گیان لەدەستدانی کۆڵبەرێک بەهۆی سەرمابردوویی لە سنووری مەریوان
هەینی ۱۲-۱۱-۱۴۰۳ | 31-01-2025
بەپێی ڕاپۆرتەکان، شەوی پێنجشەممە ١١ی ڕێبەندان، تەرمی مەهیار سەفەری کۆڵبەری تەمەن ٢١ ساڵ و خەڵکی شاری مەریوان کە بەهۆی سەرمابردووی گیانی لە دەستدابوو، لەلایەن خەڵکەوە دۆزرایەوە.
مەهیار سەفەری شەوی دووشەممە ٨ی ڕێبەندان لە کاتی کۆڵبەریدا لە سنووری “هەنجیران”ی شاری مەریوان ون ببوو. بەوتەی سەرچاوەیەکی ئاگادار و یەکێک لەو کەسانەی کە تەرمی ئەم کۆڵبەرەی دۆزیوەتەوە، مەهیار سەفەری بە هۆی کەوتنە خوارەوە لە شاخ بریندار بووە و توانای ڕۆیشتنی نەبووە هەر لەوێ لە سەرمادا گیانی لەدەستداوە. شایانی باسە، تەرمی ئەم کۆڵبەرە لاوە بۆ پزیشکی دادوەری شاری سلێمانی لە هەرێمی کوردستان گواستراوەتەوە.