بەپێی ڕاپۆرتەکان، بەهۆی بایکۆتکردنی کڕینی کاڵا و کەلوپەلەکان، ١٦ کەس لە لایەن هێزە ئەمنییەکانی ئیستانبۆل، دەستبەسەر کراون.
بەپێی ئەم ڕاپۆرتە، بە ئامانجی پشتیوانیی لە ئەکرەم ئیمامئۆغڵو، سەرۆکی دەستگیرکراوی گەورە شارەوانیی ئیستانبۆل، هەڵمەتێکی بایکۆتکردنی کڕینی کاڵا و براندەکان لە تورکییە بەڕێوەچوو. بە گوێرەی زانیاریی میدیاکانی تورکییە، درەنگانی شەوی ڕابردوو بەتۆمەتی “بانگەشەکردن بۆ بایکۆتکردنی کاڵاکان لەسەر تۆڕە کۆمەڵایەتییەکان”، 16 کەس لە ئیستانبۆل دەستبەسەر کراون. لە لایەکی دیکەوە، دەستپێشخەری دەنگی پارێزەران کە لە ژمارەیەک پارێزەر پێکهاتوون ڕایگەیاندووە، هێزە ئەمنییەکان لیستێکیان بۆ دەستبەسەر کردنی ١٦ کەسی دیکە ئامادە کردووە و پێشبینی دەکرێت، ژمارەی دەستبەسەرکراوان زیاد بکات. ئاشکراشی کردووە، ئەوانەی دەستبەسەرکراون بە تۆمەتی تێکدانی ئابووری تورکییە دادگایی دەکرێن.