لەگەڵ ڕووخانی دیکتاتۆرییەتی ٥٣ ساڵەی ئەسەد لە سووریە کە بەرهەمی ڕێککەوتنی پشتی پەردەی نێوان دوو جەمسەری ئیمپریالیستی بەشدار لە ئاڵوگۆڕەکانی ناوچەکەیە، حکوومەتی فاشیستی ئەردۆغان لەم دەرفەتە کەڵکی وەرگرتووە و بە بەکارهێنانی هێزە نیابەتییە کۆنەپەرستەکانی لەوانە “ئەرتەشی ئازادی سووریە”، هێرشی وەحشیانەی خۆی بۆسەر ناوچەکانی ژێر کۆنتڕۆڵی ئیدارەی خۆبەڕێوەبەری کوردستان پەرەپێداوە. ئەرتەشی تاوانکاری تورکیە بە هەماهەنگی لەگەڵ بەکرێگیراوانی تیرۆریستی ناوخۆیی، منبج و تەل ڕەفعەت، دوو شاری گرینگی کوردستانی سووریەی داگیر کردووە و بەردەوامە لە بوردومانکردنی قامیشلۆ و ناوچەکانی دیکە.
ئەرتەشی تورکیە و هێزە تیرۆریستە بەکرێگیراوەکانی لە سووریە کە ساڵەهایە شارەکانی کوردستان لەوانە کۆبانی و عەفرینیان کردووەتە ئامانج، بەم هێرشە دڕندانەیە نەتەنیا دەیان کەس لە خەڵکی بێدیفاعیان کوشتووە و بریندار کردووە و زەرەر و زیانی بەرینی ماددییان لەم ناوچەیە داوە، بەڵکوو مەترسیی پەرەسەندنی شەڕی ناوخۆییشیان لە سووریە کردووەتە ئەمری واقع. ئەگەرچی ئاسمانی سووریە بەکردەوە لە ژێر کۆنتڕۆڵی ئەمریکا و حکوومەتی فاشیستی ئیسرائیلدایە، بەڵام لەسەر زەوی، ئەم بۆمباران و هێرشە دڕندانە بەبێ هەماهەنگی لەگەڵ ئەمریکا و حکوومەتی ئیسرائیل ئەنجام نادرێن. حکوومەتی کۆنەپەرستی ئەردۆغان کە خەونی زیندووکردنەوەی ئیمپراتۆرییەتی عوسمانی دەبینێت، بەتەمانە سوود لەو بۆشاییە وەربگرێت کە لەدوای ڕووخانی بەشار ئەسەدی دیکتاتۆر دروست بووە و جوگرافیای ژێر دەسەڵاتی خۆی لە سووریە پەرەپێبدات و بەوەش پێگەی خۆی وەک هێزێکی یەکلاکەرەوە لە حکوومەتی داهاتووی سووریەدا پتەو بکات.
ئەردۆغان لە پەیوەندی سیاسی و خەباتکارانەی خەڵکی مافخوازی کورد ئاگادارە و ئیدارەی خۆسەری کوردستانی سووریە، دەستکەوتە بەرینەکانی ژنان و پیاوانی ئازادیخواز لەم ناوچەیە و بوونی میلیشیایەکی جەماوەریی دەیان هەزار کەسی بە هەڕەشەیەکی جددی بۆ سەر دەسەڵاتی خۆی دەبینێت تەنانەت لە ناو تورکیەشدا. دەوڵەتی فاشیستی تورکیە حەماسە و توانا و زەرفیەتێک کە هێزی چەکداری پێکهاتوو لە دەیان هەزار ژن و پیاوی ڕەزمەندەی کوردستانی سووریە بەرانبەر بە هێزی کونەپەرست و دڕندەی داعش لەخۆیان نیشانیان دا، بە هەڕەشەیەکی جددی بۆ سەر دەسەڵاتی خۆی دەبینێت کە لەسەر بنەمای دیکتاتۆری و سەرکوت دامەزراوە. دوژمنایەتی و سیاسەتی دژەئینسانی و ڕەگەزپەرستانەی ئەردۆغان دەرهەق بە نەتەوەی ستەمدیدەی کورد سنوور ناناسێت و لەم شەڕە نایەکسانەدا هەموو پەیمان و ڕێککەوتنە نێودەوڵەتییەکانی پێشێل کردووە.
