Komala

سەرلە بەیانیی ئەمڕۆ یەکشەممە ٢٦ی ڕەشەممە، حوکمی ئێعدامی “موژگان ئازەرپیشە” تەمەن ٣١ ساڵ و خەڵکی ورمێ و “کەوسەر باقرنژاد” تەمەن ٢٤ ساڵ و خەڵکی نەغەدە لە زیندانی ناوەندیی ورمێ جێبەجێ کرا.
بەپێی ئەم ڕاپۆرتە، موژگان ئازەرپیشە شەش ساڵ لەمەوبەر و کەوسەر باقرنژاد چوار ساڵ پێش بە تۆمەتی “کوشتنی بە ئەنقەست” لە دوو دۆسیەی جیاوازدا دەستبەسەر کرابوون و لە لایەن دەزگای دادوەریی کۆماری ئیسلامییەوە و حوکمی ئێعدامیان بەسەردا سەپێندرابوو. هاوکات دوو بەندکراوی دیکە بە ناوەکانی “ئەرشەد فەرازبەند” تەمەن ٢٨ ساڵ و خەڵکی ناوچەی “مەرگەوەڕ”ی سەربە ورمێ و “حامێد فەرەجی” تەمەن ٢٨ ساڵ و خەڵکی ورمێ،  کە هەرکام سێ و پێنج ساڵ لەمەوبەر بە تۆمەتی “کوشتنی بە ئەنقەست” دەستبەسەر و بە ئێعدام مەحکووم کرابوون، ئەمڕۆ یەکشەممە حوکمەکەیان لە زیندانی ناوەندیی ورمێ بەکردەوە دەرهات.