هەموو نیشانەکان ئەوەمان پێ دەڵێت کە ڕێژیمی جەنایەتکاری کۆماری ئیسلامی لە بەرامبەر ڕەوتی ڕوو لە گەشەی مانگرتنی کرێکاری و بزووتنەوەی ناڕەزایەتی کە مەوجوودیەتی ڕێژیمیان خستووەتە مەترسییەوە، لە پەرەپێدانی سەرکوت هەم وەک سیاسەت و تاکتیک بە ئامانجی ڕێگری لە درێژەی خەبات و هەم وەک ستراتێژی زەمانەتی مانەوەی دەسەڵاتەکەی کەڵک وەردەگرێت. هەر ئەوەندە بەسە تا سەرەەنج بدەینە ڕەوتی دەستگیرییەکان، گوشار بۆسەر بەندکراوانی ناو زیندانەکان و شەپۆلی ئێعدامەکان لەماوەی مانگەکانی ڕابردوو تا بەرینایی ئەم سەرکوتانەمان بۆ ڕوون بێتەوە. لە سەروبەندی یازدەی گوڵان ڕۆژی جیهانیی کرێکارەوە، هێزە ئەمنییەکانی حکوومەتی ئیسلامیی سەرمایەداران شەپۆلێکی بەرین لە ڕەشبگیریی چالاکانی موعەلیمان و باقیی چالاکانی بزووتنەوەی کرێکاری و کۆمەڵایەتییان دەستپێکردووە. لەماوەی ئەم چەند مانگەدا زیاتر لە ٢٠٠ کەس لە موعەلیمانی خەباتکار و باقیی هەڵسووڕاوانی بزووتنەوەی کرێکاری، چالاکانی بزووتنەوەی ژنان و چالاکانی بزووتنەوە کۆمەڵایەتییەکانی دیکەیان دەستبەسەر و ڕەوانەی زیندان کردووە. ژمارەیەک لە موعەلیمان و چالاکانی کرێکاریی ناسراو لەو کاتەوە هەتا ئێستا دەستبەسەرکراون. دەزگاکانی سەرکوتی ڕێژیم لەم ماوەیەدا هەوڵیان داوە تا بە تاکتیکی ڕسوا و ئابڕووچوواوی پەروەندەسازیی ئەمنییەتی زەمینەی مەحکوومییەتی دەستبەسەرکراون لە بێدادگاکانی ڕێژیمدا دابین بکەن. لە ئەندامانی شۆرای هاوئاهەنگیی ڕێکخراوی پیشەیی موعەلیمانی ئێران، ڕەسووڵ بۆداقی، ئیسکەندەر لوتفی، شەعبان موحەممەدی، مەسعوود نیکخاه، جەعفەر ئیبراهیمی، و موحەممەد حەبیبی و هەروەها ڕەزا شەهابی و حەسەن سەعیدی لە ئەندامانی ناسراوی سەندیکای کرێکارانی شیرکەتی واحیدی ئوتوبووسڕانیی تاران و دەوروبەر، وێڕای چالاکانی کرێکاری ئانیشا ئەسەدوڵڵاهی، ڕیحانە ئەنساری نەژاد، کەیوان موهتەدی و والە زەمانی هەروا لە زینداندا ڕاگیراون.
ئەمانە تەنیا چەند نموونەیەک لە ڕەشبگیرییەکانی ڕێژیمن لە ماوەی مانگەکانی ڕابردوودا. بێگومان بەم لیستە دەکرێ ناوی دەیان کەسی تر لە شوێنە جیاجیاکانی ئێران زیاد بکرێت. ئێستا ڕوونە کە بۆچی ڕێژیم بۆ بەرەوپێشبردنی ئەم ستراتێژ و سیاسەتە جەنایەتکارانەیە، بەرجەستەترین مۆرەی خۆی لە کوشتاری دەیەی شەست دەخاتە سەر کورسیی دەزگای بەڕێوەبەری. دانانی ڕەئیسیی جەلاد لەلایەن دەزگای ڕێبەریی ڕێژیمەوە هەڵگری ئەم پەیامەیە کە کۆماری ئیسلامی هەوڵ دەدات بە توندکردنەوە و پەرەپێدانی سەرکوت، فەزای ترس و تۆقاندن بەسەر کۆمەڵگەدا زاڵ بکات. ستراتێژی سەرکوتی ڕێژیم لەگەڵ شەپۆلی شکۆداری کرێکاران، مانگرتن و ناڕەزایەتیی سەرانسەری موعەلیمان، خەباتی بەردەوامی خانەنشینکراوان، ئاخێزی جەماوەریی خووزستان و ئیسفەهان و بزووتنەوەی ناڕەزایەتی لە شوێنە جیاجیاکانی ئێران بەرەوڕوو بووەتەوە. هەر ئەم مانگرتن و ئاخێز و ناڕەزایەتییانە، هەر ئەم خۆڕاگری و موقاومەتە، دەرخەری ئەو واقعییەتەیە کە پۆتانسیەل و هێزی زەمینگیرکردن و تێکشکاندنی ماشێنی سەرکوتی ڕێژیمی کۆماری ئیسلامی بوونی هەیە. هەژاری و نەهامەتی ئابووری گەیشتووەتە ئاستێکی تاقەت پڕووکێن و ڕێگایەکی بۆ پاشەکشەی کرێکاران و جەماوەری بێبەشی کۆمەڵگە نەهێشتووەتەوە.
