چوار کۆلبەر لە ئەنجامی تەقەی ڕاستەوخۆی هێزە چەکدارەکانی ڕژیم و هەروەها ڕاوەدوونانیان لەلایەن هێزە حکومەتییەکانەوە لە سنوورەکانی بانەدا بەسەختی بریندار بوون. ئێوارەی دووشەممە ١٣ی سەرماوەز شاخەوان ئەحمەدی تەمەن ٢٠ ساڵ و ئومێد یەزدانی تەمەن ٢٣ ساڵ، کۆڵبەرانی خەڵکی سەقز بە تەقەی ڕاستەوخۆی هێزە چەکدارەکانی ڕژیم لە سنووری هەنگەژاڵی بانە بەسەختی بریندار بوون. پێشتر واتە ئێوارەی شەممە ١١ی سەرماوەز، کۆڵبەرێک بەناوی پەرویز، خەڵکی کرماشان بە تەقەی ڕاستەوخۆی هێزە چەکدارەکانی کۆماری ئیسلامی و حیسام فاتیحی، کۆڵبەری خەڵکی گوندی کەرجۆی سەر بە شاری سنە، بەهۆی ڕووداوێک لە کاتی دواکەوتنیدا لەلایەن هێزەکانی جێگیر لە سنووری هەنگەژاڵی بانەوە بریندار بوون. شاخەوان ئەحمەدی و پەرویز، بە تەقەی ڕاستەوخۆی گوللەی چەکی ساچمەیی لاقیان و حیسام فاتیحی بەهۆی کەوتنە خوارەوە لە بەرزایی لە کاتی پەناگرتن لە تەقەی هێزە حکومەتییەکان دەستی بەسەختی بریندار بووە.