کوژرانی ژنێک بە دەستی بنەماڵەکەیەوە
دوشەممە ۰۷-۰۶-۱۴۰۱ | 29-08-2022
ژنێکی گەنجی خەڵکی شارۆچکەی کۆتۆل سەر بە شاری خۆی لە پارێزگای ورمێ بە ناوی ئایسەل دوومانی تەمەن ٢٨ ساڵ بە پاساوی نامووس و شەرەف لەلایەن براکەی و دوو ئامۆزای خۆیەوە کوژرا.
ئایسەل دوومانی کە خەڵکی گوندی گڕناویک و دایکی دوو منداڵ، ڕۆژی شەممە ٥ی خەرمانان، لەلایەن براکەی و دوو ئامۆزای خۆیەوە دراوەتە بەر لێدان و ئەشکەنجە و هەر بۆیەش گیانی لەدەست داوە. ئایسەل دوومانی لە ماوەی دوو ساڵی ڕابردوودا چەندین جار لەلایەن هاوژینەکەیەوە دراوەتە بەر ئازار و ئەشکەنجە و لیدان و کوتان و هەر کات ئایسەل گەڕاوەتەوە بۆ ماڵی باوک و دایکی لەلایەن بنەماڵەکەیەوە بێ ڕێزی پێکراوە و ناچار کراوە کە بگەڕێتەوە لای هاوژینەکەی.
جێگای ئاماژەیە کە ئایسەل دوومانی دایکی کوڕێکی ٦ مانگە و کچێکی ٢ ساڵانە و تەرمەکەی ڕەوانەی پزیشکی دادی ورمێ کراوە.