بێگومان ڕێگای بەرگریکردن لە دەستکەوتەکانی هەتا ئێستای کوردستانی سووریە، داواکردنی پشیتوانی لە دەوڵەتە کۆنەپەرستەکانی ئەمریکا و ئیسرائیل نییە. سیاسەت، بەرژوەند و سرووشتی دەوڵەتە ئیمپریالیستەکان هەمیشە لە بەرامبەر بەرژوەندی جەماوەری کرێکار و زەحمەتکێشدایە. خۆشباوەڕی و چاوبڕین لە پشتیوانیی ئەمریکا و ئیسرائیل کە دەیان ساڵە ڕوویان کردووەتە هەر شوێنێک چارەنووسی خەڵکی ستەملێکراو و بێدیفاع و مافەکانیان کردەووتە فیدای بەرژوەند و قازانجپەرەستیی بێسنووریان، سیاسەتێکی وێرانکەر و زیانبەخشە بۆ داهاتووی ئەم خەڵکە چەوساوەیە و خەباتی بەردەوامیان بۆ ڕزگاری. چارەنووسی عێراق، ئەفغانستان، سووریە، لیبی و دەیان نموونەی دیکە لە شەڕ و دەستتێوەردانی ئیمپریالیستەکان سەلمێنەری ئەم ئیدیعا و ئەزموونەیە.
خەڵکی ستەمدیدەی کوردستان لە سووریە تەنیا بە پشت بەستن بە هێزی ڕێکخراوی خۆیان و تەنیا بە یەکگرتوویی و هاوپشتی لەگەڵ خەڵکی ئازادیخواز و پێشکەوتنخواز لە سەرتاسەری سووریە و بە پشیتوانیی نێونەتەوەیی دەتوانن لە دەستکەوتە دیموکراتیکەکانی هەتا ئێستای خۆیان بەرگری بکەن. ئەزموونی خەبات دژبە داعش و بەرخۆدانی سەربەرزانەی کۆبانی و عەفرین، ئەم ڕاستییەی سەلماندووە. خەڵکی ستەمدیدەی کوردستانی سووریە پێویستە داکۆکیکارانی ڕاستەقینەی خۆیان لەناو خەڵکی ئازادیخواز و بەرابەری تەڵەبی سووریە و ناوچەکە و سەرتاسەری جیهاندا بدۆزنەوە.
دیکتاتۆریی بەشار ئەسەد بە سات و سەودای پشتی پەردەی دەسەڵاتە ئیمپریالیستەکان ڕووخا بەڵام خەڵکی وەگیانهاتووی سووریە بۆ گەیشتن بە ئازادی، ئەمنیەت و ڕزگاریی ڕاستەقیە ڕێگایەکی دوورودرێژیان لەبەرە. ئازادی و ڕزگاریی یەکجاریی ئەو خەڵکەی کە ساڵەهای ساڵە ناچار بوون شەڕ و ئاوارەیی تەحەمول بکەن، تەنیا بە بەشداریی چالاکانەی کرێکاران، زەحمەتکێشان، ژنان و پیاوانی هوشیار و ئازادیخواز بە ئاسۆی گەش و ڕادیکاڵەوە دێتە دی.
خەڵکی ستەملێکراوی کوردستانی سووریە لەم بارودۆخە ئاڵۆز و پڕ لە مەترسییەدا بەتایبەت لە بەرامبەر هێرشی وەحشیانەی دەوڵەتی فاشیستی ئەردۆغان و بەکرێگیراوانیدا، شایەنی زۆرترین پشیتوانین لە ئاستی ناوچەیی و جیهانیدا. ئێمە وێڕای مەحکووم کردنی ئەم هێرشە وەحشیانەیە و ڕاگەیاندنی هاوخەباتی لەگەڵ خەڵکی مافخواز لە کوردستانی سووریە، لە خەڵکی ناوچەکە و کوردستان و هەموو ڕێکخراوە چەپ و ئازادیخوازەکان داواکارین کە لەدژی ئەم داگیرکارییە و لەدژی سیاسەتی دژەئینسانیی دەوڵەتی کۆنەپەرستی تورکیە ناڕەزایەتی دەربڕن.
شۆرای هاوکاریی هێزە چەپ و کۆمۆنیستەکانی کوردستان
١١ی دێسامبری ٢٠٢٤