سزای سێدارەی دوو بەندکراوی ژن بە ناوەکانی سوهەیلا عابیدی خەڵکی بیجاڕ و فەرانەک بەهشتی خەڵکی تیکاب کە پێشتر بە تۆمەتی کوشتنی بەئەنقەست سزای سێدارەیان بەسەردا سەپێندرابوو، سەرلەبەیانی ڕۆژی چوارشەممە ٥ی گەلاوێژ، لە بەندیخانەکانی سنە و ئورمیە جێبەجێ کرا.
سۆهەیلا عابیدی ٣٣ ساڵە و خەڵکی بیجاڕ ٨ ساڵ پێش لەلایەن هێزەکانی ئینتزامی رژیم دەستبەسەر و دواتر بە تۆمەتی کوشتنی هاوسەرەکەی سزای سێدارەی بەسەردا سەپێندرابوو. جێگای ئاماژەیە کە سوهەیلا عابیدی قوربانی منداڵ هاوسەری بووە و لە تەمەنی ١٥ ساڵاندا ناچارکرابوو هاوسەرگیری بکات.
هەروەها، فەرانەک بەهشتی خەڵکی تیکاب ٥ ساڵ پێش بە تۆمەتی کوشتنی هاوسەرەکەی دەستبەسەر و سزای سێدارەی بەسەردا سەپێندرابوو و لە ماوەی پێنج ساڵی ڕابردوو لە بەندیخانەکانی مەهاباد و ئورمیە ڕاگیرابوو.
هاوکات لەگەڵ ئەم دوو بەندکراوە لانی کەم ١٣ کەسیتر لە بەندیخانەکانی سنە و ورمێ بە مەبەستی جێبەجێ کرانی سزای سێدارە، گوازراونەتەوە بۆ ژووری تاکەکەسی و تا ئێستا هیچ زانیارییەک لەسەر چارەنووسیان لەبەر دەستدا نییە.