کیانووش چراغی تەمەن ٤٤ ساڵ، بەندکراوی سیاسیی و خەڵکی دێهلوڕان، چاردەهەمین ڕۆژی مانگرتن لە خواردنی لە زیندانی ناوەندیی ئیلام تێپەڕ دەکات.
ئەو هاووڵاتییە کە بەنیشانەی ناڕەزایەتیی دەربڕین سەبارەت بە هەڵوەشاندنەوەی حوکمی پێبەندی ئەلیکترۆنییەکەی و دووبارە گواستنەوەی بۆ زیندان مانی لە خواردنی ویشک گرتبوو، لە دە ڕۆژ پێشترەوە لێوی خۆی دووریوەتەوە. بەپێی ڕاپۆرتکان، ئەو هاووڵاتییە لە ڕۆژی یەکشەممە ٢٨ی ڕێبەندان، بۆ ماوەی ٩ ڕۆژ لە زیندانی ناوەندیی ئیلام مانی لە خواردنی ویشک گرتبوو، و دواتر لە دووەمین مانگرتنیدا لە ڕۆژی یەکشەممە ١٢ی ڕەشەممە تا ئێستا، مانی لە خواردن گرتووە کە حەوت ڕۆژی سەرەتایی مانی لە خواردنی تەڕ و حەوت ڕۆژی دوایین مانی لە خواردنی ویشک گرتووە. کیانووش چراغی لەحاڵێکدا کە لەم دواییانەدا لەژێر چاودێریی پێبەندی ئەلیکترۆنی لە زیندانی ئیلام ئازاد کرابوو، مانگی ڕێبەندان بە ڕای لقی ٦ی دادگای پێداچوونەوەی پارێزگای ئیلام، حوکمەکەی هەڵوەشێندرایەوە و جارێکی دیکە بە لێدان و بێڕێزییەوە دەستبەسەر و بۆ زیندان گواسترابوویەوە.