بەپێی ڕاپۆرتەکان. هاووڵاتییەکی خەڵکی شاری بیجاڕ بە ناوی “دانش مەولوودی” تەمەن ٢٧ ساڵ، لە ماوەی ڕابردوودا لە لایەن لقی ١٠٢ی دادگای تاوانەکانی ئەمشارە، بە تۆمەتی “پڕوپاگەندە لە دژی نیزام”، سزای شەش مانگ بەندکردنی بەسەردا سەپاوە.
بەپێی ئەم ڕاپۆرتە، ناوبراو هاوکات لەگەڵ ناڕەزایەتییە جەماوەرییەکانی ساڵی ڕابردوو لە شاری بیجاڕ و لە لایەن هێزەکانی ڕژیمەوە دەستبەسەر و دوای تێپەڕبوونی مانگێک لە دەستبەسەربوونی، بە دانانی بارمتە و بە شێوەی کاتی تا کۆتاییی دادگاییکردنەکەی ئازاد کرابوو. شایانی باسە کە ئەو هاووڵاتییە لە ساڵی ١٣٩٥ بەهۆی چالاکییەکانییەوە جارێکی دیکە دەستبەسەر کرابوو و دوای ٦ مانگ بە دانانی بارمتەی قورس بە بڕی یەک ملیارد تمەن و بە شێوەیەکی کاتی تا کۆتاییی دادگایی کردنەکەی ئازاد کرابوو. دانش مەولوودی لە کۆتاییی مانگی ڕەزبەری ١٣٩٨، لە لایەن لقی ١ی دادگای گشتی و شۆڕشی شاری بیجاڕەوە بە تۆمەتی “پڕوپاگەندە دژی نیزام لە ڕێگەی لایەنگری و ئەندامەتی لە حیزبی دێموکراتی کوردستانی ئێران”، سزای ۵ ساڵ بەندکردنی بەسەردا سەپاوە.