بە خاک سپاردنی تەرمی نیکا شاکەرەمی لە لورستان
دوشەممە ۱۱-۰۷-۱۴۰۱ | 03-10-2022
تەرمی نیکا شاکەرەمی لە ڕۆژی لەدایکبوونیدا لە خوڕەم ئاوای لوڕستان بە خاک سپێردرا. نیکا شاکەرەمی، تەمەن ١٧ ساڵ کە لە خۆپیشاندانەکانی ڕۆژی ٢٩ی خەرمانان لە بلواری کەشاوەرزی تاران ون ببوو، دوای ١٠ ڕۆژ تەرمەکەی بە سەر و لووت شکاوی ڕادەستی بنەماڵەکەی کرا. بنەماڵەکەی دەڵێن نیکا لەلایەن ناوەندە ئەمنیەتییەکانەوە لەژێر لێدان و ئەشکەنجەدا کوژراوە و پاشان خرانە ژێر گوشارەوە کە بە بێدەنگی بینێژن. بەڵام ئەوان بڕیاریان دا لە ڕۆژی ١١ی ڕەزبەردا بینێژن کە ڕۆژی لەدایکبونیەتی. ئاتەش شاکەرەمی پووری نیکا ڕایگەیاند کە نیکا ماوەی حەوتوویەک پێش کوژرانەکەی لە دەستبەسەرگەی سپای پاسداراندا بووە.
بنەماڵەی نیکا شاکەرەمی وەک زۆر لە بنەماڵەی ڕۆڵە کوژراوەکانی دیکە خراونەتە ژێر گوشارەوە کە نابێ ڕێوڕەسمی پرسە و سەرەخۆشی بۆ ئازیزە کوژراوەکانیان دابنێن.