوانێ چەرخی ئابووریی حکوومەتی ئیسلامیی سەرمایەداران و سەرچاوەی دابینکردنی هێزی سەرکوت و بوروکراسیی دەوڵەتی ئیفلیج و زەمینگیر بکات. ڕاستە بۆ جێبەجێکردنی ئەم ئەرکە چینی کرێکار دەبێت بەسەر پەرتەوازەبوونی ڕیزەکانیدا زاڵ بێت و دەرفەتی زاڵبوونی بەسەر لاوازییەکانی خۆیدا هەبێت. بەڵام چینی کرێکاری ئێران ئەم دەرفەتەی لەڕێگەی وەڕێخستنی بزووتنەوەی مەزنی ناڕەزایەتی و مانگرتنەوە خوڵقاندووە. لەئێستادا بزووتنەوەی کرێکاریی ئێران لە بواری بەڕێوەبردنی ناڕەزایەتی و مانگرتندا یەکێکە لە چالاکترین بزووتنەوە کرێکارییەکانی جیهان. بێگومان چینی کرێکاری ئێران بەسەرنجدان بەو دەرفەتەکەی کە لەڕێگەی بزووتنەوەی مانگرتنی خۆیەوە ڕەخساندوویەتی، ئەویش لەم قۆناغە شۆڕشگێڕانەیەدا، دەتوانێ بەسەر ئەم خاڵە لاوازانەدا زاڵ بێت. لە هەنگاوی یەکەمدا پێویستە هەوڵ بدرێت چینی کرێکار داخوازییە ئابوورییەکانی خۆی لەگەڵ خواستی سیاسیی گونجاو لەگەڵ ئەم قۆناغە شۆڕشگێڕانەیە ئاوێتە بکات. لەئێستادا بەرژەوەندی چینایەتی و خەباتی سیاسیی چینی کرێکار دەخوازێت کە ئاڵای خەبات بۆ ئازادیی گشت بەندکراوانی سیاسی، ئاڵای خەبات بۆ هەڵوەشاندنەوەی سزای ئێعدام، ئاڵای خەبات بۆ هەڵوەشاندنەوەی یاسای حیجابی زۆرەملی و ئاڵای خەبات دژبە شەڕخوازی لە دەستی چینی کرێکاردا بێت. ئێستا کاتی ئەوەیە کە شەڕی کۆماری ئیسلامی بەرانبەر ژنان لەسەر مەسەلەی حیجاب بکەینە شەڕی هەموو کۆمەڵگا لەدژی کۆماری ئیسلامی. ئێستا کاتی ئاوێتە کردنی داخوازیی ئابووری و داخوازیی سیاسییە. کاتی ئەوەیە کە چینی کرێکار ئاڵای خەبات بۆ ڕووخاندنی کۆماری ئیسلامی بگرێتە دەست. ڕووخاندنی شۆڕشگێڕانەی کۆماری ئیسلامی بە ڕێبەریی چینی کرێکار نەک هەر لە ڕوانگەی بەرژوەندی چینی کرێکار و بزووتنەوەی ئازادیخوازی و بەرابەری تەڵەبی لە ئێران بووەتە زەروورەت و پێویستییەکی سیاسی، بەڵکوو لە ڕوانگەی بەرژوەندی کرێکاران لە ناوچەی ڕۆژهەڵاتی ناوەڕاست و بزووتنەوەی ئازادیخوازی لەم ناوچەیە و جیهانیش ئاڵوگۆڕێکی گرینگ بە حیساب دێت.