پاسەوانی سنوورە ئاوییەکانی یۆنان ڕۆژی پێنجشەممە ١٤ی خاکەلێوەی ١٤٠٤ ڕایگەیاند، تەرمی چوار کۆچبەری نایاسایی لە دەریای ئیجە دۆزراوەتەوە و دواتر دوای گەڕانی تیمەکانی پاسەوانی سنوور، سێ تەرمی دیکەش دۆزرانەتەوە.
هەروەها ئاماژەیان بەوەش کردووە کە ئەو بەلەمەی تێکشکا بوو، نزیکەی ٣٠ کۆچبەری تێدا بووە و بەهۆی خراپی کەشوهەوا نقووم بووە. شایانی باسە، ئەم کۆچبەرانە لە کەناراوەکانی تورکییەوە بە قاچاخ بەرەو سنوورەکانی یونان بەڕێ کەوتوون، ئەمەش لە کاتێکدایە مانگی ڕابردوو، کۆچبەرێکی نایاسایی لە لێوار ئاوەکانی یونان بە خنکاوی دۆزرایەوە و ١٨ کۆچبەری دیکەش لە خنکان ڕزگار کرابوون. بە گوێرەی ئامارەکانی ئاژانسی پەنابەرانی سەر بە نەتەوە یەکگرتووەکان، لە سەرەتای ئەم ساڵەوە تاوەکوو ئێستا، نزیکەی ٩ هەزار کۆچبەر لە ڕێگەی دەریاوە گەیشتوونەتە یۆنان. هەروەها بەپێی ئامارێکی فەرمی ڕێکخراوی نەتەوە یەکگرتووەکان، ساڵی رابردوو، زیاتر لە ٥٤ هەزار کۆچبەر هەوڵی پەڕینەوەیان داوە بۆ وڵاتانی ئۆرووپا کە لە نێویاندا، نزیکەی ٢ هەزار و ٥٠٠ کۆچبەر لە دەریادا خنکاون.