کرێکاران، خەڵکی ئازادیخواز و خەباتکار!
ئایا دەبینن کە چۆن هەرکات دوژمنانی ئێمە هەست بە مەترسیی دەسەڵات و گوشاری هێزی خەباتی ئێمە دەکەن، هەرکات زانییان کە خەریکین سەنگ لەسەر سەنگ دادەنێنین و کۆدەبینەوە و پێکەوە هاوپەیمان دەبین و دێینە مەیدان، چۆن وەک گورگ پەلامار دەدەن و بەنهێنی و بە ئاشکرا ئێعدام دەکەن و ترس و خۆف دەنێنەوە و دەستبەسەرکردن و زیندان و ئەشکەنجە دەخەنە بەر ڕێگامان.
وشیار بن کە ئەمڕۆش لە وەحشەت و ترسدا، ترس لە تووڕەیی و نەفرەتی پنگخواردووی دەیان ساڵەی ئێمە، لەوەیکە مەبادا شکست و لاوازی و زەبوونییان، ئەمجارەیان بە قازانجی ئێمە تەواو بێت و کاریان یەکسەرە بکەین، هێرشەکانیان دەست پێکردووە. دەستبەسەر دەکەن، زیندانی دەکەن و دەبەنە بەر جووخە. دەست بەکار بن و ڕایگەیەنن کە دەسبەسەرکردن، ئەشکەنجە و ئێعدام دەبێ قەدەغە بکرێت! مامۆستای بەندکراو، بەندکراوی سیاسی دەبێ ئازاد بکرێت.
دەسەڵاتێک کە بەمجۆرە داماو و داوەشاوە، نابێ دیسان بۆ جارێکی دیکە دەرفەتی پێبدرێت تا بە چەکی زیندان پاشەکشە بە ڕیزەکانمان بکات. پێویستە لەبەر خرۆشی هاواری ئێمە بۆ هێنانەدەری دیلە بەندکراوەکانمان، دوژمنان بکەونە لەرزە، بتۆقن و باش حاڵی بن کە زیندان جێگای خودی ئەم جەنایەتکارانەیە.
کرێکاران، جەماوەری ئازادیخوازی ئێران!
بۆ ئازادیی بەندکراوانی سیاسی ڕاپەڕن. هیچ کەس نابێ بەخاتری باوەڕ و بەخاتری چالاکیی سیاسی بخرێتە زیندانەوە. ئازادیی بیروباوەڕ و ئازادیی چالاکیی سیاسی مافی بێئەملاوئەولای هەموو تاکێکی ناو کۆمەڵگەیە. هەروەک مرۆڤی شیاوی ئازادی و بەرابەری، قورس و قایم و بێ راڕایی لە مافی ڕەوای خۆمان دیفاع بکەین! لە بەرامبەر دەستدرێژیی پۆلیسیی حکوومەتی جەنایەتکاراندا ڕاوەستن و دەنگی ناڕەزایەتی دژبە پێشێلکردنی ئەم مافە ڕەوا ئینسانییانە بەرزتر بکەنەوە. لێبڕاوانە پەیگیری چارەنووسی مامۆستایانی بەندکراو و هەموو بەندکراوانی سیاسی بن و خوازیاری ئازادیی بێ شەرت و مەرجیان بن.
لەئاست باروودۆخی زیندانەکان ناڕەزایەتی دەربڕن، لە بەرامبەر یاسای زەبر و زەنگی دەسەڵاتی جەنایەتکاراندا تەسلیم مەبن. مونەزەم و دەستەجەمعی بڕۆنە مولاقاتی بەندکراوان. لە بەرامبەر زیندانەکاندا کۆببنەوە و ڕیزی مولاقات بکەنە ڕیزی ئەو خەڵکە ناڕازییەی کە بە دەنگی ڕەساوە خوازیاری ئازادیی بەندکراوانی سیاسین. لە گەڕەک و کارخانە و شەقام درووشمی “بەندکراوی سیاسی دەبێ ئازاد بکرێت” بەرز بکەنەوە. لە کۆبوونەوە و ناڕەزایەتییەکانی خۆتاندا خواستی ئازادیی بەندکراوانی سیاسی بێننە گۆڕێ و لێبڕاوانە لەسەری پێداگری بکەن.