ڕێکخراوی مافی مرۆڤی هەنگاو و ٦ ڕێکخراوی دیکەی مافی مرۆڤی چالاکی کوردستان بەیاننامەیەکی هاوبەشیان بڵاو کردەوە و لەو بەیاننامەیەدا داوایان لە خەڵکی کوردستان کردووە کە ڕۆژی سێشەممە ١٠ی ڕێبەندان بە مانگرتنی گشتی و سەرانسەری، جێبەجێکردنی سزای سێدارەی چوار بەندکراوی سیاسی بە ناوەکانی “موحسین مەزڵووم”، “محەممەد فەرامەرزی”، “وەفا ئازەربار” و “پژمان فاتیحی”، مەحکووم و شەرمەزار بکەن.
دەقی ڕاگەیەندراوەکە؛
ڕێژەی لەسێدارەدان لە کوردستاندا بە ئاستێکی لەڕادەبەدەر چووەتە سەرەوە و ماشینی سەرکوتی کۆماری ئیسلامی زۆر دڕندانە و بێشەرمانە لاوانی ئەم نیشتمانە دەکاتە قوربانی، وەک ئەوەی پەتی سێدارە و هێزی بێناوەڕۆکی خۆی بۆ سزادانی خەڵکی کوردستان و کوشتنی ئازادی و ئازادیخوازان بەکار دەهێنێت. لە دوایین هەوڵی نەزۆکانەی ڕژیمی کۆماری ئیسلامی بەداخەوە سەرلەبەیانیی ئەمڕۆ دووشەممە، چوار لاوی بەندکراوی سیاسی لەسێدارە دا و سزای لەسێدارەدانی شەش بەندکراوی سیاسی و ئایینیی دیکەی کورد لە دادگای باڵای ئێران پەسەند کراوە و ئەگەری جێبەجێکردنی سزای ئەو شەش هاووڵاتییەش لە ڕۆژانی داهاتوودا لە ئارادایە.
ئێمە، کۆمەڵێک لە چالاکان و ڕێکخراوی داکۆکیکار لە مافەکانی مرۆڤ، داوا لە هەموو چین و توێژەکانی کۆمەڵگەی کوردستان دەکەین کە لە ڕۆژی سێشەممەی ئەم حەفتەیەدا بە بەشداریکردن لە مانگرتنێکی گشتی و سەرانسەری، ناڕەزایەتیی خۆتان بەرانبەر بەم ڕەوتە نامرۆڤانەی ڕژیم کە دژی بنەماکانی دژی مافەکانی مرۆڤن، دەرببڕن.
مەبەست لەم مانگرتنە تەنیا نیشاندانی دژایەتیی سزای سێدارە نییە، بەڵکوو ڕاکێشانی سەرنجی نەتەوەیی، نێونەتەوەیی و نێودەوڵەتییە بۆ دۆخی خراپ و نالەباری مافەکانی مرۆڤ لە کوردستان و کۆتاییهێنان بە سزای لەسێدارەدانە.
ئێمە لەم بانگەوازەدا داوا لە هەموو لایەنە سیاسییەکانی کوردستان، ڕێکخراو و دامەزراوە مەدەنییەکان، ناوەند و ڕێکخراوەکانی مافی مرۆڤ و هەروەها هەموو کەسانی ئازادیخوازی سەرانسەری جیهان دەکەین کە پشتیوانی ئەم مانگرتن و داخوازی و هەڵسوڕاوانە بن و هەروەها بۆ گەیاندنی خەباتی ڕەوای خەڵکی کوردستان کە لە پێناو بەدیهێنانی دادپەروەری و پاراستنی مافەکانی مرۆڤە، بە ناوەندە پەیوەندیدارەکان و جیهان بەگشتی، پاڵپشتمان بن.
٢٩ی جەنیوەریی ٢٠٢٤
٩ی ڕێبەندانی ١٤٠٢
ڕێکخراوی جیهانی کوردی
ڕێکخراوی مافی مرۆڤی هانا
ڕێکخراوی مافی مرۆڤی هەنگاو
ڕێکخراوی مافی مرۆڤی کوردپا
کەمپەینی داکۆکیکاری چوار بەندکراوی سیاسیی کورد
کوردستان تریبۆناڵ
ناوەندی مافی مرۆڤی زاگرۆس