دەستبەسەرکرانی خوێندکارێکی زانکۆی ڕازی لە کرمانشا
سێشەممە ۱۲-۰۷-۱۴۰۱ | 04-10-2022
خوێندکارێکی زانکۆی ڕازی کرمانشا بە ناوی مەتین چراغی، لە کاتی ناڕەزایەتییەکان بە مەبەستی شەرمەزار کردنی کوشتنی ژینا ئەمینی لەلایەن هێزە ئەمنییەکانی ڕژیم دەستبەسەرکراوە و چارەنووسی نادیارە. ئێوارەی ڕۆژی شەممە، ڕێکەوتی ٩ی ڕەزبەر، مەتین چراغی خەڵکی شاری شاباد، لە یەکێک لە شەقامەکانی شاری کرمانشا لەلایەن هێزە ئەمنییەکانەوە ڕفێنراوە.
دوای تێپەڕینی چوار ڕۆژ لە دەستبەسەرکرانی ئەم خوێندکارە، سەرەڕای بەدواداچوونەکانی بنەماڵەی ناوبراو لایەنە پەیوەندیدارەکان هیچ زانیارییەک لەبارەی شوێنی ڕاگیران و چارەنووسی نادرکێنن.
شیاوی باسە کە مەتین چراغی خوێندکاری کارناسی کارەبای زانکۆی ڕازی کرمانشایە.