سزای ٣٩ مانگ بەندکران بۆ سەر هاووڵاتیەکی خەلکی پیرانشار
پێنجشەممە ۲۴-۰۶-۱۴۰۱ | 15-09-2022
ڕەحمان قادری هاووڵاتیی خەڵکی پیرانشار کە زستانی ڕابردوو لەلایەن هێزە ئەمنییەکانی ڕژیمەوە دەستبەسەر کرابوو، لەلایەن دەزگای دادی کۆماری ئیسلامییەوە سزای سێ ساڵ و سێ مانگ و دوو ڕۆژ بەندکرانی بە سەردا سەپا. ئەم سزایە لەلایەن لقی ١٠١ی دادگای تاوانەکانی پیرانشار بە سەر ناوبراودا سەپاوە و لە ڕۆژانی ڕابردوودا بە فەرمی پێی ڕاگەیەندراوە.
بەپێی سزاکە، ڕەحمان قادری بە تۆمەتی ئەندامەتی لە یەکێک لە حیزبە سیاسیەکانی کوردستان سزای ٢ ساڵ و ٧ مانگ و ١٦ ڕۆژ بەندکران و بە تۆمەتی پڕوپاگەندە دژی حکومەت سزای ٧ مانگ و ١٦ ڕۆژ بەندکرانی بە سەردا سەپاوە کە بەپێی یاسای کۆکردنەوەی سزاکان زیاترین سزای ناوبراو جێبەجێ دەکرێت.