تەرمی بارزان میهەنی دۆزرایەوە
شەممە ۱۷-۰۲-۱۴۰۱ | 07-05-2022
ڕۆژی شەممە ١٧ی گولان تەرمی بارزانی میهەنی کۆڵبەری تەمەن ١٨ ساڵی خەڵکی ورمێ کە چوار مانگ پێش ئێستا لەگەڵ دوو کۆڵبەری دیکەی ئەم ناوچە لە سنووری ورمێ بێسەروشوێن بوون لەلایەن هێزە سەربازییەکانی تورکیا لە گوندی گوڵشەم دۆزرایەوە.
بارزان میهەنی ڕۆژی پێنجشەممە ٢٣ی مانگی بەفرانباری ساڵی ڕابردوو لەگەڵ دو کۆڵبەری دیکەی خەڵکی گووندی باوان سەر بە شاری ورمێ بە ناوەکانی ئەسعەد سەیدان فەرد و بەهلوول سەیدانی فەرد لە کاتی کۆڵبەری لە کوێستانە سنوورییەکانی ئەو شارە بە هۆی بەفر و ڕنوو بێسەروشوێن ببوون. هەوڵەکان بۆ دۆزینەوەی تەرمی دوو کۆڵبەرەکەی دیکە بەردەوامە، ئەم دوو کۆڵبەرە خێزاندارن.