Komala

وەزارەتی ڕووداوە لە ناکاوەکانی ڕووسییە، ئەمڕۆ یەکشەممە ٣١ی پووشپەڕ ڕایگەیاند، لە ماوەی ٢٤ کاتژمێری ڕابردوودا 40 هاووڵاتیی خنکاون کە دوو کەسیان منداڵ بوون.
لە بڵاوکراوەکەدا هاتووە، یەکێک لە ڕووداوەکان لە ناوچەی بوراتیا بووە کە سێ کەس بە یەکەوە خنکاون. ئەمە لە کاتێکدایە، ڕۆژی 7ی ئەم مانگە، وەزارەتی ڕووداوە لە ناکاوەکانی ڕووسییە ئامارێکی بڵاوکردەوە، کە لە 24 کاتژمێردا 49 کەس خنکاون، کە حەوتیان منداڵ بوون. هەروەها وەزیری ڕووداوە لە ناکاوەکانی ڕووسییە ڕایگەیاند، لە سەرەتای هاوینی 2024 ـەوە تاوەکوو ئێستا 215 منداڵ خنكاون. هەر بەگوێرەی ڕاگەیاندراوەکەی وەزارەتی ڕووداوە لە ناکاوەکانی ڕووسییە، لە ساڵی ڕابردوودا 3 هەزار و 810 کەس لە سەرتاسەری ئەم وڵاتە بەهۆی مەلەکردنەوە خنکاون.