مانگرتن لە خواردن و ناڕەزایەتیی کرێکارانی سەنعەتی ئاڵمینیۆمی ئەراک ٤٥ ڕۆژی تێپەڕاند. ئەم کرێکارە زەحمەتکێش و تێکۆشەرانە بەهۆی فشاری ئابووری و لەخوارێ بوونی ئاستی بژێویان بڕیاریان دا بە ناڕەزایەتیی بەکۆمەڵ و مانگرتن، لەدژی بارودۆخی سەختی کار کە ژیانیانی بەرەوڕووی گەلێک کێشە و ئاستەنگی کردووەتەوە، کاردانەوە نیشان بدەن. هاوڕێیانی کرێکار، پاش بایەخ نەدانی خاوەنکار و بەڕێوەبەرایەتیی کارخانە بە ناڕەزایەتی و داخوازییەکانیان، بڕیاریان دا مانگرتن لە خواردن بەڕێوەبەرن. چوار هەزار کرێکار لەم مانگرتنەدا بەشدارن. داخوازییە سەرەکییەکانی کرێکارانی مانگرتووی سەنعەتی ئاڵمینیۆمی ئەراک بریتین لە:
- پێداچوونەوە و جێبەجێ کردنی گەڵاڵەی ڕیزبەندیی پیشەکان
- پێدانی سەری وەختی حەقدەست
- گۆڕینی کەرەستەی کۆنە و پرتووکاوی بەرهەمهێنان بۆ ڕێگری کردن لە داخرانی شیرکەت
- لەبەرچاوگرتنی ستانداردە ئیمەنییەکانی کار
- کۆتایی هێنان بە فشار و ئازاری بەشی مودیرییەت
- بێدەسەڵات کردنی سەهامداری سەرەکیی بەشی خسووسی – دەوڵەتی کە بە کەڵک وەرگرتن لە ڕانتی دەوڵەتی، سەهامی کارخانەی داگیر کردووە و بەپێی بەرژەوەندی هەوڵ دەدات ئەم کارخانە گەورە و سەرەکییە بەرەو وەرشکستەیی و داخران بەرێت.
لە بارودۆخێکدا کە فشاری بەرینی ئابووری و سیاسی ژیان و گوزەرانی کرێکارانی بەرەو هەژاری و نابوودی بردووە، تەسەوری گۆڕینی بنەڕەتیی بارودۆخ بە قازانجی کرێکاران و زەحمەتکێشان لە ژێر دەسەڵاتی ئێستادا ئاواتێکی مەحاڵە. چونکە هۆکاری ئەم نابەسامانی و نابەرابەرییانە، خاوەنکاران، سەرمایەداری و دەسەڵاتی سیاسییە کە مانەوەی خۆی لە چەوساندنەوەی کرێکاران، لە سەرکوتی ئازادی و لە زاڵ کردنی زەبروزەنگ بەسەر کۆمەڵگادا دەبینێت. لەم ڕووەوە مانگرتن و ڕاگرتنی کار بەتایبەت مانگرتن لە خواردن، ڕاگەیاندنی تاوانە بەرامبەر بەو دەسەڵاتدارانەی کە خاکی مەرگ بەسەر کۆمەڵگادا دەپژێنن و داخوازیی ڕەوای جەماوەری زەحمەتکێش سەرکوت دەکەن. چوونی پۆلیس بۆ ناو کارخانە و یان بەکارهێنانی دووربینەکان بۆ زەبت کردنی چوونە ژووری بەشی مودیرییەت بۆ ناو ساڵۆنی غەزاخۆری بەئامانجی نیشان دانی کۆتایی مانگرتن لە خواردن، شانۆیەکی قیزەون و پڕ لە درۆ و فریوکارییە کە بەردەوام لەگەڵ ئامرازی سەرکوت، سیاسەتی دژەکرێکاری دەوڵەت و خاوەنکاران بووە. نە سیاسەتی سەرکوت، نە هەڕەشەی لەسەر کار دەرکردن و زیندان ناتوانێ کرێکاران لە دەربڕینی خواستەکانیان، لە خەبات بۆ وەدیهێنانی مافەکانیان پاشگەز بکات.
مێژووی خەباتی چینی کرێکاری ئێران و جیهان فێری کرێکارانی کردووە کە سەرکەوتن لە گرەوی خەباتی یەکگرتوو و ڕێکخراودایە. یەکگرتنی کرێکاران لە هەموو ناوەندە کرێکارییەکان، سەرکەوتنی کرێکارانی شیرکەتی ئاڵمینیۆمی ئەراک، کرێکارانی پڕۆژەکانی پارسی جنووبی، کرێکارانی گرووهی میللی و ناوەندی سەنعەتی پۆڵا، پاڵاوگە و پێترۆشیمییەکانی ئابادان، ماهشەهر، شۆفیران، موعەلیمان، پەرستاران، خانەنشینان و هەموو کرێکارانی ئێران زەمانەت دەکات.
ڕێکخراوە سەربەخۆکانی کرێکاران و خانەنشینان و موعەلیمان، هاوپەیمانی چینایەتیی کرێکارانی شیرکەتی ئاڵمینیۆمی ئەراکن. ئێمە، ڕێکخراوە واژۆکارەکانی خوارەوە، لە داخوازییەکانی کرێکارانی مانگرتوو پشتیوانی دەکەین و هەرجۆرە هەڵسووکەوتێکی سەرکوتگەرانە لەدژیان مەحکووم دەکەین.
٢٣ی خەرمانانی ١٤٠٤ی هەتاوی
سەندیکای کرێکارانی شیرکەتی واحد
کۆمیتەی هاوئاهەنگی بۆ یارمەتیدان بە پێکهێنانی ڕێکخراوە کرێکارییەکان
کرێکارانی خانەنشینی خووزستان
گرووپی یەکیەتیی خانەنشینان
بڵاوکردنەوەی دووبارە: تەلەڤیزیۆنی حیزبی کۆمۆنیستی ئێران و کۆمەڵە